పండ్లు, కూరగాయలను ఇలా శుభ్రం చేయకపోతే ఆరోగ్యానికి ముప్పు..

ఇంటర్నెట్ డెస్క్: ప్రస్తుత కాలంలో వ్యవసాయంలో పురుగుమందులు, రసాయనాల వినియోగం ఎక్కువైంది. ఇవి మన శరీరంలోకి వెళ్లి ఆరోగ్య సమస్యలకు కారణం కావచ్చు. అందుకే పండ్లు, కూరగాయలను కేవలం నీటితో కడిగితే సరిపోదు, సరైన విధంగా శుభ్రం చేయడం చాలా అవసరం. లేదంటే ఈ రసాయనాలు శరీరంలోకి చేరి హార్మోన్ల అసమతుల్యత, అలర్జీలు, క్యాన్సర్ వంటి సమస్యలకు దారితీయవచ్చు. కాబట్టి పండ్లు, కూరగాయలను బాగా శుభ్రం చేసుకుని తినడం మంచిది.

పారుతున్న నీటిలో బాగా కడగడం:

ముందుగా పండ్లు, కూరగాయలను నీటిలో 2–5 నిమిషాలు నానబెట్టండి. తర్వాత కుళాయి నీటితో బాగా రుద్దుతూ కడగండి. ఇలా చేయడం వల్ల దుమ్ము, బ్యాక్టీరియా, కొంతవరకు పురుగుమందులు తొలగిపోతాయి.

ఉప్పు నీటిలో నానబెట్టడం:

నీటిలో 1–2 టీస్పూన్ల ఉప్పు వేసి పండ్లు, కూరగాయలను 10–15 నిమిషాలు నానబెట్టాలి. ఇది పైపొరపై ఉన్న రసాయనాలను తొలగించడంలో సహాయపడుతుంది. తర్వాత శుభ్రమైన నీటితో మళ్లీ కడగాలి.

బేకింగ్ సోడాతో క్లీన్ చేయడం:

ఒక లీటరు నీటిలో అర టీస్పూన్ బేకింగ్ సోడా కలిపి, అందులో పండ్లు, కూరగాయలను 10–15 నిమిషాలు నానబెట్టాలి. ఇది రసాయనాలను తగ్గించడంలో ఉపయోగపడుతుంది.

వెనిగర్ ఉపయోగించడం:

ఒక గిన్నె నీటిలో 1–2 టేబుల్ స్పూన్ల వెనిగర్ కలిపి, అందులో పండ్లు, కూరగాయలను 10 నిమిషాలు నానబెట్టాలి. ఇది బ్యాక్టీరియా, కొంతవరకు పురుగుమందులను తొలగిస్తుంది. కానీ ఎక్కువగా వాడితే రుచి మారే అవకాశం ఉంటుంది.

గోరువెచ్చని నీటిలో నానబెట్టడం:

పండ్లు, కూరగాయలను గోరువెచ్చని నీటిలో 10 నిమిషాలు నానబెట్టాలి. కావాలంటే కొద్దిగా ఉప్పు కలపొచ్చు. ఇలా చేయడం వల్ల ఉపరితలంపై ఉన్న రసాయనాలు తొలగిపోతాయి. పండ్లు, కూరగాయలను తినే ముందు ఈ జాగ్రత్తలు పాటిస్తే, వాటిపై ఉన్న హానికర రసాయనాలను చాలా వరకు తొలగిపోతాయి. ఇది మీ ఆరోగ్యాన్ని కాపాడటానికి సహాయపడుతుంది.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

ఈ అపోహలు నమ్మితే బరువు తగ్గడం కష్టం

సమ్మర్‌లో రోజూ షూ వేసుకుంటున్నారా?

For More Latest News