అమెరికా దిగ్బంధం వేళ ఇరాన్ చమురు మంత్రి రాజీనామా.. తాత్కాలిక మంత్రిగా హమీద్ బోవర్డ్

టెహ్రాన్ (ఇరాన్), అక్టోబర్ 6: ఇరాన్ చమురు ఎగుమతులపై అమెరికా విధించిన కఠిన నౌకాదళ దిగ్బంధం, ఆర్థిక ఆంక్షల వల్ల ఆ దేశ ఇంధన రంగం తీవ్ర ఒత్తిడికి లోనవుతున్న వేళ కీలక పరిణామం చోటుచేసుకుంది. ఇరాన్ చమురు శాఖ మంత్రి మోహ్‌సేన్ పాక్‌నెజాద్ తన పదవికి రాజీనామా చేశారు. ఇరాన్ అధ్యక్షుడు మసౌద్ పెజెష్కియాన్ ఈ రాజీనామాను ఆమోదించి, నేషనల్ ఇరానియన్ ఆయిల్ కంపెనీ (NIOC) చీఫ్ హమీద్ బోవర్డ్‌ను తాత్కాలిక చమురు మంత్రిగా నియమించారు. (Iran Oil Minister Resignation)

వ్యక్తిగత కారణాలతో పాక్‌నెజాద్ రాజీనామా కోరగా, మొదట్లో అధ్యక్షుడు పెజెష్కియాన్ నిరాకరించారు. కానీ ఆయన తన నిర్ణయానికే కట్టుబడటంతో అధ్యక్షుడు రాజీనామాను ఆమోదించి, ఆయన సేవలను ప్రశంసించారు. కాగా, హోర్ముజ్ జలసంధి ప్రాంతంలో ఉద్రిక్తతల నేపథ్యంలో ఇరాన్ రేవుల నుంచి చమురు ఎగుమతులు జరగకుండా అమెరికా కఠిన ఆంక్షలు, నౌకాదళ దిగ్బంధం విధించింది. దీంతో ఇరాన్ ఆర్థిక వ్యవస్థ తీవ్ర సంక్షోభంలో కూరుకుపోయింది.

అమెరికా చర్యల వల్ల చమురు ఆదాయం నిలిచిపోవడమే కాకుండా, టెహ్రాన్, ఇతర ఇరాన్ నగరాల్లోని పెట్రోల్ బంకుల వద్ద భారీ క్యూ లైన్లు ప్రత్యక్షమయ్యాయి. ఇరాన్ రవాణా, ఆటోమోటివ్, రైల్వే రంగాలపై అమెరికా కొత్త ఆంక్షలు విధించింది. ఇరాన్ చమురు ఆదాయ మార్గాలను పూర్తిగా మూసివేయడమే తమ లక్ష్యమని అమెరికా పేర్కొంది.

ఇరాన్ ప్రభుత్వ ఆర్థిక మూలాలను తుడిచిపెట్టడమే మా లక్ష్యమని, వారి చమురు ఆదాయ మార్గాలన్నింటినీ పూర్తిగా అడ్డుకుంటామని అమెరికా ట్రెజరీ కార్యదర్శి స్కాట్ బెస్సెంట్ చెప్పారు.

ప్రపంచ చమురు, ద్రవీకృత సహజ వాయువు (LNG) రవాణాలో 20శాతం వాటా కలిగిన హోర్ముజ్ జలసంధి మూతపడటం, ఇరాన్ చమురు ఎగుమతులు స్తంభించిపోవడంతో ప్రపంచ ఇంధన మార్కెట్లో అనిశ్చితి నెలకొంది. అంతర్గతంగా చమురు కొరత ఏర్పడటంతో ఇరాన్ ఇంధన రంగాన్ని పునరుద్ధరించడం నూతన మంత్రి హమీద్ బోవర్డ్‌కు సవాలుగా మారింది.

ఈ వార్తలు కూడా చదవండి

అత్యాచార ఘటనలపై సుప్రీంకోర్టు సీరియస్.. నేరస్థుల్లో భయం పుట్టించాలంటూ.

ఐక్యరాజ్యసమితి ప్రాధాన్యం కోల్పోతోంది.. సంస్కరణలు తప్పనిసరి: జైశంకర్