ఐఏఎస్ అహ్మద్ బాబు కేసు.. హైకోర్టులో కీలక విచారణ

అమరావతి, ఏప్రిల్ 24 (ఆంధ్రజ్యోతి): ఆంధ్రప్రదేశ్ రాష్ట్రంలో ఐఏఎస్ అధికారి అహ్మద్ బాబు చుట్టూ ముసురుకున్న వివాదంపై ఏపీ హైకోర్టులో ఈరోజు(శుక్రవారం) విచారణ జరిపింది. ఉద్యోగుల పదోన్నతుల విషయంలో ఆయన వ్యవహరిస్తున్న తీరుపై న్యాయస్థానం తీవ్ర అసహనం వ్యక్తం చేయడంతో పాటు, ఈ కేసులో సోమవారం తుది ఉత్తర్వులు ఇస్తామని ప్రకటించింది. ప్రభుత్వ ఉద్యోగులకు పదోన్నతులు ఇవ్వకుండా, వారిని వేధింపులకు గురిచేస్తున్నారనే ఆరోపణలపై సాగుతున్న ఈ న్యాయ పోరాటం ఇప్పుడు తుది దశకు చేరుకుంది. ఈ విషయాన్ని ఏపీ ప్రభుత్వ ఉద్యోగుల సంఘం ప్రధాన కార్యదర్శి రమేశ్ కుమార్ పిటిషన్ వేశారు.

కేసు నేపథ్యమిదే..

అర్హులైన ఉద్యోగులకు రావాల్సిన పదోన్నతులను ఐఏఎస్ అధికారి అహ్మద్ బాబు అడ్డుకుంటున్నారని, తద్వారా ఉద్యోగులను మానసిక వేదనకు గురిచేస్తున్నారని పిటిషనర్ కోర్టును ఆశ్రయించారు. నిన్నటి (గురువారం) విచారణలో అహ్మద్ బాబు వైఖరిని హైకోర్టు తీవ్రంగా తప్పుపట్టింది. ఒక ఉన్నత అధికారి ఇలా ప్రవర్తించడంపై ధర్మాసనం మండిపడింది

ఏజీ వివరణ

ప్రభుత్వం తరపున అడ్వొకేట్ జనరల్ (AG) దమ్మాలపాటి శ్రీనివాస్ వాదనలు వినిపించారు. పిటిషనర్ రమేశ్ కుమార్ ఇచ్చిన వినతిపత్రాన్ని రాష్ట్ర ప్రభుత్వ ప్రధాన కార్యదర్శి (CS) ప్రస్తుతం పరిశీలిస్తున్నారని ఆయన కోర్టుకు తెలిపారు. వినతిపత్రంపై సీఎస్ తీసుకున్న చర్యల వివరాలను పూర్తిస్థాయిలో తమ ముందు ఉంచాలని ఏజీని హైకోర్టు ఆదేశించింది.

తీర్పు వాయిదా..

ఇరుపక్షాల వాదనలు విన్న ధర్మాసనం, ఈ వివాదంపై స్పష్టమైన ఉత్తర్వులను రాబోయే సోమవారం జారీ చేస్తామని స్పష్టం చేస్తూ విచారణను ముగించింది. ఉద్యోగుల హక్కుల విషయంలో ఐఏఎస్ అధికారుల జవాబుదారీతనంపై ఈ కేసు ఒక మైలురాయిగా నిలిచే అవకాశం ఉంది. సోమవారం కోర్టు ఇచ్చే ఉత్తర్వులు, అహ్మద్ బాబుపై ఎలాంటి చర్యలకు దారితీస్తాయనేది ఇప్పుడు సచివాలయ వర్గాల్లో హాట్ టాపిక్‌గా మారింది. ఉద్యోగుల సంక్షేమం దృష్ట్యా సీఎస్ తీసుకునే నిర్ణయం కూడా ఇక్కడ కీలకం కానుంది.

ఈ వార్తలు కూడా చదవండి...

ఆ వీడియోలతో బ్లాక్ మెయిల్.. హనీట్రాప్ ముఠా సంచలనం

శబరిమల కేసు విచారణలో సుప్రీంకోర్టు కీలక వ్యాఖ్యలు

బాలికల కాలేజీలో కోఎడ్యుకేషన్ ఏర్పాటుపై హైకోర్టు అసంతృప్తి

Read Latest AP News And Telangana News And International News And Telugu News