కృష్ణాజిల్లాలో నాటు తుపాకీతో బెదిరింపులు..

కృష్ణాజిల్లా, జూన్ 3 (ఆంధ్రజ్యోతి): మచిలీపట్నం సౌత్ మండల పరిధిలోని కోన గ్రామంలో నాటు తుపాకీ కలకలం సృష్టించింది. భార్యాభర్తల మధ్య జరిగిన చిన్నపాటి వివాదం కాస్తా, నాటు తుపాకీతో బెదిరింపుల వరకు దారితీసింది. ఈ ఘటనపై పోలీసులు కేసు నమోదు చేసి దర్యాప్తు జరుపుతున్నారు.

అసలేం జరిగిందంటే..?

పోలీసులు తెలిపిన వివరాల ప్రకారం.. కోన గ్రామానికి చెందిన పేరే రామాంజనేయులు అనే వ్యక్తికి, అతని భార్యకు మధ్య కొంతకాలంగా కుటుంబ కలహాలు నడుస్తున్నాయి. ఈ క్రమంలోనే వారి మధ్య మరోసారి తీవ్రస్థాయిలో వివాదం ముదిరింది. ఈ కోపంలో విచక్షణ కోల్పోయిన రామాంజనేయులు, ఎవరికీ తెలియకుండా తన వద్ద దాచుకున్న ఒక నాటు తుపాకీని బయటకు తీశాడు. ఆ తుపాకీతో తన భార్యను భయభ్రాంతులకు గురిచేశాడు. అంతటితో ఆగకుండా, ఆ నాటు తుపాకీని చేతబట్టుకుని గ్రామంలోని నడిరోడ్డుపైకి వచ్చి హల్‌చల్ చేశాడు. చేతిలో లోడ్ చేసిన ఆయుధంతో తిరుగుతున్న అతడిని చూసి గ్రామస్థులు ప్రాణభయంతో పరుగులు తీశారు. ఎప్పుడు ఏం జరుగుతుందో, ఎవరిపై కాల్పులు జరుపుతాడో తెలియక ప్రజలు తీవ్ర ఆందోళనకు గురయ్యారు.

పోలీస్ స్టేషన్‌కు చేరిన వివాదం

గ్రామంలో నాటు తుపాకీతో ఒక వ్యక్తి తిరుగుతున్నాడనే సమాచారం అందుకున్న వెంటనే బందరు తాలూకా పోలీసులు రంగంలోకి దిగారు. ఘటనా స్థలానికి చేరుకున్న పోలీసులు నిందితుడు రామాంజనేయులును అదుపులోకి తీసుకున్నారు. అతడి వద్ద ఉన్న నాటు తుపాకీని స్వాధీనం చేసుకున్నారు. లైసెన్స్ లేని ఆయుధాలను కలిగి ఉండడం, వాటితో బెదిరించడం చట్టరీత్యా తీవ్రమైన నేరమని హెచ్చరించారు. ఈ ఘటనపై సమగ్ర విచారణ జరుపుతున్నామని పోలీసులు తెలిపారు.

కేసు నమోదు.. దర్యాప్తు..

ఈ వ్యవహారంపై బందరు తాలూకా పోలీసులు కేసు నమోదు చేశారు. అసలు రామాంజనేయులుకు ఆ నాటు తుపాకీ ఎక్కడి నుంచి వచ్చింది?, దీని వెనుక ఎవరైనా తుపాకుల సరఫరాదారులు ఉన్నారా? లేక వేట కోసం దీనిని తయారు చేయించాడా? అనే కోణంలో పోలీసులు సమగ్ర దర్యాప్తు చేస్తున్నారు. ప్రశాంతంగా ఉండే కోన గ్రామంలో ఈ నాటు తుపాకీ వ్యవహారం వెలుగుచూడటంతో స్థానికులు ఇంకా ఆ భయం నుంచి తేరుకోలేకపోతున్నారు. ఈ ఘటన మచిలీపట్నం పరిసర ప్రాంతాల్లో చర్చనీయాంశంగా మారింది.

ఈ వార్తలు కూడా చదవండి...

‘సర్‌’ను సీరియస్‌గా తీసుకోండి.. సీఎం చంద్రబాబు దిశానిర్దేశం

సునీల్ కుమార్ వ్యాఖ్యలపై విచారణ చేయాలి: రఘురామకృష్ణరాజు

Read Latest  AP News And Telangana News And National News

And Telugu News