చర్మ సంరక్షణలో బొప్పాయి గింజల మ్యాజిక్‌

ఇంటర్నెట్ డెస్క్: బొప్పాయి తిన్న తర్వాత చాలామంది గింజలను పారేస్తుంటారు. కానీ ఈ చిన్న నల్ల గింజలు చర్మ సంరక్షణలో ఎంతో ఉపయోగపడతాయని నిపుణులు చెబుతున్నారు. బొప్పాయి గింజల్లో ఎంజైమ్‌లు, ఫ్లేవనాయిడ్లు, పాలీఫెనాల్స్‌, ఆరోగ్యకరమైన ఫ్యాటీ యాసిడ్లు ఉంటాయి. ఇవి చర్మంపై పేరుకుపోయిన మురికి, అదనపు నూనె, మృత కణాలను తొలగించడంలో సహాయపడతాయి. వీటిని క్రమం తప్పకుండా ఉపయోగిస్తే చర్మం సహజ కాంతిని పొందుతూ తాజాగా కనిపిస్తుంది.

చర్మానికి బొప్పాయి గింజల ప్రయోజనాలు

బొప్పాయి గింజలతో తయారు చేసే ఫేస్ స్క్రబ్ చర్మాన్ని సున్నితంగా ఎక్స్‌ఫోలియేట్ చేస్తుంది. దీంతో చర్మం నునుపుగా, మృదువుగా మారుతుంది. అలాగే చర్మాన్ని మెరుగుపరచడంలో సహాయపడుతుందని చెబుతున్నారు. ఇందులోని గుణాలు కొల్లాజెన్ ఉత్పత్తికి కూడా తోడ్పడతాయి. కొల్లాజెన్ చర్మాన్ని యవ్వనంగా, ఆరోగ్యంగా ఉంచడంలో ముఖ్యపాత్ర పోషిస్తుంది. అందువల్ల బొప్పాయి గింజల స్క్రబ్ వాడితే చర్మం మరింత కాంతివంతంగా కనిపించే అవకాశం ఉంటుంది.

ఇంట్లోనే ఫేస్ స్క్రబ్

ముందుగా బొప్పాయి గింజలను శుభ్రంగా కడిగి కొద్దిగా ఆరనివ్వాలి. తర్వాత వాటిని మిక్సీలో వేసి మెత్తగా పొడిలా చేసుకోవాలి. అందులో ఒక టీస్పూన్ బాదం నూనె, ఒక టీస్పూన్ బియ్యప్పిండి వేసి బాగా కలపాలి. ఇలా పేస్ట్‌లా తయారైన మిశ్రమాన్ని ముఖానికి మృదువుగా రాయాలి. దీన్ని 15 నుంచి 20 నిమిషాల పాటు అలాగే ఉంచి, తర్వాత గోరువెచ్చని నీటితో ముఖాన్ని శుభ్రం చేసుకోవాలి. కడిగేటప్పుడు సున్నితంగా మసాజ్ చేస్తే స్క్రబ్ ప్రభావం మరింత బాగా ఉంటుంది.

అయితే ఈ స్క్రబ్‌ను ఉపయోగించే ముందు తప్పనిసరిగా ప్యాచ్ టెస్ట్ చేయాలి. కొందరికి సున్నితమైన చర్మం ఉండే అవకాశం ఉన్నందున, ముందుగా చేతి లేదా మెడపై చిన్న ప్రదేశంలో పరీక్షించి ఎలాంటి అలర్జీ లేకపోతేనే ముఖానికి ఉపయోగించడం మంచిది.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

బంగాళదుంపలు త్వరగా ఉడకాలంటే ఈ టిప్స్ ట్రై చేయండి

రక్తపోటు నుంచి బరువు వరకు.. మందార టీతో ఎన్నో లాభాలు

For More Latest News