హైదరాబాద్‌లో ‘పిల్లి’ పంచాయితీ.. మొక్కల వ్యాపారిపై దొంగతనం ఆరోపణ.. పోలీసుల కౌన్సెలింగ్

హైదరాబాద్, ఏప్రిల్ 10 (ఆంధ్రజ్యోతి): హైదరాబాద్‌లోని లాలాగూడ పోలీస్ స్టేషన్ పరిధిలో ఒక పెంపుడు పిల్లి (Missing Cat Case) చుట్టూ హైడ్రామా జరిగింది. ఈ వ్యవహరం పోలీసులను సైతం విస్మయానికి గురిచేసింది. పిల్లి దొంగతనం ఆరోపణలు, బైక్ నంబర్ ఆధారంగా గాలింపు, చివరకు పోలీస్ స్టేషన్‌లో జరిగిన విచారణ ఒక సినిమా సీన్‌ను తలపించింది. పెంపుడు జంతువులపై ఉండే ప్రేమ ఒక్కోసారి పోలీసు స్టేషన్ మెట్లెక్కిస్తుంది. లాలాగూడలో ఒక ఖరీదైన పెంపుడు పిల్లి కనిపించకుండా పోవడంతో మొదలైన ఈ వివాదం, పోలీసుల జోక్యంతో ఒక కొలిక్కి వచ్చింది.

అసలేం జరిగిందంటే..?

లాలాగూడ పరిధిలో నివసించే ఓ మహిళ తన పెంపుడు పిల్లి అకస్మాత్తుగా కనిపించకపోవడంతో ఆందోళనకు గురైంది. వెంటనే పరిసరాల్లోని సీసీటీవీ ఫుటేజీని పరిశీలించగా, ఆ ప్రాంతంలో మొక్కలు అమ్ముకునే వ్యక్తి పిల్లిని పట్టుకోవడానికి ప్రయత్నించినట్లు కనిపించింది. మొక్కలు అమ్మే వ్యక్తి తన పిల్లిని దొంగిలించి ఎత్తుకెళ్లాడని, అతని బైక్ నంబర్ ఆధారంగా ఆమె పోలీసులకు ఫిర్యాదు చేసింది. ఫిర్యాదు అందుకున్న లాలాగూడ పోలీసులు బైక్ నంబర్ ఆధారంగా దర్యాప్తు చేసి, నిందితుడు చింతల్ ప్రాంతంలో ఉన్నట్లు గుర్తించి అతడిని స్టేషన్‌కు తీసుకొచ్చారు.

పోలీస్ స్టేషన్‌లో ఇరువురి వాదనలు..

లాలాగూడ సీఐ సమక్షంలో ఇద్దరినీ సుమారు అరగంట పాటు విచారించారు. ఈ క్రమంలో ఇద్దరి వాదనలు పోలీసులకు తలనొప్పిగా మారాయి.

మొక్కల వ్యాపారి వాదన: ‘నేను ఆ పిల్లిని ఎత్తుకెళ్లలేదు. అది నాకు కనిపించడంతో పట్టుకోవాలని చూశాను. కానీ అది నా చేతిని కరిచి అక్కడి నుంచి పారిపోయింది. అది ఎక్కడికి పోయిందో నాకు తెలియదు. పారిపోయిన పిల్లిని నేను ఎలా తెచ్చివ్వగలను?’ అని వాదించాడు.

యజమానురాలి డిమాండ్: ‘సీసీటీవీలో నువ్వు పిల్లిని పట్టుకున్నట్లు ఉంది. నా పిల్లిని నువ్వే ఎత్తుకెళ్లావు. దాన్ని నాకు తిరిగి తెచ్చివ్వాల్సిందే’ అని ఆమె పట్టుబట్టింది.

తలలు పట్టుకున్న పోలీసులు - క్లైమాక్స్..

ఒకరు పిల్లి కావాలని, మరొకరు పారిపోయిందని వాదించడంతో పోలీసులు ఏం చేయాలో పాలుపోక తలలు పట్టుకున్నారు. నిందితుడు కావాలనే పిల్లిని ఎత్తుకెళ్లే ప్రయత్నం చేశాడని భావించిన పోలీసులు అతడికి గట్టిగా వార్నింగ్ ఇచ్చారు.

క్షమాపణలు: చివరకు పరిస్థితి తీవ్రతను గమనించిన సదరు వ్యక్తి, తాను చేసిన తప్పుకు (పిల్లిని పట్టుకోవడానికి ప్రయత్నించడం) బాధితురాలికి క్షమాపణలు చెప్పాడు.

కౌన్సెలింగ్: ఇరువురి మధ్య రాజీ కుదిర్చి, భవిష్యత్తులో ఇలాంటి గొడవలకు పోవద్దని ఇద్దరికీ కౌన్సెలింగ్ ఇచ్చి పోలీసులు పంపించివేశారు. పెంపుడు జంతువుల విషయంలో యజమానులు ఎంత అప్రమత్తంగా ఉంటారో ఈ ఘటన మరోసారి నిరూపించింది. సీసీటీవీ కెమెరాలు ఉండటం వల్ల నిందితుడిని వెంటనే పట్టుకోవడం సాధ్యమైంది. పిల్లి దొరక్కపోయినా, యజమానురాలు తన ప్రయత్నం ఫలించిందని సరిపెట్టుకోవాల్సి వచ్చింది.

ఈ వార్తలు కూడా చదవండి...

పొంగులేటి అవినీతి చిట్టా బయటపెట్టింది మేమే.. హరీశ్‌రావు ఘాటు వ్యాఖ్యలు

కాంగ్రెస్ హయాంలో ఇష్టారాజ్యంగా కబ్జాలు చేస్తున్నారు: ఎంపీ రఘునందన్ రావు

విద్యార్థులకు గుడ్ న్యూస్.. మరో పథకానికి ప్రభుత్వం శ్రీకారం..!

Read Latest Telangana News And AP News And International News And Telugu News