పట్టణ ప్రాంతాల్లో 691 అనధికార లేఅవుట్లు
ABN, First Publish Date - 2020-10-22T09:35:27+05:30
రాష్ట్రంలోని పట్టణ ప్రాంతాల్లో 691 అనధికార లేఅవుట్లు ఉన్నాయని పట్టణ ప్రణాళికా విభాగం పరిశీలనలో నిర్ధారణ అయింది. పట్టణ స్థానిక
అక్రమ నిర్మాణాల సంఖ్య 20,745గా నిర్ధారణ
వాటి సర్టిఫికెట్లు సమర్పించండి: డీటీసీపీ
అమరావతి, అక్టోబరు 21(ఆంధ్రజ్యోతి): రాష్ట్రంలోని పట్టణ ప్రాంతాల్లో 691 అనధికార లేఅవుట్లు ఉన్నాయని పట్టణ ప్రణాళికా విభాగం పరిశీలనలో నిర్ధారణ అయింది. పట్టణ స్థానిక సంస్థలు, పట్టణాభివృద్ధి సంస్థల్లో అక్రమ నిర్మాణాలు, అనధికార వెంచర్లను గుర్తించేందుకు ప్రభుత్వం ఇచ్చిన 15రోజుల గడువు సోమవారంతో ముగియగా, అప్పటికి 691 అక్రమ లేఅవుట్లు ఉన్నాయని అధికారులు గుర్తించారు. నిబంధనలు ఉల్లంఘించిన నిర్మాణాల సంఖ్య 20,745గా తేలింది. ఈ కట్టడాలు, లేఅవుట్లను ఆన్‌లైన్‌లో నమోదు చేసిన వార్డు ప్రణాళిక, క్రమబద్ధీకరణ కార్యదర్శులు తమ పరిధిలో గుర్తించిన వాటి వివరాలతో సర్టిఫికెట్లు వెంటనే సమర్పించాలని డీటీసీపీ వి.రాముడు ఆదేశించారు. గత 15రోజుల్లో గుర్తించి, ఆన్‌లైన్‌లో నమోదు చేసినవి కాకుండా తమ పరిధిలో మరే ఇతర అక్రమ నిర్మాణాలు, అనధికార వెంచర్లు లేవని వాటిల్లో పేర్కొనాలన్నారు. ఈ సర్టిఫికెట్లను యూఎల్‌బీల టౌన్‌ప్లానింగ్‌ అధికారులు, మున్సిపల్‌ కమిషనర్లు, ఉడాల్లో వైస్‌ ఛైర్మన్లు, ఏఎంఆర్డీయే, వీఎంఆర్డీయేల్లో ఆయా మెట్రోపాలిటన్‌ కమిషనర్లు నిర్ధారించి, మంగళవారమే తమకు ఆన్‌లైన్‌ ద్వారా పంపాలని కోరారు.
Updated Date - 2020-10-22T09:35:27+05:30 IST