ఎల్‌నినో వేళ రైతులకు చామంతి కొత్త దారి..

• ఎల్‌నినో వేళ రైతుకు..చామంతి కొత్త దారి!

• తక్కువ నీటితో అధిక ఆదాయం

• వాతావరణ మార్పులకు.. ప్రత్యామ్నాయం

• శాస్త్రీయ పద్ధతులు పాటిస్తే మంచి దిగుబడి

• చామంతికి మార్కెట్లో భలే డిమాండ్‌

• ప్రస్తుతం కేజీ రూ.200 చొప్పున విక్రయం

కంది(సంగారెడ్డి): వాతావరణ మార్పులు.. పెరుగుతున్న ఉష్ణోగ్రతలు.. నీటి కొరతతో రైతులు ప్రత్యామ్నాయ పంటల వైపు దృష్టి సారిస్తున్నారు. ఎల్‌నినో వంటి వాతావరణ పరిస్థితుల ప్రభావంతో సంప్రదాయ పంటల్లో పెట్టుబడులు పెరిగి, దిగుబడులు తగ్గే పరిస్థితులు ఏర్పడుతున్న నేపథ్యంలో చామంతి పూల సాగు రైతులకు మరో మార్గంగా నిలుస్తోంది. తగిన నేల, నీటి వసతి ఉన్న ప్రాంతాల్లో శాస్త్రీయ పద్ధతులు పాటిస్తూ చామంతి సాగు చేస్తే మంచి దిగుబడితోపాటు మార్కెట్‌లో గిట్టుబాటు ధర పొందే అవకాశం ఉంది. సాధారణంగా వరి, పత్తి, మొక్కజొన్న, కూరగాయలు సాగుచేసే రైతులు కొంత భూమిని పూల పంటలకు కేటాయించడం ద్వారా ఆదాయ మార్గాలను విస్తరించుకోవచ్చని ఉద్యానవనశాఖ అధికారులు చెబుతున్నారు.

చామంతి సాగులో నాణ్యమైన నాట్ల పదార్థం ఎంపిక, నేల తయారీ, సేంద్రియ ఎరువుల వినియోగం, సకాలంలో కలుపు నివారణ, నీటి యాజమాన్యం, తెగుళ్ల నియంత్రణ కీలకం. పంట కాలంలో పూలను దశలవారీగా కోసుకునే అవకాశం ఉండటం రైతుకు కొంతకాలం నిరంతర ఆదాయాన్ని అందిస్తుంది. చామంతికి పండుగలు, శుభకార్యాలు, ఆలయాలు, అలంకరణ కార్యక్రమాల్లో ఏడాది పొడవునా డిమాండ్‌ ఉంటుంది. ముఖ్యంగా పసుపు, తెలుపు రంగు చామంతి రకాలకు స్థానిక మార్కెట్లలో మంచి గిరాకీ ఉంటుంది. చామంతికి కిలో రూ.150 నుంచి రూ.200 వరకు టోకు ధర లభిస్తున్నట్లు రైతులు చెబుతున్నారు

తక్కువ నీటితోనే..

చామంతి పంటకు నీరు అవసరమే అయినా.. ఇతర కొన్ని పంటలతో పోలిస్తే నీటి యాజమాన్యాన్ని సమర్థవంతంగా నిర్వహించుకునే అవకాశం ఉంది. నీటి పారుదల సౌకర్యం ఉన్న నేలల్లో పంటను సాగు చేయాలి. నీరు నిల్వ ఉండకుండా కాలువలు ఏర్పాటు చేసుకోవాలి. ఎల్‌నినో పరిస్థితుల్లో నీటి కొరత ఏర్పడే అవకాశం ఉన్నందున బిందు సేద్యం వంటి నీటి పొదుపు పద్ధతులను అవలంబిస్తే ప్రయోజనం ఉంటుంది. చిన్న, సన్నకారు రైతులు మొత్తం భూమిలో చామంతినే సాగు చేయకుండా కొంత విస్తీర్ణంలో ప్రయోగాత్మకంగా చేపట్టడం ద్వారా మార్కెట్‌ పరిస్థితులను అంచనా వేసుకోవచ్చు. సమీప పట్టణాలు, పూల మార్కెట్లు, పుష్ప వ్యాపారులు, ఆలయాలు, పూల అలంకరణ నిర్వాహకులతో ముందుగానే సంబంధాలు ఏర్పాటు చేసుకుంటే విక్రయ సమస్యలను కొంతవరకు అధిగమించవచ్చు.

ఒండ్రు నేలలు అనుకూలం..

చామంతి సాగుకు నీటి పారుదల సౌకర్యం ఉన్న ఒండ్రు నేలలు అనుకూలంగా ఉంటాయి. నాటడానికి ముందు ఎకరాకు సుమారు 10 టన్నుల పశువుల ఎరువును వేసి, అవసరానికి అనుగుణంగా నత్రజని, భాస్వరం, పొటాష్‌ ఎరువులను అందించాలి. మొక్కలు నాటిన 25-30 రోజులకు పైచిగురును కత్తిరించడం ద్వారా పక్క కొమ్మలు అధికంగా వచ్చేలా చేయవచ్చు. దీంతో పూల సంఖ్య పెరుగుతుంది. మొక్కలకు తగినంత తేమ ఉండేలా నీరు అందించాలి. అయితే మొదళ్ల వద్ద నీరు నిల్వ ఉండకుండా జాగ్రత్తలు తీసుకోవాలి. నాటిన మూడు నుంచి నాలుగునెలల్లో చామంతి పూల కోత ప్రారంభమవుతుంది. పూలను ఉదయం లేదా సాయంత్రం వేళల్లో కోసి మార్కెట్‌కు తరలిస్తే నాణ్యతను కాపాడుకోవచ్చని రైతులు చెబుతున్నారు. పంట సాగుకు ముందే మార్కెట్‌ పరిస్థితులు, ధరలు, స్థానికంగా ఉండే డిమాండ్‌ను పరిశీలించి రకాన్ని ఎంపిక చేసుకోవడం కీలకమని ఉద్యానశాఖ అధికారులు సూచిస్తున్నారు.

మార్కెట్‌లో భలే డిమాండ్‌

పూలకు డిమాండ్‌ ఉన్న సమయంలో మార్కెట్‌కు తీసుకెళ్లగలిగితే ఆదాయం మెరుగ్గా ఉంటుంది. ముందుగానే మార్కెట్‌ ధరలను తెలుసుకుని సాగు చేయడం మంచిది. వాతావరణ పరిస్థితులు మారుతున్న సమయంలో ఒకే పంటపై ఆధారపడటం కష్టంగా మారుతోంది. అందుకే కొంత భూమిలో చామంతి సాగుచేస్తే అదనపు ఆదాయం పొందే అవకాశం ఉంటుంది. పంట కోత దశలో మంచి ధర వస్తే పెట్టుబడికి తగిన లాభం వస్తుంది. అయితే సాగుకు ముందే మార్కెట్‌ను పరిశీలించి, నీటి వసతిని బట్టి విస్తీర్ణాన్ని నిర్ణయించుకోవాలి.

• కాల్వ పుల్లారెడ్డి, రైతు, ఎద్దుమైలారం

తక్కువ నీటితో ఎక్కువ ఆదాయం

చామంతి సాగులో నేల ఎంపిక, నాణ్యమైన నాట్ల పదార్థం, ఎరువుల యాజమాన్యం, నీటి నిర్వహణ, కొమ్మల కత్తిరింపు కీలకం. అధికంగా నీరు పెట్టకుండా జాగ్రత్తలు తీసుకోవాలి. మొక్కల పెరుగుదల దశలో అవసరమైన కాంతి అందేలా చర్యలు తీసుకుంటే మంచి ఫలితాలు సాధించవచ్చు. రైతులు సాగుకు ముందే మార్కెట్‌ డిమాండ్‌ను పరిశీలించి, ఉద్యానశాఖ అధికారుల సూచనలు తీసుకోవాలి. వాతావరణ మార్పుల నేపథ్యంలో రైతులు పంటల వైవిధ్యంపై దృష్టిపెట్టాలి. ముఖ్యంగా నీటి కొరత ఉన్న ప్రాంతాల్లో అందుబాటులో ఉన్న నీటిని పొదుపుగా వినియోగించే పద్ధతులను పాటించాలి. మార్కెట్‌ డిమాండ్‌ను తెలుసుకుని సాగు చేస్తే రైతులు మెరుగైన ఆదాయం పొందే అవకాశం ఉంటుంది.

• అనూష, ఉద్యానవనశాఖ అధికారి

ఈ వార్తలు కూడా చదవండి:

స్వల్పంగా పెరిగిన బంగారం ధరలు.. ఈ రోజు మీ నగరంలో పసిడి ధరలు ఎలా ఉన్నాయంటే..

శ్రీవారి సర్వదర్శనానికి 10 గంటలు

Read Latest AP News And Telangana News And International News And Telugu News