రెండో పంటకు నీరిస్తారా?
ABN, First Publish Date - 2020-03-24T07:18:00+05:30
సోమశిల జలాశయం పరిధిలోని ఉత్తర కాలువకు ఈసారైనా రెండో పంటకు నీరు ఇస్తారా అన్న సందేహాలు
ఉత్తర కాలువ రైతుల ఆశలు
యంత్రాంగం నుంచి స్పష్టత కరువు
పూర్తిస్థాయిలో కాని ఆధునికీకరణ పనులు
అనంతసాగరం, మార్చి 23: సోమశిల జలాశయం పరిధిలోని ఉత్తర కాలువకు ఈసారైనా రెండో పంటకు నీరు ఇస్తారా అన్న సందేహాలు రైతులు వ్యక్తం చేస్తున్నారు. ఇందుకు సంబంధించి యంత్రాంగం నుంచి స్పష్టత కరువైంది. సోమశిల జలాశయం మొదటి పంటకు ముందు పూర్తి సామర్థ్యానికి చేరుకుంది. ఈ క్రమంలో అధికారికంగా, అనధికారికంగా జిల్లా వ్యాప్తంగా సుమారు ఆరు లక్షల ఎకరాలకు పైగా వరి పంట సాగైంది. ప్రస్తుతం వరికోత పనులు చివరి దశలో ఉన్నాయి. ఈ నెలాఖరు వరకు సోమశిల నుంచి నీరు ఇచ్చి నిలుపుదల చేయాలని అధికారులు భావిస్తున్నారు. మొదటిపంటకు నీటి ఇబ్బందులు లేకుండా పంట చేతికందింది. ఈ క్రమంలో రెండో పంటకు సంబంధించిన ఆంశంపై ఐఏబీ నిర్వహించి సోమశిల జలాశయంలో తాగునీరు, డెడ్‌ స్టోరేజి నీటిని మినహాయించి నీటి కేటాయింపులు చేపట్టనున్నారు. ఈ నేపథ్యంలో ఈసారైనా రెండో పంట లో నాన్‌డెల్టా ఉత్తర కాలువకు నీరు ఇస్తారా, లేదా అన్న సందేహాలు ఉత్పన్నమవుతున్నాయి.
ఏటా అభివృద్ధి పనులు
ఉత్తర కాలువ ప్రకాశం జిల్లా రాళ్లపాడు వరకు విస్తరించి ఉంది. ఈ కాలువ సామర్థ్యం తొలుత 380 క్యూసెక్కులు కాగా కాలువను ఆధునికీకరించి కాలువ సామర్థ్యం పెంచేలా యంత్రాంగం చర్యలు చేపట్టింది. ఈ క్రమంలో 2010 నుంచి కాలువ ఆధునికీ కరణ పనులు రెండో పంట సమయంలో చేపడుతున్నారు. కాలువలో నేడు 700 క్యూస్కెక్కుల వరకు నీటి ప్రవాహనికి అనుకూలత ఏర్పడింది. అయితే కాలువ పరిధిలో ఇంకా పుర్తిస్థాయిలో పనులు చేయాల్సి ఉంది. ఈ క్రమంలో ఈ ఏడాది నీరు ఇస్తారా, పనులు పూర్తి చేస్తారా అన్న అంశాలపై రైతుల్లో సందిగ్దం నెలకొంది.
జలాశయంలో పుష్కలంగా నీరు
సోమశిల జలాశయంలో తాగునీటి అవసరాలను మినహాయించినా నీరు పుష్కలంగా ఉంది. ప్రస్తుతం జలాశయంలో 47.464 టీఎంసీల నిల్వ ఉంది. ఈ క్రమంలో ఉత్తర కాలువ పరిధిలో రెండో పంటకు 3.5 టీఎంసీలు కేటాయించినా సుమారు 35 వేల ఎకరాలు సాగు చేసుకునే వీలు కలుగుతుంది. ఆ దిశగా నీరు ఇస్తే బాగుంటుందని రైతులు ఆశిస్తున్నారు.
Updated Date - 2020-03-24T07:18:00+05:30 IST