ఆ వీధిలో... అడుగడుగున పుస్తక రాశులు

అదొక ఇరుకైన వీధి. ప్రపంచవ్యాప్తంగా సాహిత్యప్రియులను ఆకట్టుకునే చోటు. శుక్రవారం వచ్చిందంటే చాలు... విద్యార్థులు, యువత, మేధావులు, వృద్ధులతో ఆ వీధి కిటకిటలాడుతుంది. శతాబ్దాల చరిత్ర కలిగిన ఈ విశేషమైన బుక్‌ మార్కెట్‌ ఇరాక్‌ రాజధాని నగరం బాగ్దాద్‌లో ఉంది. దీనికి కొత్త సొబగులు అద్దడంతో ఆనాటి సాంస్కృతిక శోభ తిరిగి కనిపిస్తోంది.

• బాగ్దాద్‌లో ఉన్న పుస్తకాల వీధిలో 8వ శతాబ్దం నుంచి విభిన్న రకాల రచయితల పుస్తకాలు అందుబాటులో ఉంటూ వచ్చాయి. ఈ పుస్తకాల వీధికి 10వ శతాబ్దానికి చెందిన రచయిత ‘అబుల్‌ తాయెబ్‌ అల్‌ ముతనబ్బీ’ పేరు పెట్టారు.

• బాగ్దాద్‌లో ఏర్పడిన తొలి పుస్తక వాణిజ్య కేంద్రం ఇది. చాలాకాలంగా ఈ ప్రదేశం బాగ్దాద్‌ మేధావి వర్గానికి ఆత్మగా నిలుస్తోంది. సందర్శకులు ఇక్కడ కొన్ని వందల బుక్‌స్టోర్‌లను చూడొచ్చు. బుక్‌స్టాల్స్‌, కేఫ్‌లు, స్టేషనరీ షాపులు, టొబాకో దుకాణ సముదాయాలుంటాయి.

• ‘కైరో రాస్తుంది. బీరుట్‌ ప్రింట్‌ చేస్తుంది. బాగ్దాద్‌ చదువుతుంది.’ గల్ఫ్‌ దేశాల్లో మేధావులు అనే మాట ఇది.

• విక్రేతలు రాత్రివేళ పుస్తకాలను బయటే వదిలేస్తారు. వాటికి కాపలాగా ఎవరూ ఉండరు. ఎవరైనా ఎత్తుకుపోతారన్న భయం ఉండదు. అదే విషయాన్ని పుస్తక విక్రేతలను అడిగితే ‘‘పుస్తకాలు చదివేవాడు దొంగతనం చేయడు. దొంగతనం చేసేవాడు పుస్తకాలు చదవడు’’ అంటారు.

• ఒక కి.మీ పొడవైన ఈ పుస్తకాల వీధి బుక్‌స్టోర్స్‌, బహిరంగ దుకాణాలతో ఉంటుంది. ఈ బుక్‌ మార్కెట్‌ మెసపటోమియాలో వందల ఏళ్లుగా జరిగిన రాజకీయ, సాంస్కృతిక మార్పులకు సాక్షీభూతంగా నిలిచింది.

• 2007లో ఈ వీధిలో జరిగిన పేలుడు ఒక మాయని మచ్చగా నిలిచిపోయింది. నిలిపి ఉంచిన ఒక కారు బాంబు పేలిన ఘటనలో 30 మంది చనిపోయారు. వంద మందికి పైగా గాయాల పాలయ్యారు.

• యుద్ధాలు, ఘర్షణల తరువాత 2021లో చారిత్రక ప్రాధాన్యం కలిగి ఉన్న, పుస్తక వాణిజ్యానికి కేంద్ర ప్రాంతమైన బుక్‌ మార్కెట్‌ పునరుద్ధరణ చర్యలు చేపట్టారు.

• ఒక కిలోమీటర్‌ పొడవుండే ఈ పుస్తకాల వీధి ముఖద్వారానికి పలువురు కవుల కవిత్వంలోని కోట్స్‌ ఉంటాయి. మార్కెట్‌ చివర్లో ప్రసిద్ధ ఇరాకీ శిల్పి మొహమ్మద్‌ ఘనీ హిక్మత్‌ చెక్కిన ‘అబుల్‌ తాయెబ్‌ అల్‌ ముతనబ్బీ’ శిల్పం టైగ్రిస్‌ నదికి అభిముఖంగా ఉంటుంది.

• ఎగ్జిబిషన్లు, గ్యాలరీ ప్రారంభోత్సవాలు, పుస్తక ప్రదర్శనలతో నిత్యం పండుగ వాతావరణం నెలకొని ఉంటుంది. ఒకప్పుడు బాగ్దాద్‌... అరబ్‌ ప్రపంచపు సాంస్కృతిక రాజధానులలో ఒకటిగా, స్వర్ణయుగంగా పరిగణిం చబడింది. బాగ్దాద్‌ బుక్‌ మార్కెట్‌ ఇప్పుడు ఆ రోజులను గుర్తు చేస్తూ పుస్తక ప్రియుల ప్రశంసలు అందుకుంటోంది.

ఈ వార్తలు కూడా చదవండి:

మోదీని చూసి నేర్చుకుంటేనే...

ఎలుకల నుంచి మనుషులకు హంటా వైరస్..

Read Latest Telangana News and National News