యూట్యూబ్‌లో కోహ్లీ బ్యాటింగ్ చూసి నేర్చుకున్నా: ఆసీస్ ప్లేయర్

ఇంటర్నెట్ డెస్క్: భారత స్టార్ బ్యాటర్ విరాట్ కోహ్లీ బ్యాటింగ్‌ను యూట్యూబ్‌లో చూసి ఎన్నో విషయాలు నేర్చుకున్నానని ఆస్ట్రేలియా-ఎ బ్యాటర్ నాథన్ మెక్‌స్వీనీ వెల్లడించాడు. ముఖ్యంగా భారత పిచ్‌లపై స్పిన్నర్లను ఎలా ఎదుర్కోవాలో కోహ్లీ బ్యాటింగ్‌ను పరిశీలించి అర్థం చేసుకున్నట్లు తెలిపాడు. ఇటీవల భారత్-ఎతో జరిగిన మూడు వన్డేల సిరీస్‌లో నాథన్ ఆసీస్-ఎ తరఫున అద్భుతంగా రాణించాడు. ఈ సిరీస్‌లో 194 పరుగులు చేసిన అతడు.. ఓ సెంచరీతో పాటు నిలకడైన ప్రదర్శన కనబరిచి ‘ప్లేయర్ ఆఫ్ ది సిరీస్’గా నిలిచాడు. ఆసీస్‌-ఎ జట్టు సిరీస్‌ను 2-1తో కైవసం చేసుకుంది.

‘భారత్‌లో పర్యటించే ఆస్ట్రేలియా ఆటగాళ్లకు స్పిన్‌ బౌలింగ్‌ను ఎదుర్కోవడమే అత్యంత కీలకం. అందుకే భారత దిగ్గజ ఆటగాళ్లు స్పిన్నర్లను ఎలా ఆడతారో నిశితంగా పరిశీలించా. ముఖ్యంగా విరాట్‌ కోహ్లీ బ్యాటింగ్‌ వీడియోలను యూట్యూబ్‌లో చూసి అతడి విధానాన్ని అధ్యయనం చేశా. స్టీవ్‌ స్మిత్‌తో పాటు గతంలో భారత్‌లో విజయవంతంగా ఆడిన ఇతర ఆస్ట్రేలియా ఆటగాళ్ల ఆటతీరును కూడా గమనించా. మాకు అందిన గణాంకాలు, విశ్లేషణలను మైదానంలో అమలు చేయడం సంతృప్తినిచ్చింది’ అని మెక్‌స్వీనీ వెల్లడించాడు.

భారత్‌లో సిరీస్‌ గెలవడం అంత ఈజీ కాదు..

‘భారత్‌ వంటి పరిస్థితుల్లో పర్యటించి సిరీస్‌ గెలవడం ఏ అంతర్జాతీయ జట్టుకైనా సవాలే. ఇక్కడి పిచ్‌లు, ప్రత్యర్థి జట్ల నుంచి ఎదురయ్యే పోటీని తట్టుకొని రాణించడం కష్టం. అలాంటి పరిస్థితుల్లో మా జట్టు సిరీస్‌ గెలవడం ఆనందంగా ఉంది. సుదీర్ఘ ఫార్మాట్‌లో తొలి ఇన్నింగ్స్‌లో భారీ స్కోరు సాధించడం ఎంతో ముఖ్యం. మ్యాచ్‌ సాగుతున్న కొద్దీ బ్యాటింగ్‌ కష్టంగా మారుతుంది. తొలి ఇన్నింగ్స్‌లో పెద్ద స్కోరు చేస్తే జట్టు విజయానికి బలమైన పునాది పడుతుంది. భవిష్యత్తులో మరోసారి భారత్‌లో ఆడే అవకాశం వస్తే.. టెస్టు క్రికెట్‌లో తొలి ఇన్నింగ్స్‌ బ్యాటింగ్‌పై ప్రత్యేకంగా దృష్టి పెడతా’ అని మెక్‌స్వీనీ వివరించాడు.

ఇవి కూడా చదవండి:

అభిషేక్ శర్మ ప్రపంచ స్థాయి విధ్వంసకర ఓపెనర్‌గా మారాడు: దినేశ్ కార్తీక్

రంజీ ట్రోఫీకి అన్యాయం జరుగుతోంది.. బీసీసీఐపై గావస్కర్ అసంతృప్తి