నీ పలకరింపుతో మేల్కొన్న రోజు
ABN, First Publish Date - 2020-11-16T06:47:18+05:30
‘‘బుల్లి లాంతర్‌..’’ పాటనో మురాకామి మాటల మూటనో ఇంకో కాలం నుండి ఇదే రోజుని...
‘‘బుల్లి లాంతర్‌..’’ పాటనో
మురాకామి మాటల మూటనో
ఇంకో కాలం నుండి ఇదే రోజుని
గూగుల్‌ ఫొటోస్‌ గుర్తుచేసిన జ్ఞాపకంగానో
ఉదయపు పలకరింపుకి వంకగా చూపించి
దూరాలకో తీపిగాటు పెడతావు.
ఊబిలాంటి నా దైనందిన జీవితం
నీకు ఆత్మీయకరచాలనం చేసేలోపే
ఈడ్చుకుపోతుంది
వక్తాశ్రోతా నువ్వూనేనూ
ద్వంద్వాలను ద్వేషించే మనసు
నువు పంపిన సందేశాల మీదుగా
నిను దగ్గరకు లాక్కుంటుంది.
రోజంతా యథేచ్ఛగా మాట్లాడుకుంటుంది.
పాటా మాటా జ్ఞాపకం -
నెపమై మనని కలిపినదేదైనా
ఇద్దరి మధ్యా నలిగీనలిగీ
తనదైన ఉనికిని వదిలేసుకుంటుంది.
దీపాలార్పి పడకింటిలోకి నడుస్తూ
చిరుకాంతి కోసం ఫోన్‌ తడుముకుంటున్నప్పుడు
నా స్పందన కోసం నువ్వక్కడే
ఓ ప్రశ్నార్థకమై ఎదురుచూస్తూ కనపడతావు
నా చీకటి క్షణాల్లోకి మళ్ళీ
బుల్లిలాంతరు వెలుగు తోసుకొస్తుంది.
మూతలు పడుతున్న రెప్పల వెనుక, నీతో
మరో సుదీర్ఘ సంభాషణ మొదలవుతుంది.
మానస చామర్తి
manasa.chamarthi@gmail.com
Updated Date - 2020-11-16T06:47:18+05:30 IST