మరో జీవితకాల కనిష్ఠానికి Rupee.. నష్టాలబాటలో Stock markets
ABN, First Publish Date - 2022-05-13T00:02:36+05:30
ముంబై : మరో జీవితకాల కనిష్ఠానికి దేశీయ కరెన్సీ రూపాయి క్షీణించింది. గురువారం డాలర్‌ మారకంలో 77.63 స్థాయికి రూపాయి దిగజారింది.
ముంబై : దేశీయ కరెన్సీ రూపాయి మరో జీవితకాల కనిష్ఠానికి క్షీణించింది. గురువారం డాలర్‌‌పై మారకంలో 77.63 స్థాయికి రూపాయి దిగజారింది. అయితే చివరకు కాస్తంత కోలుకుని 77.5025 వద్ద ముగిసింది. ఈ వారంలో ఇది రెండవ అత్యుల్పం కావడం విశేషం. దేశీయ మార్కెట్ల నుంచి పెట్టుబడుల ఉపసంహరణకు ఫారెన్ ఇన్వెస్టర్లు మొగ్గుచూపుతుండడం ఇందుకు ప్రధాన కారణమవుతోంది.
కాగా దేశీయ మార్కెట్లు వరుసగా ఐదవ రోజు గురువారం కూడా తీవ్ర నష్టాలతో ముగిశాయి. బీఎస్ఈ సెన్సెక్స్ 1158 పాయింట్లు లేదా 2.14 శాతం క్షీణించి 52,930.31 పాయింట్ల వద్ద ముగిసింది. ఇక ఎన్‌ఎస్‌ఈ నిఫ్టీ 359 పాయింట్లు లేదా 2.22 శాతం నష్టపోయి 15,808 పాయింట్ల వద్ద ముగిసింది. కాగా దేశీయ సూచీలకు ఇది 2 నెలల కనిష్ఠానికి దిగజారినట్టయింది. రిలయన్స్ ఇండస్ట్రీస్, హెచ్‌డీఎఫ్‌సీ, బజాజ్ ఫైనాన్స్, బజాజ్ ఫిన్‌సర్వ్ షేర్లు 2-3 శాతం వరకు దిగజారాయి. నిఫ్టీ50 పతనంలో ఈ షేర్ల భాగస్వామ్యం అధికంగా ఉంది. కాగా అత్యధికంగా అదానీ పోర్ట్స్ 6 శాతం వరకు క్షీణించింది. గ్లోబల్ మార్కెట్ల సంకేతాలు ప్రతికూలంగా ఉండడంతోపాటు దేశీయంగా ద్రవ్యోల్బణానికి సంబంధించిన డేటాపై మదుపర్లు దృష్టిసారించడం మార్కెట్ల పతనానికి కారణమైంది.