ఫిఫా ప్రపంచ కప్‌: ట్రంప్ జోక్యం.. యూఎస్ ప్లేయర్‌పై నిషేధం ఎత్తివేత!

ఇంటర్నెట్ డెస్క్: ఫిఫా ప్రపంచ కప్ 2026లో రౌండ్ ఆఫ్ 32లో జరిగిన మ్యాచ్‌లో అమెరికా ఫుట్‌బాలర్ పోలారిన్ బలోగన్‌పై రిఫరీ రెడ్ కార్డ్ చూపించారు. దీంతో బెల్జియంతో జరిగే మ్యాచ్‌కు అతడిపై నిషేధం పడింది. అయితే బలోగన్‌పై ఉన్న ఒక మ్యాచ్ నిషేధాన్ని ఫిఫా ఎత్తివేయడం ఇప్పుడు తీవ్ర వివాదానికి దారితీసింది. అమెరికా అధ్యక్షుడు డొనాల్డ్ ట్రంప్ నేరుగా ఫిఫా అధ్యక్షుడు జియానీ ఇన్ఫాంటినోతో ఫోన్‌లో మాట్లాడిన తర్వాతే ఈ నిర్ణయం వెలువడిందన్న వార్తలు ప్రపంచ ఫుట్‌బాల్‌ వర్గాల్లో సంచలనం సృష్టించాయి. దీంతో క్రీడల్లో రాజకీయ జోక్యంపై పలువురు విమర్శలు చేస్తున్నారు.

అమెరికా ప్రభుత్వానికి చెందిన ఓ అధికారి ఈ విషయంపై మాట్లాడారు. ‘బలోగన్‌కు రెడ్ కార్డు ఎందుకు ఇచ్చారు? ఎందుకు సస్పెన్షన్ విధించారు? అనే అంశంపై అధ్యక్షుడు ట్రంప్ ఫిఫా అధ్యక్షుడు ఇన్ఫాంటినోతో మాట్లాడారు. అనంతరం అప్పీల్ ప్రక్రియలో అమెరికా ప్రభుత్వం అదనపు ఆధారాలు సమర్పించింది. స్వతంత్ర కమిటీ వాటిని పరిశీలించి తుది నిర్ణయం తీసుకుంది’ అని వెల్లడించారు.

బోస్నియా-హెర్జెగొవినాపై జరిగిన గ్రూప్ మ్యాచ్‌లో 64వ నిమిషంలో ప్రత్యర్థిని కాలుతో అడ్డుకున్నందుకు బలోగన్‌కు రిఫరీ రెడ్ కార్డు చూపించారు. సాధారణంగా రెడ్ కార్డ్ అందుకున్న ప్లేయర్ ఒక మ్యాచ్ నిషేధం ఎదుర్కొవాల్సి ఉంటుంది. అయినప్పటికీ ఫిఫా క్రమశిక్షణ కమిటీ ఆ సస్పెన్షన్‌ను అమలు చేయకుండా నిలిపివేసింది. ఈ మేరకు అధికారికంగా ఆ విషయాన్ని ధ్రువీకరించింది. దీంతో బెల్జియంతో జరిగే ప్రిక్వార్టర్స్ మ్యాచ్‌కు బలోగన్ అందుబాటులోకి వచ్చాడు. ఇప్పటికే ఈ ప్రపంచ కప్‌లో మూడు గోల్స్ చేసిన అతడు.. అమెరికాలో కీలక ఆటగాడిగా కొనసాగుతున్నాడు.

ఫిఫాకు ధన్యవాదాలు: ట్రంప్

బలోగన్‌పై నిషేధం ఎత్తివేయగానే అమెరికా అధ్యక్షుడు ట్రంప్ సోషల్ మీడియా వేదికగా స్పందించారు. ‘సరైన నిర్ణయం తీసుకున్నారు. ప్లేయర్‌కు అన్యాయం జరగకుండా చూసిన ఫిఫాకు ధన్యవాదాలు’ అని ఎక్స్‌లో పేర్కొన్నారు. అయితే ఫిఫా నిర్ణయంపై బెల్జియం ఫుట్‌బాల్ సమాఖ్య తీవ్ర అభ్యంతరం వ్యక్తం చేసింది. నిబంధనలను తప్పుగా అమలు చేశారని ఆరోపిస్తూ అన్ని న్యాయపరమైన అవకాశాలను పరిశీలిస్తున్నట్లు వెల్లడించింది.

నార్వే ప్రధాన కోచ్ స్టాలే సోల్‌బక్కెన్ కూడా ఫిఫాపై తీవ్ర విమర్శలు గుప్పించాడు. ‘రెడ్ కార్డు ఇచ్చారు.. వీఏఆర్ కూడా దానిని సమర్థించింది. అలాంటప్పుడు ఒక మ్యాచ్ నిషేధం తప్పనిసరి. ఇప్పుడు దాన్ని రద్దు చేయడం పెద్ద తప్పు. అమెరికా గెలిచినా ఈ వివాదం వారి విజయంపై నీడలా వెంటాడుతుంది. ఇకపై ప్రతి రెడ్ కార్డుపైనా రాజకీయ ఒత్తిడి వస్తే పరిస్థితి ఏమిటి? ఇది ప్రపంచ కప్ ప్రతిష్ఠను దెబ్బతీసే నిర్ణయం’ అని సోల్‌బక్కెన్ మండిపడ్డాడు.

ఇవి కూడా చదవండి:

ఇదే నాకు చివరి ప్రపంచ కప్: క్రిస్టియానో రొనాల్డో

ప్రపంచ కప్ నుంచి బ్రెజిల్ ఔట్.. నెయ్‌మార్ రిటైర్‌మెంట్