Share News

ఏపీ కేబినెట్ కీలక నిర్ణయాలు.. 12 అజెండాలకు ఆమోదం

ABN , Publish Date - Oct 07 , 2026 | 01:53 PM

ఏపీ కేబినెట్ సమావేశం ముగిసింది. ముఖ్యమంత్రి చంద్రబాబు నాయుడు అధ్యక్షతన జరిగిన సమావేశంలో కీలక నిర్ణయాలకు ఆమోదం తెలిపారు.

ఏపీ కేబినెట్ కీలక నిర్ణయాలు.. 12 అజెండాలకు ఆమోదం
AP Cabinet Meeting

అమరావతి, అక్టోబర్ 7: ఏపీ కేబినెట్ సమావేశం ముగిసింది. ఈరోజు(బుధవారం) ముఖ్యమంత్రి చంద్రబాబు అధ్యక్షతన జరిగిన సమావేశంలో కీలక నిర్ణయాలకు ఆమోదం తెలిపారు. మొత్తం 12 అజెండా అంశాలకు మంత్రివర్గం ఆమోద ముద్ర వేసింది. మంత్రివర్గంలో తీసుకున్న నిర్ణయాలను మంత్రి పార్థసారథి మీడియాకు వివరించారు. హార్టికల్చర్‌ ఇన్ఫర్మేషన్‌ అండ్‌ మేనేజ్‌మెంట్‌ సిస్టమ్‌ ఏర్పాటు ప్రతిపాదనకు ఆమోదం లభించిందన్నారు. రూ.20.62 కోట్లతో APHIMS ప్రాజెక్టుకు కేబినెట్‌ గ్రీన్‌సిగ్నల్‌ ఇవ్వగా.. 72 నెలల పాటు అమలు చేయనున్నట్లు తెలిపారు. సేవలో ఉండగానే మరణించిన అర్హత కలిగిన ఆశా కార్యకర్తలకు గ్రాట్యుటీకి మంత్రివర్గం ఆమోదం తెలిపిందని చెప్పారు. ప్రతి ఏడాది సేవకు రూ.5 వేల చొప్పున.. గరిష్ఠంగా రూ.1.50 లక్షల గ్రాట్యుటీ ఇవ్వాలని నిర్ణయించినట్లు వెల్లడించారు.


రేపల్లె 30 పడకల కమ్యూనిటీ హెల్త్‌ సెంటర్‌ను 100 పడకల ఏరియా ఆసుపత్రిగా అప్‌గ్రేడ్‌ చేసేందుకు ఏపీ కేబినెట్ ఆమోదముద్ర వేసిందని మంత్రి తెలిపారు. రేపల్లె ఏరియా ఆసుపత్రి అప్‌గ్రేడేషన్‌కు రూ.58.42 కోట్లు, అదనంగా 66 పోస్టుల మంజూరుకు కేబినెట్‌ ఆమోదించిందన్నారు. 2026-27 తల్లికి వందనం మార్గదర్శకాలు, పరిపాలనా అనుమతులకు రాటిఫికేషన్‌ ఇచ్చిందని చెప్పారు. అదనంగా 58,060 మందితో కలిపి ఆర్థిక సాయం విడుదలకు ఆమోదం తెలిపిందని.. దీంతో 68,57,880 మందికి ఈ పథంకం వర్తించనున్నట్లు చెప్పారు. సంక్షేమ వసతి గృహాలు, రెసిడెన్షియల్‌ స్కూళ్లలో డైట్‌ ఛార్జీల పెంపుపై ఉత్తర్వులకు ఏపీ మంత్రివర్గం రాటిఫికేషన్‌ ఇచ్చిందన్నారు.


విశాఖ మరికవలసలో గిరిజన విద్యార్థుల కోసం సెంటర్‌ ఆఫ్‌ ఎక్సలెన్స్‌ ఏర్పాటుకు మంత్రివర్గం ఆమోదం తెలిపిందని పార్థసారథి అన్నారు. IIT-JEE, NEETకు ఇంటెన్సివ్‌ రెసిడెన్షియల్‌ కోచింగ్‌ కేంద్రం ఏర్పాటుకు కేబినెట్‌ గ్రీన్‌సిగ్నల్‌ ఇచ్చిందన్నారు. కుప్పం ప్రాంత అభివృద్ధి సంస్థ అధికారుల అతిథి గృహం కోసం 1.69 ఎకరాల భూమి వర్గీకరణ మార్పునకు ఆమోదం లభించిందన్నారు. ఎన్టీఆర్ జిల్లాలో అభ్యంతరం లేని ప్రభుత్వ పోరంబోకు భూముల ఆక్రమణల క్రమబద్ధీకరణకు జారీ చేసిన ఉత్తర్వులకు రాటిఫికేషన్‌ ఇచ్చిందన్నారు. వైఎస్సార్‌ కడప జిల్లా పాతూరులో ఆలయ అభివృద్ధికి 7.66 ఎకరాల ప్రభుత్వ భూమిని దేవాదాయశాఖకు బదలాయింపునకు ఆమోదం తెలిపిందన్నారు.


ప్రకాశం జిల్లా కొండపిలో బాలుర రెసిడెన్షియల్‌ స్కూల్‌, హాస్టల్‌ కోసం 7 ఎకరాల భూమి వర్గీకరణ మార్పునకు కేబినెట్ ఆమోదం తెలిపిందని మంత్రి చెప్పారు. ఏపీ విద్యా చట్టం–1982కు సవరణలు చేసే ప్రతిపాదనకు, విదేశీ ఉన్నత విద్యాసంస్థలు, ప్రైవేట్‌ యూనివర్సిటీల క్యాంపస్‌ల ఏర్పాటుకు కొత్త పాలసీ–2026కు మంత్రివర్గ సమావేశంలో ఆమోదముద్ర పడిందన్నారు. అలాగే విదేశీ విద్యాసంస్థలు, ప్రైవేట్‌ యూనివర్సిటీల క్యాంపస్‌ల ఏర్పాటు, ప్రోత్సాహకాలు, సదుపాయాలపై సమగ్ర విధానానికి ఏపీ కేబినెట్‌ ఆమోదం తెలిపినట్లు మంత్రి పార్థసారథి వెల్లడించారు.


సిటీ పెరుగుతున్న కొద్దీ గ్రామాల నుంచి పట్టణాలకు వలసలు పెరుగుతాయని మంత్రి అన్నారు. అలా వచ్చిన వారు అందుబాటులో ఉన్న ప్రభుత్వ భూమిని ఉపయోగించి ఇళ్లు కట్టుకోవడం సహజమని చెప్పారు. రాజకీయ అవసరాల కోసం ఇలాంటి వారిని కొందరు వాడుకోవడం చూస్తామని.. దీంతో ముఖ్యమంత్రి వీరికి న్యాయం చేయడానికి పేదలకు పట్టాభిషేకం కార్యక్రమం చేపట్టారని అన్నారు. ఈ ఆస్తిలో కొందరికి కోటి రూపాయలు కూడా ఉన్న దాఖలాలు ఉన్నాయన్నారు. ఏపీ విద్యాచట్టం 1982 సెక్షన్‌లలో సవరణ చేయాలని ప్రభుత్వం ఆదేశించిందని.. విద్యార్థులకు ఉన్న సిలబస్‌పై రెగ్యులర్‌గా మానిటర్ చేయాలని ముఖ్యమంత్రి ఆదేశించినట్లు చెప్పారు. నలుగురు మంత్రులు ముందస్తు అనుమతితోనే కేబినెట్ సమావేశానికి దూరంగా ఉన్నారని తెలిపారు.


ప్రధాని నరేంద్ర మోదీ 25 సంవత్సరాలు ప్రభుత్వాధినేతగా పదవీకాలం పూర్తిచేసినందుకు ఏపీ కేబినెట్ ముఖ్యమంత్రి నేతృత్వంలో తీర్మానం చేశామన్నారు. మోదీపై ఈ ప్రభత్వానికి ఉన్న గౌరవం, దేశాన్ని అత్యున్నత స్థాయిలో నిలిపేందుకు చేస్తున్న ప్రయత్నం గురించి మంత్రిమండలిలో మంత్రులు మాట్లాడినట్లు తెలిపారు. పాలనలో మోదీ ఎలా సంస్కరణలు తీసుకువచ్చారని, ఏవిధంగా ప్రధానిగా ఎదిగారనే అనేదానిపై ముఖ్యమంత్రి, మంత్రులు మాట్లాడినట్లు మంత్రి పార్థసారథి పేర్కొన్నారు.


ఇవి కూడా చదవండి..

ఢిల్లీ తరువాత విజయవాడలో సరస్ మేళా: ఎంపీ కేశినేని చిన్ని

విశాఖలో CII పార్ట్‌నర్‌షిప్ సమ్మిట్ ప్రారంభం.. రూ.4,249 కోట్ల ప్రాజెక్టులకు భూమి పూజ

Read Latest AP News And Telugu News

Updated Date - Oct 07 , 2026 | 03:45 PM