చైనా ఓపెన్‌: ముగిసిన సింధు పోరాటం.. మారథాన్ పోరులో చెన్ యుఫెయిదే పైచేయి

ఇంటర్నెట్ డెస్క్: భారత స్టార్ షట్లర్ పీవీ సింధు చైనా ఓపెన్ సూపర్-1000 బ్యాడ్మింటన్ టోర్నీలో ప్రీక్వార్టర్స్‌లోనే వెనుదిరిగింది. గురువారం ఉత్కంఠభరితంగా సాగిన పోరులో ప్రపంచ నాలుగో ర్యాంకర్, ఆతిథ్య చైనా క్రీడాకారిణి చెన్ యుఫెయి చేతిలో 21-16, 20-22, 18-21 తేడాతో ఓటమి పాలైంది. సుమారు గంటన్నర సేపు జరిగిన ఈ పోరు.. టోర్నీలోనే అత్యుత్తమ మ్యాచ్‌లలో ఒకటిగా నిలిచింది.

హోరాహోరీ పోరు సాగిందిలా..

మొదటి గేమ్‌లో ఆరంభంలో వెనుకబడిన సింధు అద్భుతంగా పుంజుకుంది. విరామ సమయానికి 6-11తో వెనుకబడినా.. వరుసగా 7 పాయింట్లు సాధించి 21-16తో గేమ్‌ను తన ఖాతాలో వేసుకుంది. రెండో గేమ్‌లోనూ ఆధిపత్యం కొనసాగించిన భారత క్రీడాకారిణి.. 7-3 ఆధిక్యం సాధించి విరామ సమయానికి ఆధిక్యంలో నిలిచింది. ఆ తర్వాత మరో 4 పాయింట్లు సాధించి 20-16తో విజయానికి చేరువైంది. అయితే.. కీలక సమయంలో తడబడిన సింధు.. అనవసర తప్పిదాలు చేసింది. ఈ అవకాశాన్ని సద్వినియోగం చేసుకున్న చెన్.. వరుస పాయింట్లు సాధించి 22-20తో గేమ్‌ను కైవసం చేసుకుంది. నిర్ణయాత్మక మూడో గేమ్‌లోనూ ఇరువురు హోరాహోరీగా తలపడ్డారు. విరామ సమయానికి 11-8తో సింధు ముందంజలో ఉన్నా.. చెన్ క్రమంగా ఒత్తిడి పెంచింది. స్థానిక ప్రేక్షకుల మద్దతుతో మరింత ఆత్మవిశ్వాసంతో చెలరేగిన చైనా స్టార్.. వరుస పాయింట్లు సాధించి 21-18తో గేమ్‌ను గెలిచి క్వార్టర్ ఫైనల్లోకి దూసుకెళ్లింది.

కాగా.. ఇటీవల జపాన్ ఓపెన్ సెమీఫైనల్లో గాయంతో మధ్యలోనే తప్పుకున్న చెన్ యుఫెయి.. ఈ గెలుపుతో నాటి ఓటమికి ప్రతీకారం తీర్చుకున్నట్టైంది. మరోవైపు.. ఈ పరాజయంతో 2019 తర్వాత వరుసగా ఇద్దరు టాప్-5 ప్లేయర్లను ఓడించే అవకాశాన్ని కొద్ది తేడాతో కోల్పోయింది సింధు.

ఇవీ చదవండి:

శ్రేయాస్‌ కెప్టెన్సీకి పరీక్ష

చలో..గ్లాస్గో