రక్తపోటు నుంచి బరువు వరకు.. మందార టీతో ఎన్నో లాభాలు

ఇంటర్నెట్ డెస్క్: వేసవిలో అధిక వేడి, చెమటలు, అలసట కారణంగా చాలా మంది ఒత్తిడి, చిరాకు, తలనొప్పి, జీర్ణ సమస్యలతో ఇబ్బంది పడుతుంటారు. అలాంటి సమయంలో సహజసిద్ధమైన చల్లదనాన్ని ఇచ్చే పానీయాలు తీసుకోవాలని వైద్యులు సూచిస్తున్నారు. ఈ క్రమంలో మందార టీ ఆరోగ్యానికి మేలు చేసే మంచి ఎంపికగా మారింది. ఆయుర్వేదంలో కూడా మందారాన్ని ఔషధ గుణాలున్న మొక్కగా భావిస్తారు. ఎర్ర మందార పువ్వులతో చేసే ఈ టీ శరీరాన్ని తేలికగా ఉంచి, వేసవి వేడి వల్ల కలిగే అసౌకర్యాన్ని తగ్గించడంలో సహాయపడుతుంది.

ఒత్తిడి, అలసట తగ్గింపు

వేసవిలో శరీరం త్వరగా అలసిపోవడం సాధారణం. మానసిక ఒత్తిడి కూడా పెరుగుతుంది. మందార టీ తాగితే మనసుకు ప్రశాంతత లభించి, శరీరానికి రిలాక్స్‌ కలుగుతుందని చెబుతున్నారు. దీని తేలికపాటి సువాసన, రుచి మూడ్‌ను ఫ్రెష్‌గా ఉంచడంలో సహాయపడతాయి.

రక్తపోటు, గుండె ఆరోగ్యానికి మేలు

అధిక రక్తపోటుతో బాధపడేవారికి మందార టీ ఉపయోగకరమని నిపుణులు చెబుతున్నారు. ఇది రక్తనాళాలను సడలించి రక్తప్రసరణను మెరుగుపరచడంలో సహాయపడుతుంది. అలాగే ఇందులో ఉండే యాంటీ ఆక్సిడెంట్లు చెడు కొలెస్ట్రాల్‌ను తగ్గించి గుండె ఆరోగ్యాన్ని కాపాడటంలో సహాయపడతాయి.

బరువు తగ్గించడంలో ఉపయోగం

బరువు తగ్గాలని ప్రయత్నిస్తున్నవారికి కూడా మందార టీ మంచి ఎంపికగా భావిస్తున్నారు. ఇది శరీర జీవక్రియను మెరుగుపరచి, అదనపు నీరు, ఉప్పును బయటకు పంపడంలో సహాయపడుతుంది. కేలరీలు తక్కువగా ఉండటంతో డైట్‌ ఫాలో అయ్యేవారు కూడా దీన్ని తీసుకోవచ్చు.

మధుమేహం, రోగనిరోధక శక్తికి మద్దతు

కొన్ని అధ్యయనాల ప్రకారం మందార టీ ఇన్సులిన్‌ స్పందనను మెరుగుపరచడంలో సహాయపడవచ్చని చెబుతున్నారు. అలాగే రోగనిరోధక శక్తిని పెంచి, కాలేయ ఆరోగ్యానికి కూడా మేలు చేస్తుందని నమ్మకం ఉంది.

మందార టీ తయారీ విధానం

ఎండిన మందార పువ్వులను వేడి నీటిలో 5 నుంచి 7 నిమిషాల పాటు నానబెట్టాలి లేదా మరిగించాలి. తర్వాత వడకట్టి తాగాలి. రుచికోసం తేనె లేదా కొద్దిగా నిమ్మరసం కలుపుకోవచ్చు. అయితే ఏదైనా మూలికా పానీయాన్ని తరచుగా తీసుకునే ముందు ఆరోగ్య నిపుణుల సలహా తీసుకోవడం మంచిది. ముఖ్యంగా గర్భిణీలు, తక్కువ రక్తపోటు ఉన్నవారు జాగ్రత్తగా ఉండాలి.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

బంగాళదుంపలు త్వరగా ఉడకాలంటే ఈ టిప్స్ ట్రై చేయండి

మా ప్లేయర్ల పరువుకు భంగం కలిగిస్తే సహించేది లేదు: ప్రీతి జింటా

For More Latest News