నైనీ టెండర్ రద్దు చేశారంటే స్కాం జరిగినట్టే కదా.. భట్టికి హరీశ్‌రావు కౌంటర్

హైదరాబాద్, జనవరి24 (ఆంధ్రజ్యోతి): తెలంగాణ డిప్యూటీ సీఎం మల్లు భట్టి విక్రమార్కకు(Bhatti Vikramarka) మాజీ మంత్రి, సిద్దిపేట ఎమ్మెల్యే తన్నీరు హరీశ్‌రావు(Harish Rao) స్ట్రాంగ్ కౌంటర్ ఇచ్చారు. నైనీ టెండర్ రద్దు చేశారంటే.. స్కాం జరిగినట్టే కదా? అని ప్రశ్నిస్తూ.. ఎక్స్ వేదికగా ట్వీట్ చేశారాయన. సింగరేణి బొగ్గు, సోలార్ టెండర్ల వ్యవహారంపై భట్టి విక్రమార్క నిర్వహించిన ప్రెస్‌మీట్‌పై హరీశ్‌రావు స్పందించారు.

సోలార్ స్కాంపై మౌనమెందుకు.?

‘భట్టీ.. మసిబూసి మారేడుకాయ చేయకండి. సోలార్ స్కాంపై మీ మౌనం ఎందుకు? సీఎం రేవంత్‌రెడ్డి బావమరిది కోసమే ఈ తతంగమంతా నడిపిస్తున్నారు. బొగ్గు కుంభకోణంలో అవినీతి జరగలేదని సూటిగా చెప్పలేక.. అసలు విషయాలను పక్కదారి పట్టించే ప్రయత్నం చేశారు. నైనీ టెండర్ రద్దు చేయడమే అవినీతికి నిదర్శనం. అదే తరహాలో పిలిచిన మిగిలిన టెండర్లనూ ఎందుకు రద్దు చేయడం లేదు. బొగ్గు కుంభకోణంలో అవినీతి జరగలేదని చెప్పకుండా బీటింగ్ అరౌండ్ ద బుష్ లా ఏదో చెప్పి, మసిబూసి మారేడు కాయ చేశారు. మీరెన్ని సాకులు చెప్పినా మీ కాంగ్రెస్ పాలనలో బొగ్గు కుంభకోణం జరిగింది నిజం. అందులో రేవంత్ రెడ్డి బావమరిది రింగ్‌మెన్‌గా పాత్ర పోషించింది నిజం. నేను సూటిగా అడుగుతున్నా.. ఏ స్కాం జరగకపోతే నైనీ టెండర్లను రద్దు చేస్తున్నట్లు ఎందుకు ప్రకటించారు? నిన్న నేను బయటపెట్టిన మరో కుంభకోణం.. సోలార్ పవర్ స్కాం గురించి ఎందుకు ఒక్కమాట కూడా నేటి ప్రెస్ మీట్‌లో మాట్లాడలేదు’ అని హరీశ్‌రావు ప్రశ్నించారు.

అన్ని టెండర్లను రద్దు చేయలేదెందుకు?

‘నైనీని రద్దు చేసినట్లే మిగతా అన్ని టెండర్లను ఎందుకు రద్దు చేయడం లేదు? సైట్ విజిట్ సర్టిఫికెట్ నిబంధనను బీఆర్ఎస్ మీద నెట్టే ప్రయత్నం చేయడం వల్ల నిజాలు అబద్ధాలైపోవు. జరిగిన స్కాములు.. స్కీములుగా మారిపోవు. సైట్ విజిట్ నిబంధన 2018లోనే మొదలైందని చెప్పి, దానికి కేంద్ర ప్రభుత్వ సంస్థలను ఉదాహరణలుగా చెప్పి ఏం చెప్పదలుచుకున్నారు? అది తప్పు కాకపోతే.. నైనీని ఎందుకు రద్దు చేసినట్లు? ఇదే సైట్ విజిట్ విధానం సింగరేణిలోనూ అమలు చేశామని ఇప్పటికైనా ఒప్పుకున్నందుకు ధన్యవాదాలు. సైట్ విజిట్ అమలైంది, నైనీ రద్దు జరిగిందంటే.. స్కాం జరిగినట్లే కదా? భట్టీ.. మీరంటే నాకు చాలా గౌరవం. ముఖ్యమంత్రి స్థాయిలో ఉన్న వ్యక్తిపై విచారణ జరగాలంటే సిట్టింగ్ జడ్జి లేదా కేంద్ర ప్రభుత్వ సంస్థ అయిన సీబీఐ మాత్రమే చేయగలవన్న ఉద్దేశ్యంతోనే లేఖ రాశాను. మీరు నిజంగా రేవంత్‌రెడ్డి, అతని బావమరిది కుంభకోణం మీద నిష్పక్షపాతంగా విచారణ జరిపిస్తానని హామీ ఇస్తే మీకూ లేఖ రాయడానికి సిద్ధంగా ఉన్నా’ అని హరీశ్‌రావు స్పష్టం చేశారు.

ఈ వార్తలు కూడా చదవండి...

నాంపల్లి ఫర్నీచర్ గోదాంలో భారీ అగ్నిప్రమాదం

ఫోన్‌ట్యాపింగ్ కేసులో దోషులకు కఠిన శిక్షలు తప్పవు: మంత్రి జూపల్లి

Read Latest Telangana News And Telugu News