అఫ్గానిస్థాన్‌తో టీ20 సిరీస్: బరిలోకి బుమ్రా.. పేస్ వేగానికి వైభవ్ విలవిల!

ఇంటర్నెట్ డెస్క్: గాయం కారణంగా దాదాపు మూడు నెలలు జట్టుకు దూరంగా ఉన్న భారత స్టార్ పేసర్ జస్‌ప్రీత్ బుమ్రా ఎట్టకేలకు మైదానంలోకి దిగాడు. అఫ్గానిస్థాన్‌తో మూడు టీ20ల సిరీస్‌కు బుమ్రా పూర్తి ఫిట్‌నెస్ సాధించాడు. శుక్రవారం ఢిల్లీలోని అరుణ్ జైట్లీ స్టేడియంలో అతడు నెట్ ప్రాక్టీస్ చేశాడు. తనదైన పేస్‌, స్వింగ్‌, యార్కర్లతో నెట్స్‌లో బ్యాటర్లను ఇబ్బందిపెట్టాడు.

15 ఏళ్ల యువ సంచలనం వైభవ్‌ సూర్యవంశీకి బుమ్రా కొన్ని బుల్లెట్ బంతులు సంధించాడు. వైభవ్‌ భారత టీ20 జట్టులో చోటు దక్కించుకున్నప్పటి నుంచి బుమ్రా జట్టులో లేడు. ఇంగ్లండ్‌లో టీ20 సిరీస్‌కు దూరంగా ఉన్న అతడు వన్డేలకు జట్టుతో కలిశాడు. అయితే ఇప్పుడు కోట‍్లా మైదానంలో ఇద్దరూ ఒకే నెట్స్‌లో కనిపించడం విశేషం. బుమ్రా వేసిన తొలి బంతి గుడ్‌ లెంగ్త్‌లో పడగా.. వైభవ్‌ దానిని ఆడేందుకు ప్రయత్నించి పూర్తిగా విఫలమయ్యాడు. రెండో బంతి కూడా అదే లెంగ్త్‌లో పడటంతో ఆ వేగానికి యువ బ్యాటర్‌ ఉక్కిరిబిక్కిరయ్యాడు. బంతి అతడి బ్యాట్‌ను దాటుకుంటూ వెళ్లింది. మూడో బంతిని బుమ్రా యార్కర్‌గా సంధించాడు. వైభవ్‌ ఎలాగోలా బ్యాట్‌ అడ్డుపెట్టి బంతిని అడ్డుకున్నాడు. నాలుగో బంతిని కాస్త బ్యాక్‌ ఆఫ్‌ లెంగ్త్‌లో వేయగా.. వైభవ్‌ బ్యాట్‌ అంచును తాకుతూ బంతి వెళ్లింది. నాలుగు బంతుల్లోనే బుమ్రా తన మార్క్‌ ఏమిటో చూపించాడు. అంతర్జాతీయ క్రికెట్‌లో అత్యుత్తమ పేస్‌ దాడులను ఎదుర్కొనేందుకు వైభవ్‌కు ఎలాంటి సవాళ్లు ఎదురవుతాయో ఈ స్పెల్‌ ఓ చిన్న ట్రైలర్‌లా కనిపించింది. శ్రీలంక పర్యటనలో బుమ్రాను ఎంపిక చేసినా.. ఫిట్‌నెస్ సాధించకపోవడంతో తుది జట్టులోకి తీసుకోలేదు. ఫిట్‌ అయితేనే ఆడించే కండిషన్‌తో అఫ్గానిస్థాన్ సిరీస్‌కు అతడిని ఎంపిక చేశారు. ప్రాక్టీస్ సెషన్‌తో బుమ్రా ఈసారి కచ్చితంగా బరిలోకి దిగుతాడని స్పష్టమవుతోంది.

ఇవి కూడా చదవండి:

రాహుల్ ద్రవిడ్ యజమానిలానే వ్యవహరిస్తున్నాడు: కోచ్ విక్రమ్ రాథోడ్

సచిన్ రికార్డుపై జో రూట్ కన్ను.. వివ్ రిచర్డ్స్ సంచలన వ్యాఖ్యలు