సంజు రాణిస్తుంటే వైభవ్‌కు ఎప్పుడు అవకాశం వస్తుంది?: అశ్విన్

ఇంటర్నెట్ డెస్క్: భారత యువ సంచలనం వైభవ్ సూర్యవంశీకి తుది జట్టులో చోటు దక్కకపోవడంపై చర్చ కొనసాగుతోంది. వెస్టిండీస్‌తో జరుగుతున్న టీ20 సిరీస్‌కు ఎంపికైనప్పటికీ.. ఇప్పటి వరకు ఆడిన మూడు మ్యాచ్‌ల్లోనూ ఈ 15 ఏళ్ల కుర్రాడికి ఆడే అవకాశం రాలేదు. ఈ నేపథ్యంలో భారత మాజీ క్రికెటర్ రవిచంద్రన్ అశ్విన్ ఆసక్తికర వ్యాఖ్యలు చేశాడు. ప్రస్తుతం సంజు శాంసన్ నిలకడగా రాణిస్తుండటంతోనే వైభవ్‌కు అవకాశాలు దక్కడం లేదని అభిప్రాయపడ్డాడు.

‘ప్రస్తుతం సంజు శాంసన్ తన ప్రదర్శనలతో వైభవ్‌ను జట్టుకు దూరం చేస్తున్నాడు. వైభవ్‌కు అవకాశం ఇవ్వాలని నేను భావిస్తున్నప్పటికీ.. జట్టు ఎంపికలో ఇలాంటి పరిస్థితులు ఎదురవుతుంటాయి. ఓపెనర్ అభిషేక్ శర్మ స్థానానికి ప్రస్తుతం ఎలాంటి ముప్పు లేదు. అతడు అద్భుతమైన ప్లేయర్. బ్యాట్ ఝుళిపిస్తే భారత్‌కు విజయాలు అందించగలడు. అభిషేక్ తన స్థానాన్ని పటిష్టం చేసుకోవడంతో మరో ఓపెనర్ స్థానం కోసం పోటీ నెలకొంది. ఈ పరిస్థితుల్లో సంజు శాంసన్ ప్రదర్శనలు కూడా వైభవ్ అవకాశాలను ప్రభావితం చేస్తున్నాయి. సంజు ఇలాగే రాణిస్తుంటే మరి వైభవ్‌కు ఎప్పుడు అవకాశం వస్తుంది?’ అని అశ్విన్ తన యూట్యూబ్ ఛానెల్‌లో వెల్లడించాడు.

ఈ మ్యాచ్‌లోనైనా అవకాశం దక్కేనా?

ఇప్పటికే సిరీస్‌లో 2-1 తేడాతో ఆధిక్యంలో ఉన్న టీమిండియా.. హైదరాబాద్‌లో జరిగే నాలుగో టీ20లోనూ గెలిచి సిరీస్‌ను సొంతం చేసుకోవాలని భావిస్తోంది. ఈ మ్యాచ్‌లోనైనా వైభవ్‌ సూర్యవంశీకి అవకాశం ఇస్తారా? లేక సంజు శాంసన్‌, అభిషేక్‌ శర్మలతోనే ఓపెనింగ్‌ కొనసాగిస్తారా? అన్నది ఆసక్తికరంగా మారింది.

ఇవి కూడా చదవండి:

అభిషేక్ శర్మ ప్రపంచ స్థాయి విధ్వంసకర ఓపెనర్‌గా మారాడు: దినేశ్ కార్తీక్

రంజీ ట్రోఫీకి అన్యాయం జరుగుతోంది.. బీసీసీఐపై గావస్కర్ అసంతృప్తి