అనైతిక చర్యకు పాల్పడ్డారని బంగ్లా జంటకు సౌదీలో ఉరిశిక్ష అమలు!

ఇంటర్‌నెట్ డెస్క్: మక్కా మసీదు నగరంలో అనైతిక చర్యకు పాల్పడ్డారన్న ఆరోపణలపై ఒక బంగ్లాదేశీ జంటను ఈనెల 14న సౌదీ అరేబియా ప్రభుత్వం ఉరితీసింది. వారు అనైతిక చర్యకు పాల్పడ్డారని కోర్టు ఆ జంటను దోషిగా తేల్చింది. తజిర్(ఇస్లామిక్ చట్టాల్లో ఒకటిది) చట్టం ప్రకారం.. వారు నేరానికి పాల్పడ్డారని న్యాయాధికారులు నిర్ధారించారని సౌదీ అంతర్గత మంత్రిత్వశాఖ తెలిపింది. బంగ్లాదేశీ జంట అనైతిక చర్యకు పాల్పడడం వల్లే వారిని ఉరితీశారని ఆ శాఖ వెల్లడించింది. అయితే, ఆ జంట పాల్పడిన అనైతిక చర్య ఏమిటో ఆ శాఖ స్పష్టంగా వెల్లడించలేదు. అలాగే, తమ పౌరులను ఉరితీసిన విషయాన్ని సౌదీ ప్రభుత్వం తమకు సమాచారం ఇవ్వలేదని బంగ్లాదేశ్ తెలిపింది.

సౌదీ ప్రెస్ ఏజెన్సీ వెల్లడించిన వివరాల ప్రకారం.. నజ్రుల్ ఇస్లాం అబ్దుల్ బషీర్, సితి అక్తర్​లను బంగ్లాదేశీయులుగా గుర్తించినట్టు అంతర్గత మంత్రిత్వశాఖ పేర్కొంది. అయితే వారు భార్యాభర్తలా అన్నది తెలియరాలేదు. ఇటీవలే మక్కా మసీదులో ఆ జంట అనైతిక చర్యకు పాల్పడిందని ఆ శాఖ తెలిపింది. దీంతో భద్రతా అధికారులు వారిని అరెస్ట్ చేసి దర్యాప్తు జరిపి అభియోగాలు మోపారు. తర్వాత వారిద్దరినీ కోర్టులో ప్రవేశపెట్టారు. అధికారులు వారిపై మోపిన అభియోగాలను కోర్టు ధ్రువీకరించింది. తర్వాత ఆ జంటకు మరణశిక్ష విధిస్తూ తీర్పు వెలువరించింది. ఈనెల 14న వారిని ఉరితీసినట్లు సౌదీ అంతర్గత మంత్రిత్వశాఖ వెల్లడించింది. మరోవైపు తమ దేశ పౌరులను సౌదీ ప్రభుత్వం ఉరితీయడంపై బంగ్లాదేశ్ ప్రభుత్వం తీవ్రంగా అభ్యంతరం వ్యక్తం చేసింది. కాగా.. మక్కా మసీదు లోపల ఆ జంట ముద్దుపెట్టుకుని ఉంటారని సోషల్ మీడియాలో పలువురు భావిస్తున్నారు.

ఈ వార్తలూ చదవండి

ముంబై కుర్లాలో భారీ అగ్నిప్రమాదం.. ముగ్గురు చిన్నారులు సహా 9 మందికి గాయాలు

వెయ్యిసార్లైనా కన్నడిగులకు క్షమాపణ చెబుతా.. పహల్గామ్ దాడితో పోలికపై సోనూ నిగమ్ సారీ..