కొడుకు అరెస్టుతో తండ్రి నేర చరిత్ర వెలుగులోకి.!
ABN , Publish Date - Sep 24 , 2026 | 07:46 AM
కొడుకుపై నమోదైన వేధింపుల కేసు దర్యాప్తులో తండ్రి నేరం వెలుగులోకి వచ్చింది. రెండు దశాబ్దాలుగా పరారీలో ఉన్న అతడి తండ్రి 2003 నాటి జంట హత్య కేసులో నిందితుడని తేలడంతో పోలీసులు అరెస్ట్ చేశారు.
ఇంటర్నెట్ డెస్క్: 'వెతకబోయిన తాడు కాలికి తగిలినట్టు' అన్నట్టు బిహార్లో ఓ కేసులో కొడుకును అరెస్ట్ చేయడంతో తండ్రి నేర చరిత్ర బయటపడింది. జముయిలో బాలికను వేధించిన కేసులో నిందితుడైన యువకుణ్ని పోలీసులు అరెస్ట్ చేయగా.. ఓ హత్య కేసులో ఇరవైయేళ్లుగా పరారీలో అతడి తండ్రి కూడా నిందితుడని తేలింది. ఈ ఘటనకు సంబంధించిన మరిన్ని వివరాల్లోకెళితే...
పదో తరగతి విద్యార్థిపై రోడ్డుపై దాడికి పాల్పడటం సహా అతడి స్నేహితురాలైన ఓ బాలికను వేధించిన కేసులో నందన్ యాదవ్ సహా ఐదుగురిని అరెస్ట్ చేశారు పోలీసులు. అరెస్టైన వారిలో ఇద్దరు మైనర్లూ ఉన్నట్టు సమాచారం. ఆ తర్వాత నందన్ యాదవ్ కుటుంబ నేపథ్యాన్ని పరిశీలించడంతో తండ్రి గనోరి యాదవ్ వ్యవహారం వెలుగులోకి వచ్చింది. 2003 ఏప్రిల్ 3న ప్రతాప్పుర్లో వ్యాపార వివాదంలో ఇద్దరు వ్యక్తులు హత్యకు గురయ్యారు. ఈ కేసులో బాధిత కుటుంబసభ్యుల ఫిర్యాదు మేరకు.. గనోరి యాదవ్ నిందితుడని తేలింది. కానీ అప్పటి నుంచి అతడు పరారీలో ఉన్నాడు. సుమారు 2 దశాబ్దాలుగా తప్పించుకు తిరుగుతున్న గనోరి కోసం మరోసారి తీవ్రంగా గాలించిన పోలీసులు.. ఎట్టకేలకు అరెస్ట్ చేసి న్యాయస్థానం ఎదుట హాజరుపరిచారు. అనంతరం అతణ్ని జ్యుడీషియల్ కస్టడీకి తరలించారు.
ఇవీ చదవండి:
మెజారిటీ నిర్ణయాలు కాకుంటే చట్టవిరుద్ధమే!
ఒక జట్టు కెప్టెనే అంపైర్ను ఎంపిక చేసుకున్నట్లుంది!
