ఢిల్లీ మెట్రోలో అనుమానాస్పద పదార్థం.. ప్రయాణికుడు పట్టివేత

ఇంటర్నెట్ డెస్క్: ఢిల్లీలోని జామా మసీద్ మెట్రో స్టేషన్‌లో భద్రతా సిబ్బందిని చూసి పరారయ్యేందుకు యత్నించిన ఓ అనుమానిత ప్రయాణికుడిని సెంట్రల్ ఇండస్ట్రియల్ సెక్యూరిటీ ఫోర్స్ (సీఐఎస్ఎఫ్) సిబ్బంది పట్టుకున్నారు. సాధారణ తనిఖీల్లో భాగంగా ఎక్స్-రే స్కానింగ్ చేస్తుండగా, అతడి లగేజీలో అనుమానాస్పదంగా దట్టమైన వస్తువు ఉన్నట్లు గుర్తించారు. దీంతో మరింత లోతుగా తనిఖీ చేసేందుకు సిబ్బంది ప్రయత్నించగా, ఆ వ్యక్తి అక్కడి నుంచి పారిపోయేందుకు యత్నించాడు. స్టేషన్ ఎగ్జిట్ గేట్ వద్ద సిబ్బంది అతన్ని వెంబడించి అదుపులోకి తీసుకున్నారు.

ఈ తనిఖీల్లో ఆ వ్యక్తి ధరించిన లోవస్త్రాల కుట్ల మధ్యలో గుర్తు తెలియని అర్ధ-ఘన పదార్థం ఉన్నట్లు గుర్తించారు. తాను కౌలాలంపూర్‌లో నివసించే నాన్-రెసిడెంట్ ఇండియన్ (NRI) అని సదరు వ్యక్తి పేర్కొన్నాడు. అయితే అతని వద్ద లభించిన ఆ పదార్థం ఏంటనేది అధికారులు ఇంకా నిర్ధారించబడలేదు.ఈ ఘటనకు సంబంధించిన వీడియో ప్రస్తుతం సామాజిక మాధ్యమాల్లో వైరల్‌గా మారింది. భద్రతా సిబ్బంది ఆ ప్రయాణికుడిని, స్వాధీనం చేసుకున్న వస్తువులను తదుపరి విచారణ నిమిత్తం స్థానిక పోలీసులకు అప్పగించారు. ఆ పదార్థం స్వభావం ఏమిటి, అతను ఎందుకు పారిపోవడానికి ప్రయత్నించాడు అనే కోణంలో పోలీసులు సమగ్రంగా దర్యాప్తు చేస్తున్నారు. దీనికి సంబంధించిన పూర్తి వివరాలు తెలియాల్సి ఉంది.

ఈ వార్తలూ చదవండి:

విజయవాడ ఉత్సవ్ ముగింపు వేడుకలు.. 2 వేల మంది కళాకారులతో దసరా కార్నివాల్

సీజేపీ నేతలు అశుతోశ్ రాంకా, సౌరవ్ కస్టడీ మరో 2 రోజుల పొడిగింపు

టైగర్‌ ష్రాఫ్‌పై కాల్పుల ఘటన.. బయటకొచ్చిన నిందితుల ఫొటో