ఐపీఎల్ 2026: సన్‌రైజర్స్‌పై పంజాబ్ కింగ్స్ ఘన విజయం

ఇంటర్నెట్ డెస్క్: ఐపీఎల్ 2026లో పంజాబ్ కింగ్స్ మూడో విజయాన్ని నమోదు చేసింది. ముల్లాన్‌పుర్ వేదికగా సన్‌రైజర్స్ హైదరాబాద్‌తో జరిగిన మ్యాచ్‌లో పంజాబ్ ఆరు వికెట్ల తేడాతో ఘన విజయం సాధించింది. ఎస్ఆర్‌హెచ్ నిర్దేశించిన 220 పరుగుల లక్ష్యాన్ని 18.5 ఓవర్లలోనే ఛేదించింది. 4 వికెట్లు కోల్పోయి 223 పరుగులు చేసింది. ఎస్ఆర్‌హెచ్ బ్యాటర్లు విధ్వంసం సృష్టించినప్పటికీ బౌలర్లు పూర్తిగా తేలిపోయారు. ఫలితంగా.. హైదరాబాద్ మూడో ఓటమిని చవి చూసింది.

భారీ లక్ష్యంతో బరిలోకి దిగిన పంజాబ్ బ్యాటర్లు అద్భుతం చేశారు. ఓపెనర్లు ప్రియాంశ్ ఆర్య(57; 20 బంతుల్లో 5 ఫోర్లు, 5 సిక్స్‌లు), ప్రభ్‌సిమ్రన్ సింగ్(51; 25 బంతుల్లో 4 ఫోర్లు, 4 సిక్స్‌లు) హాఫ్ సెంచరీలతో చెలరేగిన వేళ.. పంజాబ్ గెలుపుకు నాంది పడింది. వీరిద్దరూ కలిసి తొలి వికెట్‌కు 38 బంతుల్లోనే 99 పరుగుల భాగస్వామ్యాన్ని నెలకొల్పారు. ఆ తర్వాత కూపర్ కనోలీ(11), నేహాల్ వధేరా(14) వెనువెంటనే ఔట్ అయినప్పటికీ.. పంజాబ్ కెప్టెన్, మనందరి సర్పంచ్ సాబ్ శ్రేయస్ అయ్యర్(69*; 33 బంతుల్లో 5 ఫోర్లు, 5 సిక్స్‌లు) హాఫ్ సెంచరీతో చెలరేగి ఆఖరి వరకు క్రీజులో నిలబడి జట్టుకు విజయాన్ని అందించడంలో కీలక పాత్ర పోషించాడు. శశాంక్ సింగ్(16*) నాటౌట్‌గా నిలిచాడు. హైదరాబాద్ బౌలర్లలో శివాంగ్ కుమార్ 3 వికెట్లతో రాణించాడు. హర్ష్ దూబె 1 వికెట్ పడగొట్టాడు.

అంతకు ముందు టాస్ ఓడి బ్యాటింగ్ చేసిన హైదరాబాద్ జట్టు.. నిర్ణీత 20 ఓవర్లలో 6 వికెట్లు కోల్పోయి 219 పరుగులు చేసింది. అభిషేక్ శర్మ(74) హాఫ్ సెంచరీ చేశాడు. ట్రావిస్ హెడ్(38), క్లాసెన్(39) రాణించారు. పంజాబ్ బౌలర్లలో అర్ష్‌దీప్ సింగ్, శశాంక్ సింగ్ తలో 2, బార్ట్‌లెట్ 1 వికెట్ పడగొట్టారు.

ఇవి కూడా చదవండి:

ఐపీఎల్ 2026: అభిషేక్ శర్మ హాఫ్ సెంచరీ.. పంజాబ్ కింగ్స్ టార్గెట్ 220

బాల్ టాంపరింగ్‌ను చట్టబద్ధం చేయాలి.. ఇంగ్లండ్ మాజీ క్రికెటర్ సంచలన వ్యాఖ్యలు