బ్రిటన్‌లోని అమెరికా ఎయిర్‌బేస్ నుంచి బి-1 బాంబర్లు వెనక్కి.. భద్రతా ముప్పుతో కీలక నిర్ణయం

US B1 Bombers RAF Fairford బ్రిటన్‌లోని ఆర్‌ఏఎఫ్ ఫేర్‌ఫోర్డ్ (RAF Fairford) వైమానిక స్థావరంపై ఉగ్రదాడికి కుట్ర పన్నుతున్నారనే అనుమానాల నేపథ్యంలో అమెరికా అత్యంత కీలక నిర్ణయం తీసుకుంది. అక్కడ మోహరించిన తన దూర శ్రేణి బి-1 బాంబర్లన్నింటినీ అమెరికాలోని తమ స్వంత మిలిటరీ బేస్‌లకు ఉపసంహరించుకున్నట్లు యూఎస్ సైనిక అధికారులు ధ్రువీకరించారు.

ఈ వైమానిక స్థావరంపై ఇరాన్ మద్దతు ఉన్న ముఠా దాడికి యత్నించిందనే కోణంలో విచారణ జరుగుతున్న వేళ, సరికొత్త భద్రతా ముప్పు తలెత్తడంతో ఈ తరలింపు చేపట్టినట్లు సమాచారం. ఆర్‌ఏఎఫ్ ఫేర్‌ఫోర్డ్‌లో ఉన్న బి-1 బాంబర్లను రీజియన్‌లోని ఇతర స్థావరాలకు కాకుండా నేరుగా అమెరికాకే తరలించడం చాలా అరుదైన చర్యగా రక్షణ వర్గాలు అభివర్ణిస్తున్నాయి.

సెప్టెంబర్ 27న ఈ ఎయిర్‌బేస్ సమీపంలో అనుమానాస్పదంగా సంచరిస్తున్న ఐదుగురు బ్రిటిష్ పౌరులను పోలీసులు అరెస్టు చేశారు. ఆ తర్వాత విచారణలో భాగంగా లండన్‌లో బ్రిటీష్-ఇరానియన్ ద్విపౌరసత్వం కలిగిన మరో వ్యక్తిని కూడా అదుపులోకి తీసుకున్నారు. అరెస్టైన అనుమానితులకు బ్రిటన్ పోలీసులు బెయిల్ మంజూరు చేయడంపై అమెరికా అధ్యక్షుడు డొనాల్డ్ ట్రంప్ అసంతృప్తి వ్యక్తం చేస్తూ, 'నేనైతే వారిని బయటకు పంపేవాడిని కాను' అని వ్యాఖ్యానించారు.అయితే, ఈ ఆరోపణలన్నింటినీ ఇరాన్ ప్రభుత్వం తోసిపుచ్చింది. ఇవన్నీ ఆధారాలు లేని ఆరోపణలని కొట్టిపారేస్తూ ఇరాన్‌లోని బ్రిటిష్ రాయబారికి సమన్లు జారీ చేసింది.

మిడిల్ ఈస్ట్‌లో జరుగుతున్న వైమానిక దాడులు, ప్రధానంగా ఇరాన్‌ లక్ష్యంగా సాగే మిషన్ల కోసం ఆర్‌ఏఎఫ్ ఫేర్‌ఫోర్డ్‌ను అమెరికా గ్లోబల్ స్ట్రైక్ కమాండ్ కీలక కేంద్రంగా ఉపయోగిస్తోంది. ఇటీవల ఇరాన్ సైనిక దళాలు (IRGC) ఈ స్థావరాన్ని లక్ష్యంగా చేసుకుంటామని హెచ్చరించిన క్రమంలో, అమెరికా ఈ ముందస్తు భద్రతా చర్యలు చేపట్టింది.

ఈ వార్తలు కూడా చదవండి..

యుద్ధ విరమణ కోసం భారత్‌ చేసిన ప్రతిపాదనలు బాగున్నాయి

రష్యా డ్రోన్‌ దాడి.. ఉక్రెయిన్‌లో భారత ఫార్మా ప్లాంట్‌ ధ్వంసం

మరిన్ని నేషనల్, ఇంటర్నేషనల్ వార్తల కోసం ఇక్కడ క్లిక్ చేయండి..

Updated Date - Oct 05 , 2026 | 10:39 AM