థైరాయిడ్‌ సమస్య... బరువు తగ్గేందుకు..
ABN, First Publish Date - 2020-06-22T20:24:41+05:30
నాకు థైరాయిడ్‌ సమస్య... బరువు తగ్గేందుకు ఎలాంటి ఆహారపు అలవాట్లు పాటించాలి?
ఆంధ్రజ్యోతి(22-06-2020)
ప్రశ్న: నాకు థైరాయిడ్‌ సమస్య... బరువు తగ్గేందుకు ఎలాంటి ఆహారపు అలవాట్లు పాటించాలి?
- భాను, హైదరాబాద్‌
డాక్టర్ సమాధానం: థైరాయిడ్‌ సమస్య ఉన్నవారికి బరువు తగ్గడం కొంత కష్టమైన పనే. కానీ సరైన ఆహారపు అలవాట్లు, వ్యాయామం వల్ల అది సాధ్యమే. రోజువారీ ఆహారంలో బ్రౌన్‌ రైస్‌, గోధుమ రొట్టెలు; అప్పుడప్పుడూ చిరుధాన్యాలను తీసుకోండి. అయితే ఆహారంలో అధిక భాగం ఆకుకూరలు, కూరగాయలు, పళ్ళు ఉండేలా చూసుకోవాలి. పాలు, పెరుగు, గుడ్లు తీసుకుంటూ ఉండాలి. ఉదయం అల్పాహారంగా ఓ గుడ్డు, ఓ కప్పు వెన్న తీసిన పాలు, ఓ పండు, అరకప్పు ఉప్మా, పోహా లాంటివి లేదా రెండు ఇడ్లీలు లేదా ఓ దోశ తీసుకో వచ్చు. మధ్యాహ్నం, రాత్రి భోజనానికి ఓ కప్పు ఉడికించిన అన్నానికి కప్పు పప్పు, అంతే కాయగూరలు లేదా ఆకుకూరలు, పెరుగు తీసుకోవాలి. ఈ భోజనాలకు మధ్య పళ్ళు లేదా క్యారట్‌, టమాటా, కీరా లాంటి కూరగాయ ముక్కలు; బాదం, పిస్తా, వేరుశెనగ లాంటి గింజలు తీసుకోవచ్చు. క్యాబేజీ, కాలీఫ్లవర్‌, ముల్లంగి లాంటివి తగ్గించాలి. వీటిని పచ్చిగా కాకుండా ఉడికించి కానీ కూరగా కానీ చేసి వారంలో రెండుసార్లకు మించకుండా తీసుకోవచ్చు. ఈ ఆహార జాగ్రత్తలతో పాటు, రోజూ క్రమం తప్ప కుండా కనీసం 30 నిమిషాల పాటు వేగంగా నడవడం; నెమ్మదిగా పరిగెత్తడం; యోగా; ఈత కొట్టడం ఇలా ఏదో ఒక రకమైన వ్యాయామం చెస్తే మీరు నెమ్మదిగా బరువు తగ్గుతారు.
డా. లహరి సూరపనేని
న్యూట్రిషనిస్ట్, వెల్‌నెస్ కన్సల్టెంట్
nutrifulyou.com(పాఠకులు తమ సందేహాలను
sunday.aj@gmail.comకు పంపవచ్చు)
Updated Date - 2020-06-22T20:24:41+05:30 IST