హైదరాబాద్‌లో నర్సు అనుమానాస్పద మృతి కేసును ఛేదించిన పోలీసులు

హైదరాబాద్, ఆగస్టు 30 (ఆంధ్రజ్యోతి): హైదరాబాద్ పహాడీషరీఫ్ పోలీస్ స్టేషన్ పరిధిలోని తుక్కుగూడలో నర్సు అనుమానాస్పద మృతి కేసును పోలీసులు ఛేదించారు. భద్రాద్రి కొత్తగూడెం జిల్లాకు చెందిన యువతి (21) హత్యకు గురైన ఘటనలో బిహార్‌కు చెందిన సైనా ఉల్లా (35)ను పోలీసులు అరెస్ట్ చేశారు. ఈ కేసులో నిందితుడిని ప్రత్యేక బృందాలు గాలించి అదుపులోకి తీసుకున్నట్లు పోలీసులు తెలిపారు.

హత్య అనంతరం నిందితుడు పరారీ..

పోలీసులు తెలిపిన వివరాల ప్రకారం.. తుక్కుగూడలోని ఓ ఆస్పత్రి షెల్టర్ రూమ్‌లో నర్సు అనుమానాస్పద స్థితిలో మృతిచెందింది. మృతదేహంపై గాయాలు ఉన్నట్లు పోలీసులు గుర్తించారు. పోలీసుల ప్రాథమిక విచారణలో కీలక విషయాలు వెలుగులోకి వచ్చాయి. నిందితుడు సైనా ఉల్లా ఆస్పత్రి షెల్టర్ రూమ్‌లోకి కిటికీ గ్రిల్ ద్వారా ప్రవేశించి నర్సుపై అత్యాచారయత్నానికి పాల్పడినట్లు తెలిపారు. ఆమె ప్రతిఘటించడంతో నిందితుడు దాడి చేసి హత్య చేసినట్లు వెల్లడించారు. హత్య అనంతరం నిందితుడు అక్కడి నుంచి పరారైనట్లు చెప్పారు. తమ విచారణలో సైనా ఉల్లా నేరాన్ని అంగీకరించినట్లు పేర్కొన్నారు. ఈ కేసు దర్యాప్తులో భాగంగా సాంకేతిక ఆధారాలతో పాటు ఇతర వివరాలను సేకరించినట్లు వెల్లడించారు.

గంటల వ్యవధిలోనే కేసును ఛేదించిన పోలీసులు

నర్సు అనుమానాస్పద మృతి విషయం వెలుగులోకి వచ్చిన వెంటనే పహాడీషరీఫ్ పోలీసులు దర్యాప్తు చేపట్టారు. నిందితుడు సైనా ఉల్లా కోసం ప్రత్యేక పోలీసు బృందాలను ఏర్పాటు చేసి గాలింపు చర్యలు చేపట్టారు. నిందితుడి కదలికలు, ఘటనకు సంబంధించిన ఆధారాలను పరిశీలిస్తూ దర్యాప్తు చేశారు. ప్రత్యేక బృందాల చర్యలతో నిందితుడిని గంటల వ్యవధిలోనే గుర్తించి అరెస్ట్ చేసినట్లు పోలీసులు తెలిపారు. ఈ కేసు దర్యాప్తును ఏసీపీ శ్రీకాంత్ గౌడ్ పర్యవేక్షిస్తున్నారు.

ఎనిమిది నెలలుగా ఆస్పత్రిలో నర్సుగా..

మృతురాలు గత ఎనిమిది నెలలుగా తుక్కుగూడలోని ఓ ఆస్పత్రిలో నర్సుగా పనిచేస్తున్నట్లు పోలీసులు తెలిపారు. ఆ ఆస్పత్రి షెల్టర్ రూమ్‌లోనే ఆమె ఉంటున్నారు. ఈరోజు (ఆదివారం) మధ్యాహ్నం నర్సు విధులకు హాజరు కాకపోవడంతో ఆస్పత్రి సిబ్బందికి అనుమానం వచ్చింది. దీంతో వారు ఆమె గదిని పరిశీలించగా అనుమానాస్పదస్థితిలో మృతిచెంది కనిపించింది. ఆ ఆస్పత్రి సిబ్బంది వెంటనే పోలీసులకు సమాచారం అందించారు. సమాచారం అందుకున్న పహాడీషరీఫ్ పోలీసులు ఘటనాస్థలానికి చేరుకుని ఆధారాలను సేకరించారు. మృతదేహాన్ని పరిశీలించి కేసు నమోదు చేసి దర్యాప్తు చేపట్టారు. ఘటనకు సంబంధించిన పరిస్థితులను, ఆస్పత్రి పరిసరాలను పోలీసులు పరిశీలించారు. మొదట అనుమానాస్పద మృతిగా కేసు నమోదు చేసి పోలీసులు దర్యాప్తు చేపట్టారు. విచారణలో హత్య కోణాన్ని గుర్తించారు. అనంతరం ప్రత్యేక బృందాలను రంగంలోకి దించి నిందితుడిని అదుపులోకి తీసుకున్నారు.

పోలీసుల దర్యాప్తు..

నిందితుడు సైనా ఉల్లాను అరెస్ట్ చేసినప్పటికీ కేసుకు సంబంధించిన అన్ని అంశాలపై పోలీసులు దర్యాప్తు చేస్తున్నారు. ఘటనకు ముందు, అనంతరం నిందితుడి కదలికలు, అతడి నేపథ్యం, ఘటనకు సంబంధించిన ఇతర ఆధారాలను పోలీసులు పరిశీలిస్తున్నారు. తుక్కుగూడలో చోటుచేసుకున్న ఈ ఘటన స్థానికంగా తీవ్ర కలకలం రేపింది.

ఇవి కూడా చదవండి..

సంజీవని గేమ్ చేంజర్‌గా మారుతుంది: సీఎం చంద్రబాబు

బంగాళాఖాతంలో మరో అల్పపీడనం.. తెలుగు రాష్ట్రాలకు వర్ష సూచన

ఉద్యోగాల పేరుతో మోసం.. భద్రాచలం ఎమ్మెల్యే పీఏపై చీటింగ్ కేసు

Read Latest Telangana News And AP News And National News

And Telugu News