రైలులోనే మీ వస్తువులు మర్చిపోయారా.. తిరిగి పొందే మార్గం ఇదే..!
ABN , Publish Date - Oct 04 , 2026 | 05:40 PM
రైలులోనే వస్తువులను మర్చిపోయారా..? తిరిగి పొందడానికి ఇలా చేయండి.
ఇంటర్నెట్ డెస్క్: కొందరు ప్రయాణం పూర్తయ్యాక దిగే కంగారులో తమ వస్తువులను రైలులోనే మర్చిపోయి వెళ్లిపోతారు. తీరా గమనించాక ఇక అవి తిరిగిరావని ఆందోళన చెందుతారు. అయితే ఈ వస్తువులను పొందడానికి మార్గాలంటూ లేకపోలేదు. ఇలాంటి పరిస్థితుల్లో ప్రయాణికుల కోసం రైల్వే ఓ కార్యక్రమాన్ని ప్రారంభించింది. దానిపేరు ‘ఆపరేషన్ అమానత్’. రైలులో ప్రయాణికులు మర్చిపోయిన వస్తువుల ఫొటోలను ఈ కార్యక్రమం కింద రైల్వే అధికారులు వెబ్‌సైట్‌లో అప్‌లోడ్ చేస్తారు. దీని ద్వారా పోయిన మీ వస్తువులు తిరిగిపొందొచ్చు. ఇందుకోసం ఏం చేయాలో తెలుసుకుందాం రండి..!
మొదట ఫిర్యాదు చేయాలి..
రైలులో వస్తువులు మర్చిపోయామని తెలిసిన వెంటనే ఫిర్యాదు చేయాలి.
రైల్వే హెల్ప్‌లైన్ నంబర్ 139కు కాల్ చేసి లేదా అధికారిక ‘రైల్వే మదాద్’ యాప్‌ను ఉపయోగించి ఫిర్యాదు చేయొచ్చు.
ఫిర్యాదులో కచ్చితంగా కోచ్ వివరాలు, మర్చిపోయిన వస్తువుల వివరాలను నమోదు చేయాలి.
ఇలాంటి సందర్భాల్లో స్టేషన్ మాస్టర్‌ను సంప్రదించాలి
రైలు దిగిన వెంటనే మీ వస్తువులు మర్చిపోయిన విషయం తెలిస్తే తక్షణమే స్టేషన్ మాస్టర్ లేదా ఆర్పీఎఫ్ పోలీసులను సంప్రదించండి.
పోగొట్టుకున్న వస్తువుల వివరాలు, ప్రయాణ టికెట్ వారికి అందించండి.
ఆర్పీఎఫ్ పోలీసులు తదుపరి స్టేషన్‌లోని సిబ్బందిని అప్రమత్తం చేస్తారు. ఆ సిబ్బంది వస్తువులను స్వాధీనం చేసుకుని, మీకు భద్రంగా అందిస్తారు.
‘ఆపరేషన్ అమానత్’ పోర్టల్‌లో వెతకండి
ఆర్పీఎఫ్ అధికారిక వెబ్‌సైట్‌లో ‘ఆపరేషన్ అమానత్’ విభాగానికి వెళ్లండి.
అక్కడ ప్రయాణికులు పోగొట్టుకున్న వస్తువుల ఫొటోలను, వివరాలను ప్రదర్శిస్తారు.
వస్తువులను పోగొట్టుకున్న స్టేషన్‌తో పాటు దాని తరువాతి స్టేషన్‌లను ఎంచుకుని చూడడం వల్ల సమయం ఆదా అవుతుంది.
తిరిగి పొందాలంటే..
అయితే ‘ఆపరేషన్ అమానత్’ పోర్టల్‌లో మీ వస్తువులు కనిపించిన తరువాత ఆర్పీఎఫ్ కార్యాలయానికి వెళ్లాలి.
అక్కడ మీ గుర్తింపు కార్డు, ప్రయాణ టికెట్ చూపించాలి.
అన్నింటి కంటే ముఖ్యమైనది.. ఆ వస్తువులు మీవేనని రుజువు చేసుకోవడం.
ఇందుకోసం వస్తువుల బిల్లు ఉపయోగపడుతుంది. అన్నీ పరిశీలించిన అధికారులు వస్తువులను మీకు తిరిగి ఇస్తారు.
ఇవీ చదవండి
అక్టోబర్ 1 నుంచి రైల్వే టికెట్ చెకింగ్ డ్రైవ్.. ప్రయాణికులు ఈ పత్రాలను వెంట ఉంచుకోవాల్సిందే!
IRCTC రైలు టికెట్ బుకింగ్‌లో ఈ చిన్న బీమా బాక్స్‌ను మిస్ కాకండి.. రూ.10 లక్షల వరకు కవరేజ్
