పొగడ్తల ప్రతిధ్వని
ABN, First Publish Date - 2020-09-07T06:18:56+05:30
కులం పేరు నిందార్థకమైనప్పుడు పెదవి విప్పడమే పెద్ద ప్రమాదమౌతుంది వర్తమాన మానంపై పూర్వీకం అవమానమై నిలిచినప్పుడు...
కులం పేరు నిందార్థకమైనప్పుడు
పెదవి విప్పడమే పెద్ద ప్రమాదమౌతుంది
వర్తమాన మానంపై
పూర్వీకం అవమానమై నిలిచినప్పుడు
గొంతులో అవసరం వొత్తు వేసుకొని
పొగడ్తల తడిపొడి దీపాల్ని వెలిగించుకోవాలా...
మాటల్ని
తల్లకిందులు చేసే అక్షర గబ్బిలాలకి
ప్రశంసా పరిమళపు రెక్కల్ని తగిలించి
పైపైకి ఎగిరించక్కర్లెద్దు
నిద్రకు మెలకువ గుండు సూది దిగినట్లు
కళ్లూ పిడికిళ్లూ ముడుసుకుంటుంటే
వొఠి వెచ్చదనం ఆలోచనలే...
చీకటి చీలిక ల్లోంచి
మిగిలి పోయినదేదో చెప్పాలని
పెనునిద్దర పొలిమేర దాటి వచ్చినట్లుంది
ఖండాంతరాలక్కూడా పరివ్యాప్తించే
ప్రశంసా ప్రతిధ్వనుల ముందు
ఈ మట్టి ఏ ఒక్కడి దేహదేవళం కాదు
అక్షరాలకి అవసరార్థం-
అనవసరపు అందచందాల్ని అద్దే
ఎవరి జాగా వాళ్లదే... ఎవరి పాగా వాళ్లదే...
ముఖాలు ముఖాలుగా బహుళమై
దుఃఖస్మృతుల్లోకి ఆత్మను ప్రవేశపెడ్తున్నట్లు
మట్టే కాదు
మెట్టు మీద అక్షర దీపం కూడా
అవమానపు రక్తంతో తడిసిపోతుంది
బతికే హక్కును
బతిమాలుకు తాకట్టు పెట్టుకుంటూ
పొగిడేది ఒక్క భట్రాజులేనా...!?!
ప్రశ్నని పదునైన కత్తిలా కడుపులో దాచుకుంటూ
ఇంక ఉగ్గపట్టలేను
ప్రశంసించినంత నగ్నంగా అభిశంసిస్తూ....
ఎస్‌.ఆర్‌. భల్లం
98854 42642
Updated Date - 2020-09-07T06:18:56+05:30 IST