Amberpet SI Arrest: అంబర్పేట్ ఎస్ఐ భానుప్రకాశ్రెడ్డి అరెస్ట్.. ఏమైందంటే..
ABN , Publish Date - Jan 10 , 2026 | 09:34 AM
హైదరాబాద్ అంబర్పేట్ పోలీస్ స్టేషన్కు చెందిన ఎస్ఐ భానుప్రకాశ్రెడ్డిని పోలీసులు అరెస్ట్ చేశారు. తీవ్ర ఆరోపణల నేపథ్యంలో ఆయన్ను అదుపులోకి తీసుకున్న పోలీసులు, న్యాయస్థానం ఆదేశాల మేరకు రిమాండ్కు తరలించారు. ప్రస్తుతం భాను ప్రకాష్ రెడ్డి చంచల్గూడ జైల్లో ఉన్నారు..
హైదరాబాద్, జనవరి10(ఆంధ్రజ్యోతి): హైదరాబాద్లోని అంబర్పేట్ పోలీసు స్టేషన్లో పనిచేస్తున్న సబ్ ఇన్స్పెక్టర్ (SI) భానుప్రకాశ్రెడ్డిని (Amberpet SI Bhanu Prakash Reddy Arrested) పోలీసులు శనివారం అరెస్టు చేశారు. ఈ ఉదంతం పోలీస్ శాఖలో తీవ్ర కలకలం రేపుతోంది. రక్షణ కల్పించాల్సిన అధికారే నేరాలకు పాల్పడటం, ఏకంగా తన సర్వీస్ రివాల్వర్ను పోగొట్టుకోవడం వంటి అంశాలు సంచలనంగా మారాయి. ప్రస్తుతం భాను ప్రకాశ్ రెడ్డి చంచల్గూడ జైల్లో ఉన్నారు.
అసలేం జరిగింది?
ఈ ఘటనకు సంబంధించి పోలీసులు తెలిపిన ప్రకారం.. ఎస్ఐ భాను ప్రకాశ్రెడ్డి గత కొంతకాలంగా వివాదాస్పద కార్యకలాపాలకు పాల్పడుతున్నట్లు విచారణలో తేలింది. బెట్టింగ్లకు బానిసవడం, అప్పుల ఊబిలో కూరుకుపోవడం.. ఆయన్ను నేరాల వైపు మళ్లేలా చేశాయని తెలిపారు.
అక్రమాలు..
ఏదైనా కేసులో పోలీసులు రికవరీ చేసిన నగదు లేదా వస్తువులను భద్రపరచాల్సి ఉంటుంది. కానీ, భాను ప్రకాశ్రెడ్డి తన బెట్టింగ్ అప్పులు తీర్చడం కోసం ఆయా కేసుల్లో రికవరీ చేసిన సొత్తును కాజేసినట్లు ఆరోపణలు వచ్చాయి. అయితే ఈ విషయంపై పోలీసులు విచారణ చేపట్టారు. విచారణలో వాటిని తాకట్టు పెట్టినట్లు గుర్తించారు.
సర్వీస్ రివాల్వర్ మిస్సింగ్..
అత్యంత బాధ్యతాయుతంగా ఉంచుకోవాల్సిన తన సర్వీస్ రివాల్వర్ను ఎక్కడో పోగొట్టుకున్నారు. దీనిపై ఉన్నత స్థాయి అధికారులకు భాను ప్రకాశ్రెడ్డి సరైన సమాధానం చెప్పలేకపోయారని సమాచారం.
పొంతన లేని సమాధానాలు..
పోలీసుల విచారణలో ఆయన పొంతన లేని సమాధానాలు చెప్పారు. గన్ మిస్సింగ్ గురించి అధికారులు ప్రశ్నించినప్పుడు భానుప్రకాశ్రెడ్డి పలు రకాల స్టేట్మెంట్లు ఇచ్చినట్లు సమాచారం. తొలుత రైల్లో ప్రయాణిస్తున్న సమయంలో రివాల్వర్ పోయిందని అధికారులను నమ్మించే ప్రయత్నం చేశారు. అయితే, ఎంత వెతికినా తుపాకీ దొరక్కపోవడంతో, చివరకు దాన్ని పోగొట్టుకున్నట్లు ఉన్నతాధికారుల ముందు ఒప్పుకున్నారని పోలీసులు తెలిపారు.
అరెస్ట్, రిమాండ్..
ఎస్ఐ భానుప్రకాశ్రెడ్డిపై వచ్చిన ఆరోపణలు ప్రాథమికంగా నిజమని తేలడంతో పోలీసులు కఠిన చర్యలు తీసుకున్నారు. భాను ప్రకాశ్ను అరెస్ట్ చేసి కోర్టులో హాజరుపరిచారు. కోర్టు ఆదేశాల మేరకు ఆయన్ను రిమాండ్ నిమిత్తం చంచల్గూడ జైలుకు తరలించారు.
ఉద్యోగ మార్పు ప్రయత్నాలు..
ఈ కేసులో మరో ఆసక్తికరమైన విషయం బయటకు వచ్చింది. భానుప్రకాశ్రెడ్డి ఇటీవల ఆంధ్రప్రదేశ్ గ్రూప్-2 (AP Group-2) ఉద్యోగానికి ఎంపికయ్యారు. తెలంగాణలో ఎస్ఐ ఉద్యోగానికి రాజీనామా చేసి (రిలీవ్ అయ్యి), ఏపీలో కొత్త ఉద్యోగంలో చేరాలని దరఖాస్తు చేసుకున్నారు. ఈ ప్రక్రియ సాగుతుండగానే ఆయన చేసిన అక్రమాలు వెలుగులోకి వచ్చాయి.
తెలుగు రాష్ట్రాల్లో సంచలనంగా..
అంబర్పేట్ ఎస్ఐ భానుప్రకాశ్రెడ్డి వ్యవహారం పోలీస్ శాఖలోనే కాకుండా తెలుగు రాష్ట్రాల్లో కూడా సంచలనంగా మారింది. బెట్టింగ్ అలవాటు, రికవరీ సొత్తు దుర్వినియోగం, సర్వీస్ రివాల్వర్ మిస్సింగ్ వంటి ఆరోపణలు తీవ్రమైనవిగా మారాయి. దీంతో ఈ కేసు ఎలాంటి మలుపు తిరుగుతుందనేది ఆసక్తికరంగా మారింది.
ఈ వార్తలు కూడా చదవండి..
రాజాసాబ్ టికెట్ ధరల పెంపునకు ప్రభుత్వం అనుమతి..
మిర్యాలగూడలో ఘోర రోడ్డు ప్రమాదం.. ముగ్గురు మృతి
Read Latest Telangana News And Telugu News
