తృణమూల్ కాంగ్రెస్‌కు నేతాజీ బంధువు చంద్ర కుమార్ బోస్ రాజీనామా

కోల్‌కతా, ఆగస్టు 3: పశ్చిమ బెంగాల్ రాజకీయంలో మరో కీలక పరిణామం చోటుచేసుకుంది. నేతాజీ సుభాష్ చంద్రబోస్ మనుమడు చంద్రకుమార్ బోస్ తృణమూల్ కాంగ్రెస్ (TMC) ప్రాథమిక సభ్యత్వానికి రాజీనామా చేశారు. 'వ్యక్తిగత కారణాల వల్ల' పార్టీ వీడుతున్నట్లు వెల్లడిస్తూ సీఎం మమతా బెనర్జీకి ఆయన తన రాజీనామా లేఖను పంపించారు.

ఈ నిర్ణయానికి కొన్ని గంటల ముందు ఆయన సోషల్ మీడియా 'X' వేదికగా రాజకీయ పార్టీల పనితీరుపై అసంతృప్తి వ్యక్తం చేస్తూ పోస్ట్ చేశారు. రాజకీయ పార్టీలు చాటుగా ఉండేవారికే ప్రాధాన్యం ఇస్తాయని, నేతాజీ కలలు కనిన సమగ్రమైన బలమైన భారతదేశాన్ని నిర్మించడంలో నేటి రాజకీయ వ్యవస్థ విఫలమైందని ఆయన ఆవేదన వ్యక్తం చేశారు.

బీజేపీ నుంచి టీఎంసీ వరకు.. బోస్ పొలిటికల్ జర్నీ

బీజేపీలో ప్రస్థానం: 2016లో భారతీయ జనతా పార్టీలో చేరిన చంద్రకుమార్ బోస్, అదే ఏడాది పశ్చిమ బెంగాల్ అసెంబ్లీ ఎన్నికల్లో, అలాగే 2019 లోక్‌సభ ఎన్నికల్లో పోటీ చేశారు. 2016లో బెంగాల్ బీజేపీ ఉపాధ్యక్షుడిగా కూడా బాధ్యతలు నిర్వహించారు.

బీజేపీ నుంచి నిష్క్రమణ: నేతాజీ లౌకిక, సమగ్ర జాతీయతా భావజాలాన్ని వ్యాప్తి చేయడంలో బీజేపీ విఫలమైందని ఆరోపిస్తూ 2023లో ఆ పార్టీకి రాజీనామా చేశారు.

టీఎంసీలోకి ప్రవేశం: గతంలో బీజేపీలో చేరడం ఒక 'పొరపాటు'గా అభివర్ణించిన చంద్రకుమార్ బోస్, బెంగాల్ అసెంబ్లీ ఎన్నికలకు ముందు మమతా బెనర్జీ సమక్షంలో టీఎంసీలో చేరారు. కానీ, నాలుగు నెలలు తిరగకముందే ఆ పార్టీకి కూడా స్వస్తి పలకడం గమనార్హం.

చంద్రకుమార్ బోస్ నేపథ్యం

చంద్రకుమార్ బోస్ భారతదేశంలో ఎంతో ఘనమైన రాజకీయ నేపథ్యం ఉన్న కుటుంబం నుంచి వచ్చారు. ఆయన మాజీ ఎంపీ, ప్రముఖ లాయర్ అమియా నాథ్ బోస్ కుమారుడు. కాంగ్రెస్ సీనియర్ నేత, బారిష్టర్, నేతాజీ సుభాష్ చంద్రబోస్ సోదరుడైన శరత్ చంద్రబోస్ మనుమడు.

విద్యాభ్యాసం, వ్యాపార రంగం: లండన్ హెండన్ కాలేజీ నుంచి ఎకనామిక్స్ గ్రాడ్యుయేషన్ పూర్తి చేసి, ఐఐఎమ్ (IIM) కలకత్తా పూర్వ విద్యార్థిగా పేరుపొందారు. రాజకీయాల్లోకి రాకముందు టాటా స్టీల్‌లో 18 ఏళ్ల పాటు ఉన్నత హోదాలో పనిచేశారు. 2004లో బోస్ ఇన్ఫర్మేషన్ టెక్నాలజీ అనే హెచ్‌ఆర్, స్కిల్ డెవలప్‌మెంట్ సంస్థను స్థాపించారు.

నేతాజీ ఫైళ్ల డీక్లాసిఫికేషన్: నేతాజీకి సంబంధించిన చారిత్రక రికార్డులు, రహస్య ఫైళ్లను బహిర్గతం చేయాలని కోరుతూ 'ఓపెన్ ప్లాట్‌ఫామ్ ఫర్ నేతాజీ' స్పోక్స్ పర్సన్‌గా సుదీర్ఘ పోరాటం చేశారు.

'వ్యక్తిగత కారణాల దృష్ట్యా, నేను తక్షణమే అమలయ్యేలా 'ఆల్ ఇండియా తృణమూల్ కాంగ్రెస్' ప్రాథమిక సభ్యత్వానికి రాజీనామా చేస్తున్నాను' అని ఆయన లేఖలో పేర్కొన్నారు. ఆయన రాజీనామాపై టీఎంసీ ఇంకా ఎటువంటి ప్రకటన చేయలేదు.

వార్తలు కూడా చదవండి...

కేంద్ర పన్నుల వాటాతో ఏపీ అభివృద్ధి మరింత వేగవంతం: సీఎం చంద్రబాబు

డ్రగ్స్ ర‌హిత ఏపీ కోసం కృషి చేస్తున్నాం: మంత్రి నారా లోకేశ్

పొగాకు రైతులకు భారీ సహాయ ప్యాకేజీ ప్రకటించిన కేంద్ర, రాష్ట్ర ప్రభుత్వాలు

Read Latest Telangana News And AP News And National News

And Telugu News