సర్పంచ్ కుటుంబంపై పెట్రోల్‌తో దాడి.. కుటుంబ సభ్యుల పరిస్థితి విషమం

వికారాబాద్ జిల్లా, మార్చి 24 (ఆంధ్రజ్యోతి): వికారాబాద్ జిల్లా పరిగి మండలంలోని రూప్‌సింగ్ తాండాలో దారుణ ఘటన వెలుగుచూసింది. ఆస్తి తగాదాలు, డబ్బుపై వ్యామోహం కన్న తండ్రిని, కుటుంబ సభ్యులను సజీవ దహనం చేసే స్థాయికి తీసుకెళ్లాయి. స్థానిక సర్పంచ్ రమణి భాయ్ కుటుంబంపై జరిగిన ఈ హత్యాయత్నం జిల్లావ్యాప్తంగా సంచలనం సృష్టించింది. ఈ ఘటనపై పరిగి పోలీసులు కేసు నమోదు చేసి దర్యాప్తు చేపట్టారు.

నిద్రలో ఉండగా పెట్రోల్‌తో దాడి..

పోలీసులు తెలిపిన వివరాల ప్రకారం.. సర్పంచ్ రమణి భాయ్ కుటుంబం ఈరోజు(మంగళవారం) తెల్లవారుజామున అందరూ గాఢ నిద్రలో ఉన్న సమయంలో ఈ ఘాతుకం జరిగింది. నిందితుడు అనార్ సింగ్ అత్యంత కిరాతకంగా పథకం రచించాడు. కుటుంబ సభ్యులు ఎవరూ బయటకు రాకుండా ఇంటి ప్రధాన తలుపుకు బయట నుంచి తాళం వేశాడు. ఇంటి పైకప్పుకున్న రంధ్రం (గవాసు) ద్వారా లోపలికి పెట్రోల్ పోసి నిప్పంటించాడు. మంటల్లో చిక్కుకున్న సర్పంచ్ రమణి భాయ్, ఆమె భర్త హన్మంత్ నాయక్, కుమారుడు వెంకటేశ్ తీవ్రంగా గాయపడ్డారు. మరో కుమారుడు శివకు స్వల్ప గాయాలయ్యాయి.

దాడికి గల కారణాలు..

ఈ దారుణానికి ప్రధాన కారణం కుటుంబ కలహాలు, ఆర్థిక వివాదాలని పోలీసులు ప్రాథమికంగా నిర్ధారించారు. హన్మంత్ నాయక్‌కు ఇద్దరు భార్యలు. మొదటి భార్య నాతిభాయ్ ఇటీవల మరణించారు. సర్పంచ్ రమణి భాయ్ రెండవ భార్య. మరణించిన నాతిభాయ్ పేరిట రూ.5 లక్షల రైతుబీమా మంజూరైంది. ఈ డబ్బుతో పాటు ఆస్తిలో వాటా కావాలని నాతిభాయ్ కుమారుడైన అనార్ సింగ్ తండ్రితో తరచూ గొడవ పడేవాడు. తండ్రి హన్మంత్ నాయక్ తన డిమాండ్లను పట్టించుకోకపోవడంతో కక్ష పెంచుకున్న అనార్ సింగ్, అడ్డుగా ఉన్న మొత్తం కుటుంబాన్ని అంతం చేయాలని నిర్ణయించుకున్నాడు.

పోలీసుల సహాయక చర్యలు..

మంటలు చెలరేగడం గమనించిన తాండా వాసులు వెంటనే స్పందించి పోలీసులకు సమాచారం అందించారు. గాయపడిన వారిని వెంటనే పరిగి ప్రభుత్వ ఆస్పత్రికి తరలించారు. పరిస్థితి విషమంగా ఉండటంతో బాధితుల నుంచి మేజిస్ట్రేట్ వాంగ్మూలాన్ని సేకరించారు.

పరారీలో నిందితుడు..

సర్పంచ్ రమణి భాయ్ కుటుంబ సభ్యుల పరిస్థితి అత్యంత విషమంగా ఉండటంతో హైదరాబాద్‌లోని ఒక ప్రైవేటు ఆస్పత్రికి తరలించి చికిత్స అందిస్తున్నారు. సర్పంచ్, ఆమె భర్త, కుమారుడు వెంకటేశ్‌ల పరిస్థితి ఇంకా ఆందోళనకరంగానే ఉంది. పరిగి పోలీసులు ఈ ఘటనపై కేసు నమోదు చేసుకుని దర్యాప్తు ప్రారంభించారు. పరారీలో ఉన్న నిందితుడు అనార్ సింగ్ కోసం గాలింపు చర్యలు చేపట్టారు. ఒకే కుటుంబానికి చెందిన నలుగురిని చంపాలని చూసిన నిందితుడిపై కఠిన చర్యలు తీసుకోవాలని తాండా వాసులు డిమాండ్ చేస్తున్నారు. బాధితులు త్వరగా కోలుకోవాలని, నిందితుడికి కఠిన శిక్ష పడాలని స్థానికులు కోరుకుంటున్నారు.

ఈ వార్తలు కూడా చదవండి..

విధి నిర్వహణలో మరణించిన కార్మికుల కుటుంబాలకు అండగా ఉంటాం: సీఎం రేవంత్‌రెడ్డి

ఘోర ప్రమాదం: మాగంటి గోపీనాథ్ కుమార్తెలకు గాయాలు.. ఒకరికి సీరియస్

బీజేపీ నేతలను అరెస్ట్ చేయడం అప్రజాస్వామిక చర్య.. సీఎంపై కిషన్‌రెడ్డి ధ్వజం

Read Latest Telangana News And AP News And International News And Telugu News