‘ఈ బౌలింగ్‌తో ప్రపంచకప్ గెలవడం అసాధ్యం’.. మహ్మద్ కైఫ్ సంచలన వ్యాఖ్యలు

ఇంటర్నెట్ డెస్క్: వెస్టిండీస్‌తో నాల్గో టీ20లో టీమ్‌ఇండియా 24 పరుగుల తేడాతో ఓటమి పాలైంది. ఈ పరాజయంపై భారత మాజీ క్రికెటర్‌ మహ్మద్‌ కైఫ్‌ తీవ్రంగా స్పందించాడు. ప్రస్తుత బౌలింగ్‌ కూర్పుతో ప్రపంచకప్‌ గెలవడం అసాధ్యమని అతడు వ్యాఖ్యానించాడు. జట్టులో సమష్టితత్వం కొరవడిందని.. ఓటమికి బ్యాటర్ల కంటే బౌలర్ల వైఫల్యమే ప్రధాన కారణమని అభిప్రాయపడ్డాడు.

బౌలర్లు సరైన లైన్‌ అండ్ లెంగ్త్‌లో బంతులు వేయడంలో విఫలమయ్యారని.. దీంతో ప్రత్యర్థి భారీ స్కోరు సాధించిందని కైఫ్‌ విశ్లేషించాడు. 5 మ్యాచ్‌ల సిరీస్‌లో సాధారణంగా బ్యాటర్లు మూడింట్లో విజయాలందిస్తే.. మిగిలిన మ్యాచ్‌ల్లో బౌలర్లు రాణించాల్సి ఉంటుందని పేర్కొన్నాడు. అయితే.. ఈ సిరీస్‌లో భారత బౌలర్లు మ్యాచ్‌లను గెలిపించలేకపోతున్నారని విమర్శించాడు. ఈ నేపథ్యంలో 2024లో భారత జట్టు సమష్టి ప్రదర్శనతో పొట్టి ప్రపంచకప్ దక్కించుకోవడాన్ని గుర్తుచేశాడు కైఫ్. జస్‌ప్రీత్‌ బుమ్రా, అక్షర్‌ పటేల్‌, కుల్దీప్‌ యాదవ్‌ వంటి బౌలర్లు కీలక పాత్ర పోషించారని తెలిపాడు. బ్యాటర్లంతా ప్రతీ మ్యాచ్‌లో రాణించలేరని.. అందుకే బౌలర్లు కూడా విజయాల్లో భాగస్వాములు కావాలని సూచించాడు.

ఇక.. మ్యాచ్‌ అనంతరం కెప్టెన్‌ శ్రేయస్‌ అయ్యర్‌ కూడా బౌలింగ్‌ ప్రదర్శనపై అసంతృప్తి వ్యక్తం చేశాడు. లైన్‌ అండ్ లెంగ్త్‌ను సరిగ్గా అమలు చేయలేకపోయామని అంగీకరించాడు. భారీ లక్ష్యాన్ని ఛేదించేటప్పుడు అనుసరించాల్సిన వ్యూహంతో బ్యాటర్లు బాగానే ఆడారని.. అయితే బౌలింగ్‌లో ప్రణాళికలను అమలు చేయలేకపోవడమే ఓటమికి కారణమని పేర్కొన్నాడు.

ఇవీ చదవండి:

సుప్రీంకోర్టు సంచలన తీర్పు.. మత మార్పిడితో రిజర్వేషన్ వర్తించదని స్పష్టం

బాలీవుడ్ నటుడు ఇమ్రాన్ ఖాన్‌కు నోటీసులు.. భారత్ విడిచి వెళ్లాలని ఆదేశం.?