VGold Facts: ఈ ప్రపంచంలో అసలు ఎన్ని టన్నుల బంగారముంది..? మొత్తం బంగారాన్ని ఒక్క చోట చేర్చి కరిగించి తీగలా మార్చితే..
ABN , First Publish Date - 2023-04-05T19:11:41+05:30 IST
బంగారం అంటే ఇష్టం లేని వారు ఈ ప్రపంచంలో ఎవరూ ఉండరనడంలో ఏమాత్రం అతిశయోక్తి లేదు. బంగారం విషయంలో రేటు దగ్గరి నుంచి ప్రతి వార్త.. జనాన్ని విశేషంగా ఆకట్టుకుంటూ ఉంటుంది. ఏరోజుకారోజు దీనికి సంబంధించిన వివరాలు తెలుసుకునేందుకు జనం ఆసక్తి కనబరుస్తుంటారు. ఒంటిపై..
బంగారం అంటే ఇష్టం లేని వారు ఈ ప్రపంచంలో ఎవరూ ఉండరనడంలో ఏమాత్రం అతిశయోక్తి లేదు. బంగారం విషయంలో రేటు దగ్గరి నుంచి ప్రతి వార్త.. జనాన్ని విశేషంగా ఆకట్టుకుంటూ ఉంటుంది. ఏరోజుకారోజు దీనికి సంబంధించిన వివరాలు తెలుసుకునేందుకు జనం ఆసక్తి కనబరుస్తుంటారు. ఒంటిపై బంగారం వేసుకోవడం స్టేటస్ సింబల్‌గా భావిస్తున్న ప్రస్తుత తరుణంలో ఓ వార్త సోషల్ మీడియాలో వైరల్‌గా మారింది. ఈ ప్రపంచంలో అసలు ఎన్ని టన్నుల బంగారం ఉంటుంది. ఒకవేళ మొత్తం బంగారాన్ని ఒక్క చోట చేర్చి కరిగించి తీగలా మార్చితే ఎంత పొడవు ఉంటుంది. ఇలాంటి పలు ఆసక్తికర విషయాల గురించి ఇప్పుడు తెలసుకుందాం..
వజ్రాలకు (Diamonds) ఎంత విలువ ఉంటుందో ప్రత్యేకంగా చెప్పాల్సిన పని లేదు. అయితే అలాంటి వజ్రాల కంటే బంగారం (gold) దొరకడమే కష్టమట. అవును మీరు వింటుంది నిజమే.. మైనింగ్‌లో 5 క్యారెట్ల వజ్రం (5 carat diamond) చాలా సులభంగా దొరుకుతుంది. కానీ 28 గ్రాముల బంగారం దొరకడం చాలా కష్టం. అందుకే బంగారాన్ని సంపాదించడం వజ్రాల కంటే కష్టమని అంటూ ఉంటారు. అలాగే మరో షాకింగ్ ఫ్యాక్ట్ ఏంటంటే.. ప్రపంచంలోని బంగారాన్ని మొత్తం ఒకే చోటకు తెస్తే.. దాన్ని 21 మీటర్ల క్యూబికల్ క్రేట్‌లో ఉంచవచ్చట. అదేవిధంగా ప్రపంచంలోని బంగారాన్ని మొత్తం కరిగించి, దాన్నుంచి 5మైక్రాన్ల మందపాటి తీగను తయారు చేస్తే.. దాంతో ప్రపంచాన్ని 11 మిలియన్ల కంటే ఎక్కువ సార్లు చుట్టవచ్చట. సాధారణంగా బంగారం 1,064 డిగ్రీల సెంటీగ్రేడ్ ఉష్ణోగ్రత వద్ద కరగడం ప్రారంభమవుతుంది.
అదేవిధంగా 2,808 డిగ్రీల వరకూ వేడి చేసినప్పుడు.. అది ఉడకడం ప్రారంభమవుతుంది. ప్రపంచంలో సగం బంగారం ఆభరణాల రూపంలో ఉండగా.. 20 శాతం నాణేలు ETFa రూపంలో ఉంది. అలాగే 17శాతం బంగారం కేంద్ర బ్యాంకుల వద్ద ఉంది. మరోవైపు 13శాతం బంగారం మైక్రోచిప్‌లు, స్మార్ట్‌ఫోన్లు, ఔషధాల తయారీకి ఉపయోగించబడుతోంది. ఇప్పటి వరకు ప్రపంచంలో సుమారు 1,90,000 టన్నుల బంగారం వెలికితీయబడింది. బంగారాన్ని ధనవంతులు ఎక్కువగా వినియోగిస్తున్నా.. మొత్తం పరిమాణంలో చూసుకుంటే మధ్యతరగతి కుటుంబాల వారే ఎక్కువగా వినియోగిస్తున్నట్లు ఓ సర్వేలో బయటపడింది. రూ.20 లక్షల కంటే ఎక్కువ ఆదాయం ఉన్న కుటుంబాలు 27 గ్రాముల బంగారాన్ని కొనుగోలు చేస్తే.. తక్కువ ఆదాయ వర్గం వారు 51.68 గ్రాములు, రూ.5 నుంచి రూ.20 లక్షల ఆదాయ బ్రాకెట్‌లోని వినియోగదారులు 25.13 గ్రాములు కొనుగోలు చేస్తున్నట్లు వెల్లడైంది.
