రష్యా వ్యాక్సిన్ కోసం ఆసక్తి చూపుతున్న దేశాలివే!
ABN, First Publish Date - 2020-08-15T01:28:44+05:30
కరోనా వైరస్‌పై పోరులో భాగంగా అందరికంటే ముందే వ్యాక్సిన్ ప్రకటించిన రష్యా ప్రపంచాన్ని ఆశ్చర్యపరిచింది. ఈ
మాస్కో: కరోనా వైరస్‌పై పోరులో భాగంగా అందరికంటే ముందే వ్యాక్సిన్ ప్రకటించిన రష్యా ప్రపంచాన్ని ఆశ్చర్యపరిచింది. ఈ వ్యాక్సిన్ అవసరమైన అన్ని పరీక్షలు పూర్తి చేసుకున్నట్టు ఆ దేశ అధ్యక్షుడు వ్లాదిమిర్ పుతిన్ ఇప్పటికే నొక్కి వక్కాణించారు. స్పుత్నిక్-విగా పేరుపెట్టిన ఈ టీకాను గమలేయ రీసెర్చ్ ఇనిస్టిట్యూట్, రష్యన్ డిఫెన్స్ మినిస్ట్రీ సంయుక్తంగా అభివృద్ధి చేశాయి. రష్యా ఆరోగ్య మంత్రిత్వ శాఖ ప్రకారం ఈ వ్యాక్సిన్‌ను ఒకసారి తీసుకుంటే కరోనా వైరస్‌ను ఎదుర్కొనేందుకు అవసరమైన రోగనిరోధక శక్తిని రెండేళ్లపాటు అందిస్తుంది.
జూన్ 17న ఈ వ్యాక్సిన్‌ను మానవులపై పరీక్షించారు. మొత్తం 76 మంది వలంటీర్లకు దీనిని ఇవ్వగా సంతృప్తికరమైన ఫలితాలు వచ్చాయి. అయితే, రష్యా స్పుత్నిక్-వి టీకాపై తమకు కచ్చితమైన సమాచారం లేదని ప్రపంచ ఆరోగ్య సంస్థ పేర్కొంది. ఈ మేరకు డబ్ల్యూహెచ్ఓ డైరెక్టర్ జనరల్ సీనియర్ సలహాదారు డాక్టర్ బ్రూస్ అయిల్‌వార్డ్ పేర్కొన్నారు.
రష్యా వ్యాక్సిన్ సమర్థతపై ప్రశ్నలు ఉత్పన్నమవుతున్నప్పటికీ పలు దేశాలు మాత్రం దానిపై ఆసక్తి చూపిస్తున్నాయి. రష్యా టీకాను కొనుగోలు చేసేందుకు వియత్నాం ఇప్పటికే ముందుకొచ్చింది. 50-150 మిలియన్ డోసుల వ్యాక్సిన్ కోసం వియత్నాం ఒప్పందం కుదుర్చుకుంది. రష్యా వ్యాక్సిన్‌ను పరిశీలిస్తున్న ఇజ్రాయెల్ కొనుగోలుకు చర్చలు ప్రారంభించినట్టు ఆ దేశ ఆరోగ్యశాఖ మంత్రి తెలిపారు.
రష్యా వ్యాక్సిన్‌కు క్లినికల్ ట్రయల్స్ నిర్వహించనున్నట్టు ఫిలిప్పీన్స్ ప్రకటించింది. అక్టోబరులో ట్రయల్స్ ప్రారంభిస్తామని, విజయవంతమైతే వచ్చే ఏడాది ఏప్రిల్ నుంచి ప్రజలకు ఇవ్వనున్నట్టు తెలిపింది. మరోవైపు, స్పుత్నిక్-వి వ్యాక్సిన్‌పై సరైన డేటా లేకపోవడంతో రష్యా డాక్టర్లు కొంత అసంతృప్తిగా ఉన్నట్టు తెలుస్తోంది.
Updated Date - 2020-08-15T01:28:44+05:30 IST