Share News

ఐపీఎల్‌కు ధోనీ రిటైర్‌మెంట్.. సీఎస్కే మెంటార్‌గా కొత్త బాధ్యతలు

ABN , Publish Date - Nov 17 , 2026 | 03:02 PM

ఐపీఎల్ 2027లో స్టార్ క్రికెటర్ ఎంఎస్ ధోనీ చెన్నై సూపర్ కింగ్స్ జట్టు మెంటార్‌గా కొత్త బాధ్యతలు చేపట్టనున్నాడు. ఈ విషయాన్ని సీఎస్కే ఫ్రాంచైజీ ఎక్స్ వేదికగా ప్రకటిస్తూ పోస్ట్ పెట్టింది.

ఐపీఎల్‌కు ధోనీ రిటైర్‌మెంట్.. సీఎస్కే మెంటార్‌గా కొత్త బాధ్యతలు
MS Dhoni

ఇంటర్నెట్ డెస్క్: దిగ్గజ క్రికెటర్ ఎంఎస్ ధోనీ ఐపీఎల్‌కు రిటైర్‌మెంట్ ప్రకటించాడు. ఐపీఎల్ 2027లో చెన్నై సూపర్ కింగ్స్ జట్టు మెంటార్‌గా కొత్త బాధ్యతలు చేపట్టనున్నాడు. ఈ విషయాన్ని సీఎస్కే ఫ్రాంచైజీ ఎక్స్ వేదికగా ప్రకటిస్తూ పోస్ట్ పెట్టింది. దాదాపు రెండు దశాబ్దాల పాటు అభిమానులను అలరించిన మాహీ.. ఇకపై మైదానంలో ఆటగాడిగా కనిపించబోడు. ఇప్పటికే జహీర్ ఖాన్‌ను హెడ్ కోచ్‌గా నియమించిన ఫ్రాంచైజీ.. ఇప్పుడు ధోనీకి కీలక బాధ్యతలు అప్పగించడం విశేషం.


ఐదు ఐపీఎల్ టైటిళ్లు.. సీఎస్కేకు స్వర్ణయుగం

2008-2015, 2018-2025 కాలంలో ధోనీ సీఎస్కేకు ప్రాతినిధ్యం వహించాడు. అతడి కెప్టెన్సీలో చెన్నై సూపర్ కింగ్స్ ఐదుసార్లు ఐపీఎల్ విజేతగా నిలిచింది. 2010, 2011, 2018, 2021, 2023లో టైటిళ్లు సాధించింది. దీంతో ఐదు ట్రోఫీలతో ముంబై ఇండియన్స్‌తో కలిసి అత్యధిక టైటిళ్లు సాధించిన జట్టుగా సీఎస్కే నిలిచింది. అంతేకాకుండా 2010, 2014లో రెండుసార్లు ఛాంపియన్స్ లీగ్ టీ20 టైటిళ్లను కూడా గెలుచుకుంది. ధోనీ నాయకత్వంలో చెన్నై ఏకంగా పదిసార్లు ఐపీఎల్ ఫైనల్‌కు చేరింది. 2016, 2017 సీజన్లలో సీఎస్కేపై నిషేధం విధించిన సమయంలో ధోనీ రైజింగ్ పుణె సూపర్‌జెయింట్ తరఫున ఆడాడు. 2018లో చెన్నై తిరిగి ఐపీఎల్‌లోకి అడుగుపెట్టగానే ధోనీ నాయకత్వంలో ఆ జట్టు టైటిల్ సాధించింది. 2023 ఫైనల్లో గుజరాత్ టైటాన్స్‌పై రవీంద్ర జడేజా చివరి బంతుల్లో బౌండరీలు బాది చెన్నైకి ఐదో టైటిల్ అందించాడు.


మోకాలి శస్త్రచికిత్స చేయించుకుని 2024 సీజన్‌లో ధోనీ తిరిగి బరిలోకి దిగాడు. అప్పటికి అతడి బ్యాటింగ్ పాత్రలోనూ మార్పు వచ్చింది. టాప్ ఆర్డర్‌లో కాకుండా ఇన్నింగ్స్ చివర్లో బ్యాటింగ్‌కు వచ్చి తన పవర్ హిట్టింగ్‌తో జట్టుకు పరుగులు అందించాడు. 2023 సీజన్‌లో 104 పరుగులు చేసిన ధోనీ.. 182కు పైగా స్ట్రైక్‌రేట్ నమోదు చేశాడు. 2024లో 11 ఇన్నింగ్స్‌ల్లో 161 పరుగులు చేసి ఏకంగా 220.54 స్ట్రైక్‌రేట్ సాధించాడు. 2025లో మొత్తం 14 మ్యాచ్‌ల్లో ఆడి 196 పరుగులు చేశాడు. 2026 సీజన్‌లో ధోనీ జట్టు ఆటగాళ్ల జాబితాలో ఉన్నప్పటికీ ఫిట్‌నెస్ సమస్యల కారణంగా ఒక్క మ్యాచ్ కూడా ఆడలేకపోయాడు.


ఐపీఎల్‌లో ధోనీ గణాంకాలు ఇవే!

ధోనీ తన ఐపీఎల్ కెరీర్‌లో 278 మ్యాచ్‌లు ఆడి 5,439 పరుగులు సాధించాడు. 38.30 సగటు, 137.45 స్ట్రైక్‌రేట్‌తో రాణించాడు. ఇందులో 24 అర్ధసెంచరీలు ఉన్నాయి. 264 సిక్సర్లు, 375 ఫోర్లు బాదాడు. సీఎస్కే తరఫున 272 మ్యాచ్‌ల్లో 5,314 పరుగులు చేశాడు. ఆ జట్టు తరఫున అత్యధిక పరుగులు చేసిన ఆటగాళ్లలో రెండో స్థానంలో నిలిచాడు. అత్యధిక మ్యాచ్‌లు ఆడిన ఆటగాడిగా కూడా రికార్డు సృష్టించాడు.


ధోనీ లేకుండా సీఎస్కే లేదు: శ్రీనివాసన్

ధోనీతో తమ అనుబంధం ఎప్పటికీ విడదీయలేనిదని సీఎస్కే యజమాని ఎన్‌.శ్రీనివాసన్‌ అన్నారు. ‘ధోనీ లేకుండా సీఎస్కే లేదు. దాదాపు రెండు దశాబ్దాలుగా మేమిద్దరం కలిసి ప్రయాణించాం. మా మధ్య బంధం ఇంత బలంగా ఉండటానికి కారణం ఒకరిపై ఒకరికి ఉన్న నమ్మకమే. 2008లో జరిగిన తొలి ఐపీఎల్‌ వేలంలో ధోనీని జట్టులోకి తీసుకోవాలన్న నా నిర్ణయం జీవితంలోనే అత్యుత్తమమైనది. సీఎస్కేకు అతడు సాధించిన విజయాలే కాదు.. గొప్ప వ్యక్తిత్వం కూడా నన్నెంతో ఆకట్టుకుంది. మా అస్తిత్వంలో ధోనీ ఎప్పటికీ భాగమే. సీఎస్కే ఎల్లప్పుడూ అతడి సొంతిల్లే’ అని ఎన్. శ్రీనివాసన్ పేర్కొన్నారు.


ఇవి కూడా చదవండి:

ముద్దంటూ విదేశీయురాలిని వేధించిన వ్యక్తి.. కట్ చేస్తే జైల్లో..

అమితాబ్, అభిషేక్ బచ్చన్‌ల హత్యకు 200 మంది సిద్ధం.. గోల్డీ ధిల్లాన్ మరోసారి బెదిరింపులు..

Updated Date - Nov 17 , 2026 | 03:57 PM