మాజీ మంత్రి కేటీఆర్‌పై కేసు నమోదు.. అసలు విషయమిదే..

హనుమకొండ, మే 7 (ఆంధ్రజ్యోతి): బీఆర్ఎస్ వర్కింగ్ ప్రెసిడెంట్, మాజీ మంత్రి కల్వకుంట్ల తారక రామారావుపై (KTR) సుబేదారి పోలీసు స్టేషన్‌లో కేసు నమోదైంది. హనుమకొండలో నిన్న(బుధవారం) ‘రైతు సంగ్రామ సదస్సు’ను బీఆర్ఎస్ నేతలు నిర్వహించారు. ఈ సదస్సు వేదికగా కాంగ్రెస్ అగ్రనేత రాహుల్ గాంధీ, తెలంగాణ ముఖ్యమంత్రి ఎ. రేవంత్‌రెడ్డిపై అనుచిత వ్యాఖ్యలు చేశారనే ఆరోపణలతో కేటీఆర్‌పై పోలీసులు కేసు నమోదు చేశారు. రైతు సదస్సులో ప్రసంగిస్తూ కేటీఆర్ చేసిన కొన్ని వ్యాఖ్యలు అభ్యంతరకరంగా, శాంతిభద్రతలకు విఘాతం కలిగించేలా ఉన్నాయని కాంగ్రెస్ నాయకులు ఫిర్యాదు చేశారు. ముఖ్యంగా రాహుల్ గాంధీ, రేవంత్‌రెడ్డిలపై వ్యక్తిగత విమర్శలు చేయడం, ప్రభుత్వ విధానాలను విమర్శించే క్రమంలో ఉపయోగించిన పదజాలం అనుచితంగా ఉందని కాంగ్రెస్ నేతలు ఫిర్యాదులో పేర్కొన్నారు.

పోలీసుల చర్యలు..

కాంగ్రెస్ నేతల ఫిర్యాదును స్వీకరించిన సుబేదారి పోలీసులు ప్రాథమిక విచారణ అనంతరం కేటీఆర్‌పై కింది సెక్షన్ల ప్రకారం కేసు నమోదు చేశారు.

సెక్షన్ 504: ఉద్దేశపూర్వకంగా అవమానించడం ద్వారా శాంతిభద్రతలకు భంగం కలిగించడం.

సెక్షన్ 505: ప్రజల్లో అశాంతిని లేదా అలజడిని సృష్టించేలా ప్రకటనలు చేయడంపై కేసు నమోదు చేశారు. ఈ కేసు నమోదు కావడంతో హనుమకొండ, వరంగల్ పరిధిలో రాజకీయ వాతావరణం వేడెక్కింది. రాజకీయ కక్ష సాధింపులో భాగంగానే ఈ కేసులు పెడుతున్నారని బీఆర్ఎస్ శ్రేణులు ఆరోపిస్తుండగా, స్థాయికి తగ్గట్టుగా మాట్లాడకపోతే చట్టపరమైన చర్యలు తప్పవని కాంగ్రెస్ నేతలు హెచ్చరిస్తున్నారు. పోలీసులు కాంగ్రెస్ నేతల ఫిర్యాదుపై మరింత సమగ్రంగా దర్యాప్తు చేసి, తదుపరి చర్యలు తీసుకోనున్నట్లు సమాచారం.

ఈ వార్తలు కూడా చదవండి...

మహిళల భద్రతపై కమిషనర్ సుమతి స్పెషల్ ఫోకస్

హైదరాబాద్‌లో బెంగాల్ నటికి వేధింపులు.. నిందితుడికి 7 రోజుల జైలు శిక్ష

బయో టెర్రర్ కుట్రపై ఎన్ఐఏ ఛార్జ్‌షీట్..

Read Latest Telangana News And AP News And International News And Telugu News