పిట్టచావు
ABN, First Publish Date - 2020-05-25T09:52:20+05:30
హెచ్చరిక లేకుండా నగరపు చెట్లమీద భయం పిడుగు పడింది గూళ్ళతోసహా పాతుకున్న వేళ్ళతోసహా ఆకులూ రెమ్మలూ చెట్లూ ఉన్నచోటే తగలడ్డాయి...
హెచ్చరిక లేకుండా నగరపు చెట్లమీద
భయం పిడుగు పడింది
గూళ్ళతోసహా పాతుకున్న వేళ్ళతోసహా
ఆకులూ రెమ్మలూ చెట్లూ
ఉన్నచోటే తగలడ్డాయి
మానవీయ కరుణతోసహా
నగరం తగలడింది
మండేకొమ్మలపై నుండి
వలసొచ్చి తచ్చాడు పిట్టలు
నుసిగుట్టలై రాలిపడ్డాయి
ఇటుకల బట్టీలు కట్టి
తట్టల ఇసకెత్తి ఇళ్ళు కట్టి
గోడలపై తమ రెక్కల వర్ణాల రంగులేసిన
పిట్టల్ని
తట్టి దులిపేసిన చెదల్లాగా
నగరం వెలి వేసింది
తిరిగి వలస మొదలైంది
తమ తారుచెమటల తనువులే రోలర్లై వేసిన
నిర్దయ రోడ్ల మీద
నగరవాసులు దయతో ఈ పూటకి తమ కొదిలేసిన
కాలుతున్న కరోనా ఏకాకి రోడ్ల మీద
పిట్టల వలస మొదలైంది
నగరం వేసిన వెలితో
అలసట లేని వెలితి బతుకు
తిరుగు వలస మొదలైంది
బతుకు తిరుగుడు పిట్టలకి
నగరమిప్పుడు ఆక్సిజన్‌ లేని వెంటిలేటర్‌
పిట్టలంతా ఒక్కటై ఏకాకి గుంపులై
కదులుతున్నాయి స్మశానాలు కదిలినట్లు
నగరపు స్మశానాలనొదిలి
సగం కాలి నిట్టనిలువున తిరిగి లేచే
శవపు ఆశలా
చెక్కు లేచిపోయి పుండ్లయిన పాదాలు
మరొక్క అడుగు వేస్తున్నాయి
పనీ ఇవ్వకా, గడ్డు కాలాన
బతుకు జీతమూ ఇవ్వక
గుప్పెడు మెతుకులూ గుండెంత గూడూ ఇవ్వని
ఎవరికీ పట్టనితనమో
పట్టణత్వమో
ఏ రైలు పట్టాలో ఏ ఆకలో ఏ దప్పికో
ఏది కాటేస్తుందో మరేది దహిస్తుందో
ఏ పిట్ట ఎక్కడ రాలిపడుతుందో
పిట్టలెలా చస్తాయో
ఎవరూ చూడరంటారు
పిట్ట చావు పక్క పిట్టకి కూడా తెలీదంటారు
తన చావు పక్క పిట్ట వలసని ఆపదంటారు
వలసైనా తిరుగు వలసైనా...
విప్పగుంట రామ మనోహర
Updated Date - 2020-05-25T09:52:20+05:30 IST