జ్ఞానేశ్‌ను తప్పించే వరకు పోరాటం ఆగదు.. మాక్ పార్లమెంట్‌లో రాహుల్ గాంధీ

ఢిల్లీ, అక్టోబర్ 31: కాంగ్రెస్ పార్టీ నిర్వహిస్తున్న మాక్ పార్లమెంట్‌ కార్యక్రమంలో భారత ప్రధాన ఎన్నికల కమిషనర్ (సీఈసీ) జ్ఞానేశ్ కుమార్‌పై ఇండి కూటమి నేతలు ప్రజా అభిశంసన తీర్మానాన్ని ప్రవేశపెట్టారు. ఈ సందర్భంగా లోక్‌సభ ప్రతిపక్షనేత రాహుల్ గాంధీ మాట్లాడుతూ.. జ్ఞానేశ్ కుమార్‌ను పదవి నుంచి తప్పించే వరకు తమ పోరాటం ఆగదని స్పష్టం చేశారు. ఎన్నికల వ్యవస్థపై దాడికి పాల్పడిన వారిని వదిలిపెట్టే ప్రసక్తే లేదని ఆయన తేల్చి చెప్పారు. ఎన్నికల ప్రక్రియ ‘సర్’లో జరిగిన అవకతవకల వెనుక జ్ఞానేశ్ కుమార్ ఒక్కరే కాదని, ఇంకా చాలామంది ఉన్నారని ఆరోపించారు. ‘రాజ్యాంగాన్ని, ప్రజల ఓటు హక్కును కాపాడేందుకు పోరాడుతాం. సీఈసీపై అభిశంసనతో పాటు దేశద్రోహం కేసు కూడా పెట్టాలి. ప్రధాని మోదీ, హోంమంత్రి అమిత్ షా అగ్రస్థానంలో ఉన్నప్పటికీ.. వారి ఆదేశాలను అమలు చేస్తున్న వారే మా తొలి లక్ష్యం. పదవులు, సంస్థల రక్షణ వెనుక దాక్కుని ఎవరూ తప్పించుకోలేరు’ అని రాహుల్ పేర్కొన్నారు.

ప్రభుత్వ సంస్థలను దుర్వినియోగం చేస్తున్నారు..

ప్రభుత్వ సంస్థలను దుర్వినియోగం చేస్తున్నారని రాహుల్ గాంధీ ఆరోపణలు చేశారు. ‘ఎన్నికల సంఘం, సీబీఐ, ఈడీ వంటి సంస్థల దుర్వినియోగాన్ని సహించేది లేదు. వీటిపై ప్రజాస్వామ్య శక్తుల పోరాటం కొనసాగుతుంది. అలాగే జ్ఞానేశ్ కుమార్‌పై ఉన్న అన్ని అభియోగాలకూ మా వద్ద తగిన ఆధారాలు ఉన్నాయి. ఆయన సీఈసీగా కొనసాగలేరు. అయినప్పటికీ బీజేపీ జ్ఞానేశ్‌ను పదవిలో కొనసాగిస్తే ఆ పార్టీ ఉద్దేశం ఏమిటో అందరికీ స్పష్టమవుతుంది’ అని లోక్‌సభ ప్రతిపక్ష నేత వెల్లడించారు.

ప్రజాస్వామ్యాన్ని కాపాడే రాజకీయ ఆయుధమిది..

అనంతరం రాహుల్ మాక్ పార్లమెంట్ కార్యక్రమం గురించి వివరిస్తూ.. ఈ కార్యక్రమం కేవలం ఎంపీలు, సామాన్య పౌరుల సమావేశం కాదని, ప్రజాస్వామ్యాన్ని కాపాడే రాజకీయ ఆయుధమిదని అన్నారు. ‘దేశవ్యాప్తంగా 13.3 కోట్ల మంది ఓటర్ల పేర్లు తొలగించారు. దేశవ్యాప్తంగా ఉన్న మొత్తం ఓటర్లలో 15 శాతం మందికి ఓటు హక్కు లేకుండా చేశారు. ప్రతి ఏడుగురు భారతీయుల్లో ఒకరు ఓటు హక్కు కోల్పోయారు. ఓటర్ల హక్కులను హరించిన ప్రతి ఒక్కరూ ఏదో ఒక రోజు ప్రజాప్రతినిధులకు సమాధానం చెప్పుకోవాల్సిందే’ అని రాహుల్ గాంధీ తెలిపారు.

ఈ వార్తలూ చదవండి

ఇండియా కూటమి మాక్ పార్లమెంట్.. సీఈసీపై ఆరు ప్రధాన అభియోగాలు ఇవే..

ఇండియా కూటమి మాక్ పార్లమెంట్ ప్రారంభం.. జ్ఞానేశ్ కుమార్‌పై అభిశంసన తీర్మానం..