IPL 2026: ఢిల్లీ క్యాపిటల్స్కు కొత్త కెప్టెన్.. ఎవరో తెలుసా?
ABN , Publish Date - Dec 22 , 2025 | 08:37 PM
ఐపీఎల్ 2026 సంబంధించి ఇప్పటికే మినీ వేలం పూర్తయింది. ఈ నేపథ్యంలో ఢిల్లీ క్యాపిటల్స్ ఫ్రాంచైజీ ఓ కీలక నిర్ణయం తీసుకున్నట్లు తెలుస్తోంది. అక్షర్ పటేల్ను తొలగించి.. కేఎల్ రాహుల్కి కెప్టెన్సీ బాధ్యతలు అప్పగించనున్నట్లు సమాచారం.
ఇంటర్నెట్ డెస్క్: ఐపీఎల్ 2026 సందడి ఇప్పటికే మొదలైంది. ఇటీవలే దీనికి సంబంధించిన మినీ వేలం కూడా పూర్తయింది. ఐపీఎల్కి సంబంధించి ఏ వార్త అయిన ఇట్టే వైరల్ అవుతూ ఉంటుంది. తాజాగా ఓ వార్త సోషల్ మీడియాలో తెగ హల్చల్ చేస్తోంది. ఢిల్లీ క్యాపిటల్స్(DC) ఫ్రాంచైజీ ఓ కీలక నిర్ణయం తీసుకున్నట్లు తెలుస్తోంది. గతేడాది ఆ జట్టుకు కెప్టెన్గా వ్యవహరించిన అక్షర్ పటేల్(Axar Patel)ను ఈ సీజన్లో ఆ బాధ్యతల నుంచి తప్పిస్తున్నట్లు సమాచారం.
గత సీజన్లో ఢిల్లీకి రిషభ్ పంత్ స్థానంలో అక్షర్ పటేల్కు కెప్టెన్సీ పగ్గాలు దక్కాయి. ఆ ఫ్రాంచైజీ ఆశించిన స్థాయిలో ఫలితాలు రాబట్టలేకపోయింది. మరోవైపు కేఎల్ రాహుల్ వంటి సీనియర్ ప్లేయర్లు జట్టులో ఉన్నాడు. దీంతో కేఎల్ రాహుల్(KL Rahul) నాయకత్వంలో జట్టును మరింత బలోపేతం చేసేందుకు ఢిల్లీ మేనేజ్మెంట్ భావిస్తోంది. గతంలో పంజాబ్ కింగ్స్, లఖ్నవూ సూపర్ జెయింట్స్కి కేఎల్ రాహుల్ నాయకత్వం వహించిన విషయం తెలిసిందే.
అక్షర్ పటేల్ విషయానికొస్తే..
అక్షర్ పటేల్ ఢిల్లీ క్యాపిటల్స్ జట్టులో అత్యంత కీలకమైన ఆటగాడు. గత ఆరేళ్లుగా జట్టుకు ప్రధాన బలంగా కొనసాగుతున్నాడు. ఒకవేళ కెప్టెన్సీ నుంచి తప్పించినప్పటికీ.. కీలక ప్లేయర్గా జట్టులోనే కొనసాగుతాడు. కెప్టెన్సీ ఒత్తిడి లేకుండా అక్షర్ కేవలం తన ఆల్రౌండ్ ప్రదర్శనపై దృష్టి పెడితే జట్టుకు మరింత ప్రయోజనం ఉంటుందని కోచింగ్ స్టాఫ్ భావిస్తున్నట్లు టాక్. కాగా ఈ విషయంపై ఢిల్లీ క్యాపిటల్స్ ఫ్రాంచైజీ త్వరలోనే అధికారిక ప్రకటన చేయనున్నట్లు తెలుస్తోంది.
ఇవీ చదవండి:
క్రికెట్కు వీడ్కోలు పలికిన స్టార్ ప్లేయర్
ఇప్పటికీ అదే మాట అంటా.. ఆసీస్ ఓ చెత్త జట్టు: స్టువర్ట్ బ్రాడ్
