ఏపీ మీదుగా మరో వందేభారత్‌ స్లీపర్‌‌.. హాల్ట్స్ ఇవే?

ఇంటర్నట్ డెస్క్: సౌకర్యవంతమైన రైలు ప్రయాణాన్ని అందించేందుకు వందేభారత్‌ స్లీపర్‌ సేవలు మరో మార్గంలో అందుబాటులోకి రానున్నాయి. సుదూర ప్రాంతాలకు పయనించే వారికోసం.. ముంబై-బెంగళూరు మధ్య రెండో వందేభారత్‌ స్లీపర్‌ రైలును నడిపేందుకు రైల్వే బోర్డు ఆమోదం తెలిపింది. దసరా నాటికి ఈ రైలు సేవలు ప్రారంభమయ్యే అవకాశమున్నట్టు తెలుస్తోంది. అయితే ప్రారంభ తేదీ వివరాలపై ఇంకా అధికారిక ప్రకటన రావాల్సి ఉంది.

ఈ రైలు వారంలో 6 రోజులు ప్రయాణికులకు అందుబాటులో ఉంటుంది. బెంగళూరు నుంచి సోమవారం, ముంబై నుంచి మంగళవారం రైలు సేవలు ఉండవు. బెంగళూరులో రోజూ రాత్రి 10 గంటలకు బయల్దేరి మరుసటి రోజు మధ్యాహ్నం 1:50 గంటలకు ముంబైకి చేరుకుంటుంది. తిరుగు ప్రయాణంలో భాగంగా ముంబైలో రాత్రి 10:30 గంటలకు స్టార్ట్ అయి, మర్నాడు మధ్యాహ్నం 2:50 గంటలకు బెంగళూరు చేరుతుంది.

ఏపీలో రెండు స్టేషన్లలో హాల్ట్‌

ముంబై-బెంగళూరు మార్గంలో నడిచే ఈ స్లీపర్‌ ట్రైన్.. ఆంధ్రప్రదేశ్‌లోని అనంతపురం, గుంతకల్లు స్టేషన్లలో ఆగనుంది. ఆ తర్వాత.. రాయచూర్‌, కాలబురగి, సోలాపూర్‌, పుణె, కల్యాణ్‌ స్టేషన్లలోనూ హాల్ట్‌ ఉంటుంది. ప్రస్తుతం ఈ రెండు నగరాల మధ్య నడిచే ఉద్యాన్‌ ఎక్స్‌ప్రెస్‌కు దాదాపు 22 గంటల సమయం పడుతుండగా.. కొత్తగా రానున్న వందేభారత్‌ స్లీపర్‌తో కేవలం 16 గంటలతో ప్రయాణ నిడివి గణనీయంగా తగ్గనుంది.

ఇవీ చదవండి:

‘ఫ్లైయింగ్‌ అతడికి భార్య లాంటిది’.. స్మిత్ సాహసంపై తండ్రి భావోద్వేగ స్పందన

నమో భారత్ ప్రయాణికులకు గుడ్ న్యూస్.. ట్రిప్ పాస్‌తో 10 శాతం వరకు డిస్కౌంట్