ఏబీవీపై అభియోగాల నమోదు
ABN, First Publish Date - 2020-12-19T08:04:46+05:30
నిఘా పరికరాల కొనుగోలు కేసులో రాష్ట్ర నిఘా విభాగం చీఫ్‌గా పనిచేసిన సీనియర్‌ ఐపీఎస్‌ అధికారి ఏబీ వెంకటేశ్వరరావుపై రాష్ట్రప్రభుత్వం అభియోగాలు (ఆర్టికల్‌ ఆఫ్‌ చార్జెస్‌) నమోదు
15 రోజుల్లో బదులివ్వాలని ప్రభుత్వ ఆదేశం
అమరావతి, డిసెంబరు 18 (ఆంధ్రజ్యోతి): నిఘా పరికరాల కొనుగోలు కేసులో రాష్ట్ర నిఘా విభాగం చీఫ్‌గా పనిచేసిన సీనియర్‌ ఐపీఎస్‌ అధికారి ఏబీ వెంకటేశ్వరరావుపై రాష్ట్రప్రభుత్వం అభియోగాలు (ఆర్టికల్‌ ఆఫ్‌ చార్జెస్‌) నమోదు చేసింది. ఈ మేరకు శుక్రవారం సీఎస్‌ నీలం సాహ్ని జీవో జారీ చేశారు. అభియోగాలపై 15 రోజుల్లోగా వెంకటేశ్వరరావు వివరణ ఇవ్వాలన్నారు. ఏబీవీ నిఘా అధిపతిగా ఉన్నప్పుడు.. 2017-18లో ఏరోస్టాట్‌-యూఏవీ టెక్నాలజీతో కూడిన నిఘా పరికరాలను సమకూర్చుకునేందుకు పోలీసు శాఖ నిర్వహించిన టెండర్లు, కంపెనీల ఎంపికలో అవకతవకలు జరిగాయని..
నిబంధనలకు విరుద్ధంగా వ్యవహరించారంటూ వైసీపీ ప్రభుత్వం ఆయన్ను సస్పెండ్‌ చేసింది. దానిని కేంద్ర పరిపాలనా ట్రైబ్యునల్‌ సమర్థించింది. అయితే ఆ సస్పెన్షన్‌ ఉత్తర్వులను హైకోర్టు రద్దుచేసి.. తక్షణమే ఆయనకు పోస్టింగ్‌ ఇవ్వాలని ఆదేశించింది. ఈ ఆదేశాలపై ప్రభుత్వం సుప్రీంకోర్టును ఆశ్రయించగా.. గత నెల 26న స్టే విధించింది. సస్పెన్షన్‌కు అనుమతించిన సమయంలో ఆయనకు చార్జి మెమో ఎందుకివ్వలేదని రాష్ట్రప్రభుత్వాన్ని ప్రశ్నించింది.
Updated Date - 2020-12-19T08:04:46+05:30 IST