సంప్రదాయ హస్తకళా వారసత్వానికి ఏపీ పుట్టినిల్లు: పవన్ కల్యాణ్

ABN , Publish Date - Jul 07 , 2026 | 05:54 PM

సంప్రదాయ హస్తకళా వారసత్వానికి ఏపీ పుట్టినిల్లు అని ఆంధ్రప్రదేశ్ ఉప ముఖ్యమంత్రి పవన్ కల్యాణ్ వ్యాఖ్యానించారు.

సంప్రదాయ హస్తకళా వారసత్వానికి ఏపీ పుట్టినిల్లు: పవన్ కల్యాణ్

AP Deputy CM Pawan Kalyan

విజయవాడ, జులై 7 (ఆంధ్రజ్యోతి): సంప్రదాయ హస్తకళా వారసత్వానికి ఏపీ పుట్టినిల్లు అని ఆంధ్రప్రదేశ్ ఉప ముఖ్యమంత్రి పవన్ కల్యాణ్ (AP Deputy CM Pawan Kalyan) వ్యాఖ్యానించారు. ఒక జాతి గొప్పతనం నిర్మించిన భవనాల్లో కాదని, కళాకారుల్లో కనిపిస్తుందని అభివర్ణించారు. కళాకారుల అద్భుత ప్రతిభను, వారి కష్టాన్ని గుర్తించడానికి తాను ఈ కార్యక్రమానికి వచ్చానని తెలిపారు. హస్తకళాకారుల వస్తువుల తయారీ మాత్రమే కాకుండా, వారసత్వాన్ని సజీవంగా ఉంచుతున్నారని పేర్కొన్నారు. ఈరోజు (మంగళవారం) విజయవాడలోని డాక్టర్ బీఆర్ అంబేడ్కర్ కళావేదికలో ఏర్పాటు చేసిన ఏపీ హస్తకళల అభివృద్ధి సంస్థ (లేపాక్షి) నిర్వహించిన 'ఆంధ్రప్రదేశ్ హస్తకళల ఉత్సవం 2026'ను పవన్ కల్యాణ్ ప్రారంభించారు. ఈ ఉత్సవంలో రాష్ట్రంలోని వివిధ ప్రాంతాలకు చెందిన ప్రముఖ హస్తకళాకారులు రూపొందించిన కళారూపాలను ప్రదర్శించారు. ఈ సందర్భంగా, రామాయణంలోని రావణ సంహార ఘట్టాన్ని తోలుబొమ్మలాట కళాకారులు ప్రదర్శించిన తీరును పవన్ కల్యాణ్ అభినందించారు.

కళాకారుల నైఫుణ్యాలను ప్రశంసించిన పవన్ కల్యాణ్..

ప్రతి స్టాల్‌ను సందర్శించి, హస్తకళా ఉత్పత్తులను కొనుగోలు చేయడం ద్వారా కళాకారులను వ్యక్తిగతంగా పవన్ కల్యాణ్ ప్రోత్సహించారు. కళాకారులతో కలిసిపోయి, వారి నైపుణ్యాలను ప్రశంసించారు. వారి విజయాలు, సవాళ్ల గురించి అడిగి తెలుసుకున్నారు. వారికి అవసరమైన సౌకర్యాలు కల్పించాలని అధికారులకు ఆదేశించారు. కళాకారుల కోరిక మేరకు, క్లస్టర్ల వారీగా గ్రూప్ ఫొటోలు తీసుకున్నారు. ఈ సందర్భంగా పవన్ కల్యాణ్ మాట్లాడారు. ఏపీ హస్తకళల అభివృద్ధికి తమ ప్రభుత్వం అవసరమైన మద్దతును అందిస్తోందని స్పష్టం చేశారు.

ఆలయ పర్యాటకం తరహాలో హస్తకళల పర్యాటకం..

పర్యావరణ పర్యాటకం, ఆలయ పర్యాటకం తరహాలో హస్తకళల పర్యాటకాన్ని అభివృద్ధి చేయడానికి చర్యలు తీసుకుంటామని డిప్యూటీ సీఎం తెలిపారు. కళాఖండాలను సృష్టించే కళాకారులకు తగిన గుర్తింపు లభించేలా చర్యలు చేపడతామని పేర్కొన్నారు. కళాకారుల పోరాటాలను ప్రపంచానికి పరిచయం చేయడానికి ప్రత్యేక డాక్యుమెంటరీలను రూపొందించాలని అధికారులను ఆదేశించారు. వీబీజీ రామ్ జీ పథకం కింద క్లస్టర్ల వారీగా ఉమ్మడి సౌకర్యాల కేంద్రాలను ఏర్పాటు చేస్తామని తెలిపారు. హస్తకళల పరిరక్షణకు సాధ్యమైన అన్ని చర్యలు తీసుకుంటామని పేర్కొన్నారు. హస్తకళాకారుల ఆరోగ్య పరిరక్షణ కోసం క్లస్టర్ల వారీగా నిరంతర వైద్య శిబిరాలను నిర్వహించాలని సూచించారు.

ఆకట్టుకున్న రావణ వధ ఘట్టం..

ఆంధ్రప్రదేశ్ హస్తకళల ఉత్సవంలో మొదటి అడుగుగా కాకినాడకు చెందిన తోలుబొమ్మలాట కళాకారులు ఏర్పాటు చేసిన స్టాల్‌ను పవన్ కల్యాణ్ సందర్శించారు. సనాతన ధర్మం గొప్పతనాన్ని చాటిచెప్పేలా రూపొందించిన రామాయణ, మహాభారత, భాగవత కళారూపాలను పరిశీలించారు. తోలుబొమ్మలాట కళాకారులు ప్రదర్శించిన రావణ వధ ఘట్టం అందరినీ ఆకట్టుకుంది. సంప్రదాయంగా తోలుబొమ్మలాటను జీవనోపాధిగా చేసుకున్న తమ కుటుంబాలు, ఇప్పుడు అంతర్జాతీయ స్థాయి ప్రదర్శనలు ఇచ్చే స్థాయికి చేరుకున్నాయని కళాకారులు వివరించారు. ఈ కళారూపాల గొప్పతనాన్ని ప్రదర్శించడానికి, రాబోయే గోదావరి పుష్కరాల సమయంలో ప్రత్యేక తోలుబొమ్మలాట ప్రదర్శనలు ఏర్పాటు చేస్తామని పవన్ కల్యాణ్ హామీ ఇచ్చారు.

అన్నా కొణిదెలకి ఉప్పాడ చీరలు..

ఉప్పాడ చీరల స్టాల్‌ను పవన్ కల్యాణ్ సందర్శించారు. తన సతీమణి అన్నా కొణిదెల కోసం మూడు ఉప్పాడ జామ్దానీ పట్టు చీరలను కొనుగోలు చేశారు. అరటి పీచుతో చేసిన హ్యాండ్‌బ్యాగులు, ఫైల్స్, ఇతర పర్యావరణ అనుకూల ఉత్పత్తులపై ప్రత్యేక ఆసక్తి కనపరిచారు. కళాకారుల నుంచి ఉత్పత్తి పద్ధతుల గురించి ఆరా తీసి, వారి నుంచి ఒక హ్యాండ్‌బ్యాగ్‌ను కొనుగోలు చేశారు. తిరుపతి చెక్క శిల్పకారులు రూపొందించిన చెక్క బొమ్మల స్టాల్‌ను సందర్శించారు. కళాకారుల అద్భుతమైన కళాఖండాలను ప్రశంసించి, వారి నుంచి వేంకటేశ్వరస్వామి విగ్రహాన్ని కొనుగోలు చేశారు. శ్రీకాళహస్తికి చెందిన కలంకారి వస్త్రాల స్టాల్ వద్ద, కలం కలంకారి కళతో రూపొందించిన వస్త్రాలు, పరుపుల షీట్లు పవన్ దృష్టిని ఆకర్షించాయి. కలంకారి నేత కళాకారుల కఠోర శ్రమ గురించి ప్రతిఒక్కరూ తెలుసుకునేలా వీడియో డాక్యుమెంటరీలను రూపొందించాలని అధికారులను పవన్ కల్యాణ్ ఆదేశించారు.