Share News

చలికాలంలో కాళ్ల పగుళ్లు.. సులభమైన ఈ చిట్కాలతో ఉపశమనం!

ABN , Publish Date - Nov 18 , 2026 | 07:19 AM

మిమ్మల్ని కూడా కాళ్ల పగుళ్ల సమస్య వేధిస్తోందా..? ఉపశమనం కలిగించేందుకు ఈ చిట్కాలను పాటించండి.

చలికాలంలో కాళ్ల పగుళ్లు.. సులభమైన ఈ చిట్కాలతో ఉపశమనం!

ఇంటర్నెట్ డెస్క్: చలికాలం మొదలవగానే చాలామందిని వేధించే సమస్యల్లో పాదాల మడమలు పగలడం కూడా ఒకటి. వాతావరణంలో తేమ తగ్గడం వల్ల చర్మం పొడిబారి గట్టిగా మారుతుంది. ముఖ్యంగా పాదాల మడమల దగ్గర చర్మం మందంగా ఉండటంతో ఒత్తిడి పడినప్పుడు పగుళ్లు ఏర్పడతాయి. ఇవి చిన్నగా ఉన్నప్పుడు అంత ఇబ్బంది అనిపించకపోవచ్చు. కానీ నిర్లక్ష్యం చేస్తే పగుళ్లు లోతుగా మారి నొప్పి, మంట, కొన్నిసార్లు రక్తస్రావానికి కూడా దారితీస్తాయి. అయితే కొన్ని సులభమైన పద్ధతులతో పాదాలకు తేమ అందించి, మడమలు మరింత పొడిబారకుండా చూసుకోవచ్చు. ఇంట్లోనే అందుబాటులో ఉండే పదార్థాలతో పాదాల సంరక్షణ ఎలా చేసుకోవాలో తెలుసుకుందాం.


గోరువెచ్చని నీటితో పాదాలను శుభ్రం చేసుకోండి

ఒక పాత్రలో గోరువెచ్చని నీటిని తీసుకుని, కొద్దిగా ఉప్పు కలపండి. అందులో పాదాలను 5 నుంచి 10 నిమిషాల పాటు ఉంచండి. ఆ తర్వాత మెత్తని టవల్‌తో తుడిచి, మడమలకు మాయిశ్చరైజర్‌ రాయండి. ఇలా చేయడం వల్ల గట్టిపడిన చర్మం కొంత మృదువుగా మారుతుంది. అయితే నీరు మరీ వేడిగా ఉండకూడదు. అలాగే పగుళ్లపై నేరుగా నిమ్మరసం రాయడం మంచిది కాదు. దీనివల్ల మంట, చికాకు కలగవచ్చు.

కొబ్బరి నూనెతో మర్దన చేయండి

చర్మం పొడిబారినప్పుడు కొబ్బరి నూనె రాయడం కూడా మంచి మార్గం. ఇందులోని కొవ్వు పదార్థాలు చర్మంలో తేమ నిలిచి ఉండేందుకు సహాయపడతాయి. ముందుగా పాదాలను శుభ్రంగా కడిగి తుడుచుకోవాలి. ఆ తర్వాత మడమలకు కొద్దిగా కొబ్బరి నూనె రాసి మృదువుగా మర్దన చేయాలి. రాత్రిపూట ఇలా చేసి సాక్స్‌ ధరించడం వల్ల పాదాలు పొడిబారకుండా ఉంటాయి.


పెట్రోలియం జెల్లీ వాడండి

పగుళ్లు ఏర్పడిన మడమలకు పెట్రోలియం జెల్లీ ఉపయోగపడుతుంది. ఇది చర్మంపై ఒక పొరలా ఏర్పడి, లోపల ఉన్న తేమ బయటకు వెళ్లకుండా అడ్డుకుంటుంది. స్నానం చేసిన తర్వాత, రాత్రి పడుకునే ముందు మడమలకు పెట్రోలియం జెల్లీని కొంచెం మందంగా రాయాలి. అనంతరం కాటన్‌ సాక్స్‌ ధరించాలి. క్రమం తప్పకుండా ఇలా చేయడం వల్ల చర్మం మృదువుగా మారుతుంది.

అలోవెరా జెల్‌ రాయండి

కలబంద గుజ్జు (అలోవెరా జెల్‌) చర్మానికి తేమను అందించడంతో పాటు చల్లదనాన్ని ఇస్తుంది. పాదాలను శుభ్రం చేసుకున్న తర్వాత మడమలకు అలోవెరా జెల్‌ రాసుకోవచ్చు. అయితే పగుళ్లు మరీ లోతుగా ఉండి, తెరిచిన గాయాలుగా మారితే వైద్యుల సలహా లేకుండా ఎలాంటి పదార్థాలనూ ఉపయోగించకూడదు.


మడమలు పగలకుండా ఉండాలంటే ఈ జాగ్రత్తలు తప్పనిసరి!

  • ప్రతిరోజూ పాదాలను శుభ్రంగా కడిగి పొడిగా ఉంచుకోవాలి.

  • స్నానం చేసిన వెంటనే మడమలకు మాయిశ్చరైజర్‌ రాయాలి.

  • మడమలను కప్పి ఉంచే సౌకర్యవంతమైన పాదరక్షలు ధరించాలి.

  • గట్టిపడిన చర్మాన్ని బలవంతంగా కత్తిరించడం లేదా గోళ్లతో గీకడం చేయకూడదు.

  • పగుళ్లు లోతుగా మారి నొప్పి, వాపు లేదా రక్తస్రావం ఉంటే వైద్యులను సంప్రదించాలి.

  • మధుమేహం ఉన్నవారు పాదాల విషయంలో మరింత జాగ్రత్తగా ఉండాలి. చిన్న పగులు లేదా గాయం కనిపించినా నిర్లక్ష్యం చేయకుండా వైద్యుల సలహా తీసుకోవాలి.


ఇవీ చదవండి

శిథిలానికి సజీవ రూపం

నాన్న స్ఫూర్తితో అక్షరార్చన

Updated Date - Nov 18 , 2026 | 07:30 AM