Mukkoti Ekadashi: ఈ ఏడాది ప్రత్యేకంగా ముక్కోటి ఏకాదశి

ఏలూరు జిల్లా, డిసెంబరు 28 (ఆంధ్రజ్యోతి): ద్వారకా తిరుమలకు (Dwaraka Tirumala) ఈనెల 30వ తేదీన ముక్కోటి ఏకాదశి (Mukkoti Ekadashi) సందర్భంగా భక్తులు భారీగా తరలి రానున్నారు. భక్తుల రద్దీని దృష్టిలో ఉంచుకుని ఆలయ అధికారులు అన్ని ఏర్పాట్లు చేస్తున్నారు. సామాన్య భక్తులతో పాటు వీఐపీలు కూడా వచ్చే అవకాశం ఉందని ఆలయ అధికారులు తెలిపారు. ఈ నేపథ్యంలో పోలీసులు కూడా కట్టుదిట్టమైన ఏర్పాట్లు చేస్తున్నారు. ఈ ఏడాది స్వామివారి గిరిప్రదక్షణ, నిజరూప దర్శనంతో పాటు ప్రత్యేక పూజలు జరుగుతాయని ఆలయ అధికారులు పేర్కొన్నారు.

గిరి ప్రదక్షణ..

స్వామివారి గిరి ప్రదక్షణ ఈనెల 29వ తేదీన మధ్యాహ్నం 2 గంటలకు ప్రారంభం కానుంది. ఆలయ మొదటి మెట్టు వద్ద నుంచి ఈ ప్రదక్షణ మొదలుకానుంది. గిరి ప్రదక్షణ ఆలయం నుంచి సుమారు 5 కిలోమీటర్ల దూరం వరకు కొనసాగుతుంది. గిరి ప్రదక్షణ నేపథ్యంలో భక్తులు స్వామి వారి ఆలయం చుట్టూ పాదయాత్ర చేస్తారు.

నిజరూప దర్శనం

ఆలయంలో స్వామి వారి నిజరూప దర్శనం ఈనెల 29వ తేదీ సాయంత్రం 6 గంటలకు ఉండనుంది. ఈ క్రమంలో భక్తులు స్వామి వారి పూజా అర్చనలో పాల్గొని నిజరూపాన్ని ప్రత్యక్షంగా దర్శించుకునే అవకాశాన్ని ఆలయ అధికారులు కల్పిస్తారు. ఇందుకోసం అన్ని ఏర్పాట్లు చేస్తున్నారు.

ముక్కోటి ఏకాదశి..

ఈనెల 30వ తేదీన ముక్కోటి ఏకాదశి సందర్భంగా ఉదయం 5 గంటల నుంచి ఉత్తర ద్వార దర్శనం ప్రారంభం అవుతుంది. భక్తులు ఉత్తర ద్వారం ద్వారా స్వామి వారి దర్శనాన్ని చేసుకుంటారు.

ప్రత్యేక క్యూ లైన్లు..

ఉత్తర ద్వార దర్శనం కోసం ప్రత్యేక క్యూ లైన్లు ఏర్పాటు చేశారు. వీటిలో రూ. 100, 200, 500ల టికెట్లపై ప్రత్యేక దర్శనపు క్యూలైన్లు ఏర్పాటు చేసినట్లు ఆలయ అధికారులు ప్రకటించారు. భక్తులు ఈ టికెట్లను కొనుగోలు చేసి, త్వరగా దర్శనం తీసుకోవడానికి వీలైన మార్గాలను ఉపయోగించుకోవచ్చని సూచించారు.

భక్తుల కోసం ప్రత్యేక ఏర్పాట్లు

భక్తులకు ఎలాంటి ఇబ్బంది లేకుండా ఆలయ అధికారులు విస్తృతమైన ఏర్పాట్లు చేపట్టారు. ఆలయ పరిసరాల్లో పార్కింగ్, భక్తుల అవసరాలకు అనుగుణంగా ఇతర సేవలు అందిస్తామని ఆలయ అధికారులు పేర్కొన్నారు.