తిరుపతిలో అడ్మిషన్ పేరుతో ఆన్‌లైన్ మోసం

తిరుపతి, జనవరి23(ఆంధ్రజ్యోతి): విదేశాల్లో ఉన్నత విద్య ఆశతో ప్రయత్నించిన ఓ మహిళ సైబర్ నేరగాళ్ల మోసానికి బలైంది. యూఎస్‌లో ఎంఎస్ అడ్మిషన్ (Admission Scam) ఇప్పిస్తామంటూ నమ్మించి, వివిధ బ్యాంకు ఖాతాల ద్వారా ఆమె నుంచి రూ.5,65,841 నగదును కాజేశారు.

ఏమైందంటే..

తిరుపతి రూరల్ సీఐ చిన్న గోవిందు వివరాల ప్రకారం.. బాధిత మహిళ యూఎస్‌లో ఎంఎస్ అడ్మిషన్ కోసం ఆన్‌లైన్‌లో ప్రయత్నిస్తున్న సమయంలో ఇన్‌స్టాగ్రామ్‌లో వచ్చిన ఓ ప్రకటనను చూసింది. ఆ ప్రకటన ద్వారా పరిచయమైన వ్యక్తులు తమను అడ్మిషన్ కోఆర్డినేటర్లుగా పరిచయం చేసుకున్నారు. వారు తమ పేర్లు మెహర్, నితీశ్, షేక్ సోనాగా చెప్పుకున్నారని బాధితురాలు ఫిర్యాదులో పేర్కొన్నారు. ఎంఎస్ అడ్మిషన్ ఖచ్చితంగా వస్తుందని, త్వరలోనే క్లాసులు ప్రారంభమవుతాయని నమ్మించిన సైబర్ నేరగాళ్లు, వివిధ కారణాలు చెబుతూ వివిధ అకౌంట్లకు డబ్బులు జమ చేయించారు. ఇలా విడివిడిగా మొత్తం రూ.5,65,841 వసూలు చేశారు.

అనుమానం వచ్చిందిలా..

కాగా, చెప్పిన తేదీలకు క్లాసులు ప్రారంభం కాకపోవడంతో బాధిత మహిళకు అనుమానం వచ్చింది. వెంటనే ఆమె సంబంధిత యూనివర్సిటీ అధికారులను సంప్రదించగా, తనకు ఎలాంటి అడ్మిషన్ లేదని స్పష్టత వచ్చింది. దీంతో తాను మోసపోయినట్లు గ్రహించిన మహిళ, తిరుపతి రూరల్ పోలీసులను ఆశ్రయించింది.

పోలీసుల చర్యలు..

బాధిత మహిళ ఫిర్యాదు మేరకు తిరుపతి రూరల్ పోలీసులు కేసు నమోదు చేశారు. ఈ ఘటనపై తిరుపతి రూరల్ సీఐ చిన్న గోవిందు దర్యాప్తు చేపట్టారు. సైబర్ నేరగాళ్లను గుర్తించి, న్యాయపరమైన చర్యలు తీసుకుంటామని వెల్లడించారు. సైబర్ నేరగాళ్ల అకౌంట్లను, ఐపీ అడ్రస్‌లను ట్రాక్ చేసే పనిలో పోలీసులు ఉన్నారు.

పోలీసుల హెచ్చరిక..

విదేశీ విద్య, ఉద్యోగాలు, వీసాలు, అడ్మిషన్ల పేరుతో వస్తున్న ఆన్‌లైన్ ప్రకటనలను నమ్మొద్దని పోలీసులు హెచ్చరించారు. ముఖ్యంగా సోషల్ మీడియా ప్రకటనల విషయంలో అప్రమత్తంగా ఉండాలని, అనుమానం వచ్చిన వెంటనే అధికారిక వెబ్‌సైట్లను లేదా పోలీసులను సంప్రదించాలని సూచించారు.సోషల్ మీడియా ప్రకటనలు, ఫేస్‌బుక్, ఇన్‌స్టాగ్రామ్‌లో కనిపించే కన్సల్టెన్సీ ప్రకటనలను గుడ్డిగా నమ్మవద్దని సూచించారు.

యూనివర్సిటీ అడ్మిషన్ల కోసం నేరుగా ఆయా వెబ్‌సైట్ల ద్వారానే సంప్రదించాలని విజ్ఞప్తి చేశారు. గుర్తుతెలియని వ్యక్తులకు లేదా అనుమానాస్పద అకౌంట్లకు భారీ మొత్తంలో డబ్బు పంపే ముందు ఒకటికి రెండుసార్లు ఆలోచించాలని తిరుపతి రూరల్ పోలీసులు సూచించారు. తిరుపతిలో ఉన్నత చదువుల పేరుతో జరిగిన ఈ సైబర్ మోసం నిజంగా విచారకరమని, విదేశీ విద్య (MS) కోసం విద్యార్థులు పడే తపనను సైబర్ నేరగాళ్లు ఎలా సొమ్ము చేసుకుంటున్నారో ఈ ఘటన అద్దం పడుతోందని పలువురు చెబుతున్నారు.

ఈ వార్తలు కూడా చదవండి...

అమరావతిని ఫైనాన్స్ హబ్‌గా మారుస్తాం: సీఎం చంద్రబాబు

ట్రెండింగ్‌లో హ్యాపీ బర్త్‌డే మన లోకేశ్

Read Latest AP News And Telugu News