CP CV Anand ON Movie Piracy: మూవీ పైరసీ గ్యాంగ్‌ని పట్టుకున్న పోలీసులు.. సంచలన విషయాలు వెలుగులోకి..

హైదరాబాద్, సెప్టెంబరు29 (ఆంధ్రజ్యోతి): సినిమాల పైరసీ (Movie Piracy) వల్ల నిర్మాతల కష్టం వృథా అవుతోందని.. ఈ పరిశ్రమ బాగా ప్రభావానికి గురవుతోందని హైదరాబాద్ సీపీ సీవీ ఆనంద్ (CP CV Anand) వ్యాఖ్యానించారు. పైరసీపై తెలుగు ఫిలిం చాంబర్ ఆఫ్ కామర్స్ ఫిర్యాదు (Telugu Film Chamber of Commerce complaint) మేరకు కేసు నమోదు చేసి దర్యాప్తు చేపట్టామని పేర్కొన్నారు. నాలుగు నెలలు కష్టపడి దర్యాప్తు చేశామని గుర్తుచేశారు. దేశంలో మొదటి సారి పైరసీ చేస్తున్న ఓ గ్యాంగ్‌ను పట్టుకున్నామని వెల్లడించారు. 2023లో భారత దేశంలోని చిత్ర పరిశ్రమ రూ. 22,400 కోట్లు పైరసీతో నష్టపోయిందని చెప్పుకొచ్చారు సీపీ సీవీ ఆనంద్.

తెలుగు చిత్ర పరిశ్రమకి నష్టం..

2024లో తెలుగు చిత్ర పరిశ్రమ రూ. 3700 కోట్లు నష్టపోయిందని తెలిపారు. ఈ అంశాలన్నీ దృష్టిలో ఉంచుకుని సమగ్ర దర్యాప్తు చేశామని పేర్కొన్నారు. పైరసీ మూవీస్ వల్ల ఆన్‌లైన్ బెట్టింగ్‌ (Online Betting)లకు కూడా ప్రేక్షకులు అలవాటు పడుతున్నారని చెప్పుకొచ్చారు. ఓ వెబ్‌సైట్, టెలిగ్రామ్ ద్వారా పైరసీ మూవీలు స్ట్రీమింగ్ చేస్తున్నారని వివరించారు. సర్వర్స్ హ్యాకింగ్‌తో పాటు క్యామ్ కార్డర్ ద్వారా నిందితులు సినిమాలను పైరసీ చేస్తున్నారని తెలిపారు. బెట్టింగ్ గేమింగ్ యాప్స్ నిర్వాహకులు పైరసీ చేసేవారికి డబ్బులు ఇచ్చి ప్రోత్సహిస్తున్నారని పేర్కొన్నారు సీపీ సీవీ ఆనంద్.

బెట్టింగ్ యాప్ నిర్వాహకుల ప్రచారం..

‘బెట్టింగ్ యాప్ నిర్వాహకులు పైరసీ మూవీల ద్వారా వారి యాప్‌లను ప్రచారం చేసుకుంటున్నారు. తెలుగు ఫిలిం ఛాంబర్ ఆఫ్ కామర్స్ ఫిర్యాదు అందుకున్న వెంటనే ప్రత్యేక బృందాలను ఏర్పాటు చేశాం. తమిళ్ బ్లాస్టర్స్, ఫైవ్ మూవీ రూల్స్, తమిళ్ మూవీ వెబ్‌సైట్‌ (Movie Website)లలో పైరసీ సినిమాలను అందుబాటులో ఉంచుతున్నారు. ఈ కేసులో హైదరాబాద్‌కు చెందిన జానా కిరణ్ కుమార్ అత్తాపూర్‌లోని మంత్ర మాల్ థియేటర్‌లో సినిమా కాపీ చేశాడు. ఫిర్యాదు అనంతరం 44 మంది అనుమానితులను విచారించిన తర్వాత అసలు నిందితుడు జానా కిరణ్ కుమార్‌ (Jana Kiran Kumar)గా తేలింది.

చాలా సినిమాలని అత్తాపూర్‌‌లోని మంత్ర థియేటర్‌లో మొబైల్‌తో రికార్డ్ చేసి సిరిల్ అనే వ్యక్తికి అందచేశారు. నలబై మూవీలు థియేటర్‌లో కాపీ చేశాడు. ప్రతి సినిమాకు 300 నుంచి 400 డాలర్లను బిట్ కాయిన్స్ రూపంలో కిరణ్ కుమార్ తీసుకుంటున్నాడు. అనంతరం క్రిఫ్టో కరెన్సీ ట్రేడింగ్ ఫ్లాట్ ఫాంని ఉపయోగించి ఇండియన్ కరెన్సీలోకి మార్చుకుంటున్నారు. సినిమా పైరసీ చేయడానికి అనువైన సీటు చూసుకుని.. టికెట్ బుక్ చేసుకుని హై ఎండ్ కెమెరా ఉన్న ఫోన్‌తో రికార్డ్ చేస్తారు. స్క్రీన్ ఆఫ్ ఉన్నా కెమెరాల్లో వీడియో రికార్డ్ చేసే యాప్ ద్వారా అనుమానం రాకుండా ఇదంతా చేస్తున్నారు. అలాగే, బీహార్‌కు చెందిన అర్సలన్ అహ్మద్ కూడా హిందీ భోజ్‌పురి సినిమాలు రికార్డ్ చేసి సిరిల్‌కు పంపుతాడు’ అని హైదరాబాద్ సీపీ సీవీ ఆనంద్ పేర్కొన్నారు.

పైరసీలో సిరిల్‌ అనే వ్యక్తి కీలకం..

‘సత్యమంగళానికి చెందిన సుధాకరన్ సినిమాలు పైరసీ చేసి సిరిల్‌కు ఇస్తాడు. సిరిల్ అనే వ్యక్తి ప్రధాన నిందితుడు.. ఆయన కరూర్‌కు చెందినవాడు. సమగ్రంగా దర్యాప్తు చేశాక సిరిల్ కీలకం అని తేలింది. నాలుగు వెబ్‌సైట్లను 2020 నుంచి నడుపుతున్నాడు. కంప్యూటర్ సైన్స్ చేసి ఈజీ మనీకి అలవాటు పడి ఈ మార్గాన్ని ఎంచుకున్నాడు. ఏజెంట్‌లను నియమించుకుని అన్ని భాషల సినిమాలను పైరసీ చేశాడు. నెదర్లాండ్ ఐపీ అడ్రస్ ద్వారా ఈ సినిమాలను వెబ్‌సైట్లల్లో అప్‌లోడ్ చేశాడు. ప్యారిస్ లొకేషన్ చూపిస్తూ మరో రెండు సర్వర్‌లను కూడా వినియోగిస్తున్నారు.

ఎవరూ తమ వరకు రారని.. అన్ని జాగ్రతలు తీసుకున్న కూడా తమకు పట్టుబడటంతో సిరిల్ విస్మయం వ్యక్తం చేస్తున్నాడు. 1xBet , 4Ra Bet, Rajbet, Parimatch బెట్టింగ్ యాప్‌లు రూ. 9 లక్షలు నెలకు జీతం లాగా సిరిల్‌కు ఇస్తున్నాయి. నెలకు సుమారు 15 సినిమాలను అప్‌లోడ్ చేస్తున్నాడు. తమిళ్ బ్లాస్టర్స్ అనే ఒక వెబ్‌సైట్‌లోనే 500 మూవీలు అప్‌లోడ్ చేశాడు. ఇటీవల విడుదలైన కుబేర మూవీ కూడా సిరిల్ వద్ద గుర్తించాం. 10 క్రిప్టో కరెన్సీ వ్యాలెట్లు, మూడు బ్యాంకు ఖాతాలను వినియోగిస్తున్నారు సిరిల్. క్రిప్టో కరెన్సీనీ యూఎస్ డాలర్‌లోకి ట్రేడింగ్ చేసే అశ్విని కుమార్ అనే వ్యక్తిని అదుపులోకి తీసుకున్నాడు. అశ్విని కుమార్(22) అనే వ్యక్తి డిజిటల్ మీడియా సర్వర్‌లను హ్యాక్ చేసి సినిమాను కాపీ చేస్తాడు’ అని హైదరాబాద్ సీపీ సీవీ ఆనంద్ తెలిపారు.

సర్వర్ హ్యాక్ చేసి మూవీల పైరసీ...

‘అశ్విన్ కుమార్‌ ఇంటి చుట్టూ 22 సీసీ కెమెరాలు ఏర్పాటు చేసుకుని ఉన్నాడు. పోలీసులు రావడం చూసి మొబైల్ డేటా డిలీట్ చేశాడు.. హార్డ్ డిస్క్‌లో డేటా మాత్రం డిలీట్ చేయలేక పోయాడు. ఆ హార్డ్ డిస్క్‌ని స్వాధీనం చేసుకున్నాం..ఆయన సర్వర్ హ్యాక్ చేయడం ద్వారా మూవీని అప్‌లోడ్ చేస్తున్నాడు. డిజిటల్ మీడియా హౌస్‌ల సర్వర్లను కూడా హ్యాక్ చేసే సత్తా అశ్విన్ కుమార్‌ (Ashwin Kumar)కి ఉంది. 10, 20 మూవీలను డైరెక్ట్‌గా సర్వర్‌లను హ్యాక్ చేసి సినిమాలు అప్‌లోడ్ చేశాడు. 200 ఎంబీ స్పీడ్ గల ఇంటర్నెట్‌ని వినియోగిస్తున్నాడు. మూవీలు మాత్రం కాదు.. అన్ని ప్రభుత్వం విభాగాల వెబ్‌సైట్ల సర్వర్‌లను కూడా హ్యాక్ చేశాడు. ఎన్నికల కమిషన్ వెబ్‌సైట్లను కూడా ఆయన హ్యాక్ చేశాడు. హిట్-3 మూవీతో పాటు ఇటీవల విడుదలైన చాలా చిత్రాలు అశ్విన్ కుమార్ హార్డ్ డిస్క్‌లో దొరికాయి. బెట్టింగ్ యాప్ నిర్వాహకులు వెనుకాల ఉండి పైరసీ చేసే హ్యాకర్‌లకు సహకారం అందిస్తున్నారు’ అని హైదరాబాద్ సీపీ సీవీ ఆనంద్ వెల్లడించారు.

ఈ వార్తలు కూడా చదవండి..

గుడ్ న్యూస్.. మరో గొప్ప పథకం ప్రారంభం

ఎమ్మెల్యేల అనర్హత పిటిషన్లపై విచారణ.. స్పీకర్‌ నిర్ణయంపై ఉత్కంఠ

Read Latest Telangana News and National News