‘దేశమంతా నిన్నే నమ్ముకుంది’.. గౌతీ సర్ మాటలే ఈ విజయానికి కారణం: తిలక్ వర్మ

ఇంటర్నెట్ డెస్క్: న్యూజిలాండ్‌తో జరిగిన రెండో టీ20లో భారత్ ఉత్కంఠపోరులో విజయం సాధించింది. 70 పరుగులకే 5 వికెట్లు కోల్పోయి పీకల్లోతు కష్టాల్లో పడ్డ టీమిండియాను.. తెలుగు కుర్రాళ్లు తిలక్ వర్మ(51*), నితీశ్ కుమార్ రెడ్డి(26*) పోరాడి గెలిపించారు. అజేయ హాఫ్ సెంచరీతో చెలరేగిన తిలక్ వర్మకు ‘ప్లేయర్ ఆఫ్ ది మ్యాచ్’ అవార్డు దక్కింది. మ్యాచ్ అనంతరం తన ఇన్నింగ్స్‌పై తిలక్.. ఆసక్తికర వ్యాఖ్యలు చేశాడు. హెడ్ కోచ్ గంభీర్, బ్యాటింగ్ కోచ్ సితాన్షు కోటక్ చెప్పిన మాటల వల్లే అంత గొప్ప ఇన్నింగ్స్ ఆడగలిగానని వెల్లడించాడు.

‘ఈ మ్యాచ్‌కు ముందు గౌతీ సర్‌, సితాన్షు కోటక్‌ సర్‌తో మాట్లాడా. ‘దేశమంతా నిన్ను నమ్ముకుంటుంది. నువ్వు చివరి వరకు క్రీజులో ఉంటే జట్టును గెలిపించగలవు’ అని చెప్పారు. మ్యాచ్ ఆడేటప్పుడు నా మనసులో అదే మాటలు మెదిలాయి. వీలైనంత ఎక్కువసేపు బ్యాటింగ్‌ చేసి మ్యాచ్‌ను ముగించాలనుకున్నా. వాళ్లు నాపై ఉంచిన నమ్మకాన్ని నిలబెట్టుకున్నందుకు నాకెంతో గర్వంగా ఉంది.

తొలుత నేను, నమన్‌ ధీర్ క్రీజులో ఉన్నాం. అతడితో చివరి వరకు క్రీజులో ఉందామని చెప్పా. గత మ్యాచ్‌తో పోలిస్తే ఈ పిచ్‌ నెమ్మదిగా ఉంది. ముఖ్యంగా స్పిన్నర్లు బౌలింగ్‌ చేస్తున్నప్పుడు వికెట్ల మధ్య వేగంగా పరుగెత్తడం చాలా అవసరమని భావించాం. అదే మా ప్రణాళిక. దాన్ని బాగా అమలు చేశాం. అయితే 15వ ఓవర్లో శాంట్నర్‌ బౌలింగ్‌లో నమన్‌ ధీర్‌ ఔటయ్యాడు. అతడు క్రీజులో కొనసాగి ఉంటే 18వ ఓవర్లోనే మ్యాచ్‌ను ముగించే అవకాశం ఉండేది. నమన్ అద్భుతంగా బ్యాటింగ్‌ చేశాడు. ఆ తర్వాత నితీశ్‌ కుమార్ రెడ్డి కలిసి మ్యాచ్‌ను ముగించడం సంతోషంగా అనిపించింది’ అని తిలక్ వర్మ వివరించాడు.

ఇవి కూడా చదవండి:

ఫ్యామిలీ కోసమే రీఎంట్రీ.. భువీ జెర్సీ నంబర్ వెనుక ఆసక్తికరమైన కథ!

ఫ్రెంచ్ ఓపెన్: ఫైనల్‌కు దూసుకెళ్లిన పీవీ సింధు