గాంధీజీ, లాల్ బహదూర్ శాస్త్రి చూపిన మార్గంలో నడుద్దాం: సీఎం చంద్రబాబు, డిప్యూటీ సీఎం పవన్

అమరావతి, అక్టోబరు 2 (ఆంధ్రజ్యోతి): జాతిపిత మహాత్మా గాంధీ, భారతరత్న లాల్ బహదూర్ శాస్త్రి జయంతి నేడు. ఈ సందర్భంగా ఆంధ్రప్రదేశ్ ముఖ్యమంత్రి నారా చంద్రబాబు నాయుడు, డిప్యూటీ సీఎం పవన్ కల్యాణ్ ఘన నివాళులు అర్పించారు. ఈ సందర్భంగా ఎక్స్ వేదికగా వారు పోస్టు పెట్టారు.

గాంధీ ఆదర్శాలు నేటికీ మనకు మార్గదర్శకం: సీఎం చంద్రబాబు

జాతిపిత మహాత్మా గాంధీ 157వ జయంతి సందర్భంగా, ఆ మహనీయునికి నా వినయపూర్వక నివాళులు అర్పిస్తున్నానని సీఎం చంద్రబాబు తెలిపారు. ‘సత్యం, అహింస, పరిశుభ్రత, గ్రామ స్వయం పరిపాలన వంటి గాంధీ ఆదర్శాలు నేటికీ మనకు మార్గదర్శకంగా నిలుస్తున్నాయి. దేశ స్వాతంత్య్రం కోసం ఆయన చేసిన త్యాగాలు, ప్రజలను ఏకం చేసి నడిపించిన తీరు శాశ్వతంగా స్మరణీయం. గాంధీజీ కలలు కన్న స్వచ్ఛమైన, స్వయం సమృద్ధిగల, పేదరిక రహిత సమాజాన్ని నిర్మించేందుకు మనమందరం కృషి చేద్దాం. భారతదేశ నిర్మాణంలో భాగంగా, అభివృద్ధి చెందిన భారతదేశం, స్వర్ణాంధ్ర కోసం గాంధీజీ చూపిన మార్గంలో నడుద్దాం’ అని సీఎం చంద్రబాబు పిలుపునిచ్చారు.

లాల్ బహదూర్ శాస్త్రి నిరాడంబరతకు ప్రతీక: సీఎం చంద్రబాబు

భారతరత్న లాల్ బహదూర్ శాస్త్రి జయంతి సందర్భంగా సీఎం చంద్రబాబు నివాళి అర్పించారు. ‘స్వతంత్ర భారతదేశపు రెండో ప్రధానమంత్రి, భారతరత్న లాల్ బహదూర్ శాస్త్రి 122వ జయంతి సందర్భంగా నివాళులు అర్పిస్తున్నాను. ఆయన నిరాడంబరతకు ప్రతీక, దేశభక్తి, నిజాయితీకి ఒక ప్రకాశవంతమైన ఉదాహరణ’ అని సీఎం చంద్రబాబు పేర్కొన్నారు.

మహాత్మా గాంధీ ఆదర్శాలను ముందుకు తీసుకెళ్దాం: పవన్ కల్యాణ్

మహాత్మా గాంధీ జయంతి సందర్భంగా ఆ మహనీయుని సేవలను స్మరిస్తూ నివాళులు అర్పిస్తున్నానని ఏపీ డిప్యూటీ సీఎం పవన్ కల్యాణ్ పేర్కొన్నారు. ‘ప్రపంచంలో మీరు చూడాలనుకుంటున్న మార్పు మీరే అవ్వండి. గాంధీ జయంతి సందర్భంగా, సత్యం, అహింస, నిస్వార్థ సేవ పట్ల అచంచలమైన విశ్వాసంతో ఒక జాతికి స్ఫూర్తినిచ్చి, తరతరాలకు స్ఫూర్తినిస్తూనే ఉన్న మహాత్మా గాంధీజీకి నివాళులు అర్పిస్తున్నాను. గ్రామ స్వరాజ్యంపై ఆయనకున్న దార్శనికత, భారత్ బలం అట్టడుగు స్థాయి నుండే మొదలవుతుందని మనకు గుర్తు చేస్తుంది. మన గ్రామాలను బలోపేతం చేయడం, సమాజాలకు సాధికారత కల్పించడం, స్వావలంబనను ప్రోత్సహించడం ద్వారా మనం మరింత బలమైన, సుసంపన్నమైన భారత్‌ను నిర్మించగలం. మన చేతల ద్వారా, మన పనుల ద్వారా, సమాజ సేవ ద్వారా ఆయన ఆదర్శాలను ముందుకు తీసుకువెళ్దాం’ అని పవన్ కల్యాణ్ పేర్కొన్నారు.

ఈ వార్తలు కూడా చదవండి..

స్వర్ణాంధ్ర విజన్ - 2047 లక్ష్యంగా ఏపీ ముందుకెళ్తుంది: గవర్నర్ కంభంపాటి

రైతు బజార్లలో కిలో ఉల్లి రూ.35.. ఒక్కో కార్డుదారుడికి 2 కిలోల పంపిణీ: మంత్రి నాదెండ్ల

ఒలింపిక్‌లో మెడల్ సాధించేలా ఏపీ క్రీడాకారులను ప్రోత్సహిస్తాం: మంత్రి కొల్లు రవీంద్ర

Read Latest AP News And Telangana News And National News

And Telugu News