MPPS మిట్టకొడూర్‌లో RAISE 100వ గ్రంథాలయం.. విద్యార్థుల్లో పఠనాసక్తికి ఊతం
ABN , Publish Date - Sep 10 , 2026 | 08:58 PM
పాఠశాలల్లో గ్రంథాలయాలను ఏర్పాటు చేసి, విద్యార్థుల్లో పఠనాసక్తిని పెంపొందించడమే లక్ష్యంగా పనిచేస్తున్న RAISE కార్యక్రమం ఎంపీపీఎస్ మిట్టకొడూర్ పాఠశాలలో 100వ గ్రంథాలయాన్ని ఏర్పాటుచేసి మరో కీలక మైలురాయిని చేరుకుంది.
పరిగి, సెప్టెంబర్ 10 (ఆంధ్రజ్యోతి): పాఠశాలల్లో గ్రంథాలయాలను ఏర్పాటు చేసి, విద్యార్థుల్లో పఠనాసక్తిని పెంపొందించడమే లక్ష్యంగా పనిచేస్తున్న RAISE(Reading and Academic Improvement through School Libraries and Education) కార్యక్రమం ఎంపీపీఎస్ మిట్టకొడూర్ పాఠశాలలో 100వ గ్రంథాలయాన్ని ఏర్పాటుచేసి మరో కీలక మైలురాయిని చేరుకుంది.
ఎస్ఆర్టీ ఫౌండేషన్ ఆధ్వర్యంలో తన్వీ కొడాలి జనవరి 2025లో ప్రారంభించిన RAISE, ఏడాదిన్నరలోనే 100 పాఠశాలలకు గ్రంథాలయ వనరులను అందించింది. వనరులు పరిమితంగా ఉన్న పాఠశాలల్లో విద్యార్థులకు పాఠ్యపుస్తకాలకు మించి చదివే అవకాశాలు తక్కువగా ఉండటాన్ని గుర్తించి ఈ కార్యక్రమాన్ని ప్రారంభించారు. RAISE ద్వారా పాఠశాలల్లో ఉపయోగకరమైన గ్రంథాలయాలను ఏర్పాటు చేయడం సహా విద్యార్థుల వయసు, ఆసక్తులకు అనుగుణంగా పుస్తకాలను ఎంపిక చేసి, వారు సులభంగా చదువుకునేలా పఠన ప్రదేశాలను రూపొందిస్తున్నారు. ఈ కార్యక్రమానికి సంబంధించిన ఖర్చులను తన్వి కొడాలి స్వయంగా భరిస్తున్నారు.
'100వ గ్రంథాలయం RAISE ప్రయాణంలో ఓ ముఖ్యమైన మైలురాయి మాత్రమే. ఇది ముగింపు కాదు. మరిన్ని పాఠశాలలకు పఠన వనరులను చేరువ చేయడమే మా తదుపరి లక్ష్యం' అని తన్వీ కొడాలి తెలిపారు. RAISE కార్యక్రమం SDG 4 - నాణ్యమైన విద్య, SDG 10 - అసమానతల తగ్గింపు లక్ష్యాలకు అనుగుణంగా కొనసాగుతోంది.
'ఎస్‌ఆర్‌టి ఫౌండేషన్ సేవలు అభినందనీయం'
ఎస్ఆర్టీ ఫౌండేషన్ సేవలు అభినందనీయమని పరిగి ఎంఈవో ఎం.అంజయ్య, మిట్టకోడూరు గ్రామ సర్పంచ్ పి.మాణిక్యం అన్నారు. ఎస్‌ఆర్‌టి సంస్థ ఆధ్వర్యంలో బుధవారం మండల పరిధిలోని మిట్టకోడూరు ప్రాథమిక పాఠశాలలో RAISE కార్యక్రమం కింద 100వ గ్రంథాలయాన్ని ఏర్పాటు చేసి ప్రారంభించారు. ఈ సందర్భంగా మాట్లాడుతూ, విద్యార్థులకు ప్రాథమిక దశ నుంచే పుస్తక పఠనాన్ని అలవాటు చేయాలని సూచించారు. పాఠశాల అభివృద్ధికి, విద్యార్థులకు ప్రగతికి దాతల సహకారం అవసరమన్నారు. ఎస్ఆర్టీ ప్రతినిధులు కొడాలి తన్వి, రమ్యలు సేవలు పాఠశాలల్లో చిరస్థాయిగా నిలిచిపోతాయన్నారు. లైబ్రరీలో విద్యార్థులకు ఉపయోగపడే పుస్తకాలను ఉచితంగా పంపిణి చేయడం సంతోషకరమన్నారు.
ఎస్ఆర్టీ ఫౌండేషన్ వ్యవస్థపకురాలు కొడాలి తన్వి, కార్యదర్శి రమ్యలు మాట్లాడుతూ.. ప్రభుత్వ పాఠశాలల్లోని విద్యార్థుల్లో పఠనాసక్తిని పెంపొందించేందుకే గ్రంథాలయాలను ఏర్పాటు చేస్తున్నట్లు తెలిపారు. రైస్‌-రీడీంగ్‌ అండ్‌ అకడమిక్‌, ఇప్రూవ్‌మెంట్‌, త్రో స్కూల్‌ లైబ్రరీ అండ్‌ ఎడ్యుకేషన్‌ కార్యక్రమాన్ని నిర్వహిస్తున్నట్లు తెలిపారు. గతేడాది ప్రారంభించిన సంస్థ ఇప్పటివరకు 100 పాఠశాలల్లో లైబ్రరీలు ఏర్పాటు చేశామని తెలిపారు. నాణ్యమైన విద్య, ఎస్‌డీజీ 10, అసమానతల తగ్గింపు లక్ష్యాల కోసం పని చేస్తుందన్నారు. విద్యార్థుల్లో ఆలోచన ప్రపంచాన్ని విస్తరించే శక్తి, కొత్త విషయాలను తెలుసుకోవడానికి, ప్రశ్నించడానికి, ఊహించడానికి కలలు కనడానికి పఠనం ఎంతో కీలకమన్నారు. కార్యక్రమంలో పాఠశాల హెచ్‌ఎం ఎండీ ఉస్మాన్‌ అలీ, పాఠశాల కమిటీ ఛైర్‌పర్సన్‌ అనిత, ఉప సర్పంచ్ మల్లేశం, ఉపాద్యాయులు ఎ.కృష్ణయ్య, నర్సింహులు, రాజు, కవిత, ఎమ్మార్సీ శ్రీశైలం పాల్గొన్నారు. అనంతరం పోటీల్లో ప్రతిభ చాటిన విద్యార్థులకు బహుమతులు ప్రదానం చేశారు.
ఇవీ చదవండి:
బ్రిక్స్‌ సదస్సుకు ముందు భారత్-రష్యా మధ్య భారీ డీల్
ఆస్తి కోసం కొడుకు కుట్ర.. తల్లి కాళ్లు పట్టుకుని క్షమాపణలు కోరమన్న సుప్రీంకోర్టు
